ਬਾਬਰ ਦੇ ਯੁੱਗ ''ਚ ਜੋ ਹੋਇਆ ਅਤੇ ਹੁਣ ਬੰਗਲਾਦੇਸ਼ ''ਚ ਜੋ ਹੋ ਰਿਹਾ, ਉਸ ਦਾ DNA ਇਕ : ਯੋਗੀ

ਅਯੁੱਧਿਆ : ਵਿਰੋਧੀ ਪਾਰਟੀਆਂ 'ਤੇ ਸਮਾਜ ਨੂੰ ਵੰਡਣ ਦਾ ਦੋਸ਼ ਲਗਾਉਂਦੇ ਹੋਏ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਨੇ ਵੀਰਵਾਰ ਨੂੰ ਕਿਹਾ ਕਿ ਅਯੁੱਧਿਆ ਅਤੇ ਸੰਭਲ 'ਚ ਮੁਗਲ ਸ਼ਾਸਕ ਬਾਬਰ ਦੀ ਫੌਜ ਨੇ ਜੋ ਕੀਤਾ ਅਤੇ ਅੱਜ ਜੋ ਬੰਗਲਾਦੇਸ਼ 'ਚ ਹੋ ਰਿਹਾ ਹੈ, ਉਸ ਦਾ ਡੀ.ਐੱਨ.ਏ. ਇਕ ਹੀ ਹੈ। ਇੱਥੇ 43ਵੇਂ ਰਮਾਇਣ ਮੇਲੇ ਦਾ ਉਦਘਾਟਨ ਕਰਨ ਤੋਂ ਬਾਅਦ ਮੁੱਖ ਮੰਤਰੀ ਨੇ ਕਿਹਾ, “ਭਗਵਾਨ ਰਾਮ ਨੇ ਇਸ ਸਮੁੱਚੇ ਸਮਾਜ ਨੂੰ ਇਕਜੁੱਟ ਕੀਤਾ ਸੀ। ਜੇਕਰ ਅਸੀਂ ਏਕਤਾ ਨੂੰ ਮਹੱਤਵ ਦਿੱਤਾ ਹੁੰਦਾ ਅਤੇ ਦੇਸ਼ ਦੇ ਦੁਸ਼ਮਣਾਂ ਦੀ ਰਣਨੀਤੀ ਨੂੰ ਕਾਮਯਾਬ ਨਾ ਹੋਣ ਦਿੱਤਾ ਹੁੰਦਾ ਤਾਂ ਇਹ ਦੇਸ਼ ਕਦੇ ਵੀ ਗੁਲਾਮ ਨਾ ਹੁੰਦਾ। ਸਾਡੇ ਤੀਰਥ ਅਸਥਾਨ ਕਦੇ ਵੀ ਅਪਵਿੱਤਰ ਨਹੀਂ ਹੋਣੇ ਸਨ। ਮੁੱਠੀ ਭਰ ਹਮਲਾਵਰ ਸਾਡੇ 'ਤੇ ਹਮਲਾ ਕਰਨ ਦੇ ਯੋਗ ਨਹੀਂ ਹੁੰਦੇ ਅਤੇ ਭਾਰਤ ਦੇ ਬਹਾਦਰ ਸੈਨਿਕਾਂ ਨੇ ਉਨ੍ਹਾਂ ਨੂੰ ਕੁਚਲ ਦਿੱਤਾ ਹੁੰਦਾ।''

ਕਿਸੇ ਦਾ ਨਾਂ ਲਏ ਬਿਨਾਂ ਮੁੱਖ ਮੰਤਰੀ ਨੇ ਕਿਹਾ, “ਪਰ ਇਸ ਸਮਾਜ ਵਿੱਚ ਰੁਕਾਵਟਾਂ ਪੈਦਾ ਕਰਨ ਵਾਲੇ ਕਾਮਯਾਬ ਹੋ ਗਏ। ਸਮਾਜਿਕ ਤਾਣੇ-ਬਾਣੇ ਨੂੰ ਢਾਹ ਲਾਉਣ ਲਈ ਜਾਤ ਆਧਾਰਿਤ ਰਾਜਨੀਤੀ ਕਰਨ ਵਾਲੇ ਅੱਜ ਵੀ ਸਰਗਰਮ ਹਨ। ਉਹਨਾਂ ਕਿਹਾ ਕਿ ਤੁਸੀਂ ਦੇਖਦੇ ਹੋ ਕਿ ਸਾਡੇ ਦੁਸ਼ਮਣ ਗੁਆਂਢੀ ਦੇਸ਼ਾਂ ਵਿੱਚ ਕਿਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਕਰ ਰਹੇ ਹਨ। 500 ਸਾਲ ਪਹਿਲਾਂ ਬਾਬਰ ਦੇ ਇੱਕ ਜਰਨੈਲ ਨੇ ਅਯੁੱਧਿਆ ਅਤੇ ਸੰਭਲ ਵਿੱਚ ਜੋ ਕਾਰੇ ਕੀਤੇ ਸਨ, ਉਹੀ ਕਾਰੇ ਅੱਜ ਬੰਗਲਾਦੇਸ਼ ਵਿੱਚ ਹੋ ਰਹੇ ਹਨ। ਤਿੰਨਾਂ ਥਾਵਾਂ 'ਤੇ ਕਿਰਿਆਵਾਂ ਦੀ ਪ੍ਰਕਿਰਤੀ ਅਤੇ ਡੀਐਨਏ ਸਮਾਨ ਹਨ। ਯੋਗੀ ਆਦਿੱਤਿਆਨਾਥ ਨੇ ਕਿਹਾ ਕਿ ਜੇਕਰ ਕੋਈ ਸੋਚਦਾ ਹੈ ਕਿ ਬੰਗਲਾਦੇਸ਼ ਵਿੱਚ ਜੋ ਹੋ ਰਿਹਾ ਹੈ ਉਹ ਇੱਥੇ ਨਹੀਂ ਹੋਵੇਗਾ ਤਾਂ ਉਹ ਭਰਮ ਵਿੱਚ ਹੈ। ਉਨ੍ਹਾਂ ਕਿਹਾ ਕਿ ਫੁੱਟ ਪਾਊ ਤੱਤ ਇੱਥੇ ਪਹਿਲਾਂ ਹੀ ਖੜ੍ਹੇ ਹਨ ਅਤੇ ਸਮਾਜਿਕ ਤਾਣੇ-ਬਾਣੇ ਨੂੰ ਵਿਗਾੜ ਰਹੇ ਹਨ।