ਵਿਆਹ ਦਾ ਝੂਠਾ ਵਾਅਦਾ ਕਰਕੇ ਸਰੀਰਕ ਸਬੰਧ ਬਣਾਉਣਾ ''ਅਪਰਾਧ'' ਨਹੀਂ: ਇਲਾਹਾਬਾਦ ਹਾਈ ਕੋਰਟ ਦਾ ਵੱਡਾ ਫੈਸਲਾ

ਪ੍ਰਯਾਗਰਾਜ : ਉੱਤਰ ਪ੍ਰਦੇਸ਼ ਦੀ ਇਲਾਹਾਬਾਦ ਹਾਈ ਕੋਰਟ ਨੇ ਇੱਕ ਅਹਿਮ ਫੈਸਲਾ ਸੁਣਾਉਂਦਿਆਂ ਸਪੱਸ਼ਟ ਕੀਤਾ ਹੈ ਕਿ ਵਿਆਹ ਦਾ ਝੂਠਾ ਵਾਅਦਾ ਕਰਕੇ ਆਪਸੀ ਸਹਿਮਤੀ ਨਾਲ ਸਰੀਰਕ ਸਬੰਧ ਬਣਾਉਣਾ ਅਪਰਾਧ ਨਹੀਂ ਹੈ। ਅਦਾਲਤ ਨੇ ਕਿਹਾ ਕਿ ਅਜਿਹੇ ਮਾਮਲਿਆਂ ਵਿੱਚ ਕਿਸੇ ਨੌਜਵਾਨ 'ਤੇ ਧੋਖੇ ਨਾਲ ਸਬੰਧ ਬਣਾਉਣ ਦਾ ਦੋਸ਼ ਲਗਾਉਣਾ ਦੰਡਯੋਗ ਅਪਰਾਧ ਨਹੀਂ ਮੰਨਿਆ ਜਾ ਸਕਦਾ।

BNS ਦੀ ਧਾਰਾ 69 'ਤੇ ਅਦਾਲਤ ਦੀ ਵਿਆਖਿਆ 
ਜਸਟਿਸ ਸਿਧਾਰਥ ਵਰਮਾ ਅਤੇ ਜਸਟਿਸ ਅਬਦੁਲ ਸ਼ਾਹਿਦ ਦੀ ਬੈਂਚ ਨੇ ਕਿਹਾ ਕਿ ਭਾਰਤੀ ਨਿਆ ਸੰਹਿਤਾ (BNS) ਦੀ ਧਾਰਾ 69 ਸਿਰਫ਼ ਉਨ੍ਹਾਂ ਮਾਮਲਿਆਂ ਵਿੱਚ ਸਜ਼ਾ ਦਿੰਦੀ ਹੈ ਜਿੱਥੇ ਸਬੰਧ ਸਿਰਫ਼ ਧੋਖੇ ਨਾਲ ਬਣਾਏ ਗਏ ਹੋਣ। ਅਦਾਲਤ ਅਨੁਸਾਰ, ਆਪਸੀ ਸਹਿਮਤੀ ਨਾਲ ਬਣੇ ਰਿਸ਼ਤੇ ਦੇ ਟੁੱਟਣ ਤੋਂ ਪੈਦਾ ਹੋਈ ਨਿਰਾਸ਼ਾ ਨੂੰ ਅਪਰਾਧਿਕ ਧੋਖਾਧੜੀ ਨਹੀਂ ਮੰਨਿਆ ਜਾ ਸਕਦਾ। ਲੰਬੇ ਸਮੇਂ ਤੱਕ ਚੱਲੇ ਸਹਿਮਤੀ ਅਧਾਰਿਤ ਸਬੰਧਾਂ ਨੂੰ ਬਾਅਦ ਵਿੱਚ ਧੋਖਾਧੜੀ ਕਰਾਰ ਨਹੀਂ ਦਿੱਤਾ ਜਾ ਸਕਦਾ।

ਕੀ ਸੀ ਪੂਰਾ ਮਾਮਲਾ? 
ਇਹ ਹੁਕਮ ਨੀਲੇਸ਼ ਰਾਮ ਚੰਦਾਨੀ ਨਾਮਕ ਨੌਜਵਾਨ ਦੀ ਪਟੀਸ਼ਨ 'ਤੇ ਸੁਣਾਇਆ ਗਿਆ ਹੈ। ਪਟੀਸ਼ਨਕਰਤਾ ਦੇ ਵਕੀਲ ਨੇ ਦੱਸਿਆ ਕਿ ਨੀਲੇਸ਼ ਅਤੇ ਸ਼ਿਕਾਇਤਕਰਤਾ ਲੜਕੀ ਜੋਧਪੁਰ ਵਿੱਚ ਪੜ੍ਹਾਈ ਦੌਰਾਨ ਇੱਕ-ਦੂਜੇ ਦੇ ਨੇੜੇ ਆਏ ਸਨ ਅਤੇ ਜੂਨ 2023 ਵਿੱਚ ਉਨ੍ਹਾਂ ਦੀ ਮੰਗਣੀ ਵੀ ਹੋਈ ਸੀ। ਨਵੰਬਰ 2024 ਵਿੱਚ ਵਿਆਹ ਤੈਅ ਹੋ ਚੁੱਕਾ ਸੀ, ਜਿਸ ਲਈ ਹੋਟਲ ਬੁਕਿੰਗ, ਕਾਰਡਾਂ ਦੀ ਛਪਾਈ ਅਤੇ ਫੋਟੋਗ੍ਰਾਫਰ ਤੱਕ ਤੈਅ ਕੀਤੇ ਜਾ ਚੁੱਕੇ ਸਨ।

ਵਿਆਹ ਟੁੱਟਣ 'ਤੇ ਦਰਜ ਹੋਈ ਸੀ FIR 
ਜਦੋਂ ਕਿਸੇ ਕਾਰਨ ਵਿਆਹ ਟੁੱਟ ਗਿਆ, ਤਾਂ ਲੜਕੀ ਨੇ ਨੋਇਡਾ ਦੇ ਸੈਕਟਰ-63 ਥਾਣੇ ਵਿੱਚ ਧਾਰਾ 69 ਅਤੇ ਦਾਜ ਰੋਕੂ ਕਾਨੂੰਨ ਸਮੇਤ ਕਈ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕਰਵਾ ਦਿੱਤਾ। ਹਾਈ ਕੋਰਟ ਨੇ ਪਾਇਆ ਕਿ ਕਿਉਂਕਿ ਵਿਆਹ ਦੀਆਂ ਤਿਆਰੀਆਂ ਚੱਲ ਰਹੀਆਂ ਸਨ, ਇਸ ਲਈ ਨੌਜਵਾਨ ਦਾ ਵਿਆਹ ਕਰਨ ਦਾ ਇਰਾਦਾ ਅਸਲੀ ਸੀ। ਇਸ ਤੱਥ ਨੂੰ ਮੁੱਖ ਰੱਖਦਿਆਂ ਅਦਾਲਤ ਨੇ ਕਿਹਾ ਕਿ ਇਹ ਧੋਖਾਧੜੀ ਦਾ ਮਾਮਲਾ ਨਹੀਂ ਬਣਦਾ ਅਤੇ ਧਾਰਾ 69 ਦੇ ਤਹਿਤ ਦਰਜ ਅਪਰਾਧ ਨੂੰ ਰੱਦ ਕਰ ਦਿੱਤਾ।

ਹੋਰ ਦੋਸ਼ਾਂ ਦੀ ਜਾਂਚ ਰਹੇਗੀ ਜਾਰੀ 
ਅਦਾਲਤ ਨੇ ਭਾਵੇਂ ਧਾਰਾ 69 ਨੂੰ ਰੱਦ ਕਰ ਦਿੱਤਾ ਹੈ, ਪਰ ਸਪੱਸ਼ਟ ਕੀਤਾ ਹੈ ਕਿ ਲੜਕੀ ਵੱਲੋਂ ਲਗਾਏ ਗਏ ਮਾਰਪੀਟ ਅਤੇ ਧਮਕੀ ਦੇ ਹੋਰ ਦੋਸ਼ਾਂ ਦੀ ਪੁਲਸ ਜਾਂਚ ਜਾਰੀ ਰਹੇਗੀ। ਪੁਲਸ ਰਿਪੋਰਟ ਪੇਸ਼ ਹੋਣ ਤੱਕ ਅਦਾਲਤ ਨੇ ਪਟੀਸ਼ਨਕਰਤਾ ਦੀ ਗ੍ਰਿਫ਼ਤਾਰੀ 'ਤੇ ਰੋਕ ਲਗਾ ਦਿੱਤੀ ਹੈ।