Air India ਦੀ ਫਲਾਈਟ ਦੀ ਦੂਜੀ ਕੋਸ਼ਿਸ਼ ''ਚ ਹੋਈ ਸੁਰੱਖਿਅਤ ਲੈਂਡਿੰਗ, ਰਾਹੁਲ ਗਾਂਧੀ ਵੀ ਸਨ ਸਵਾਰ

ਲਖਨਊ - ਦਿੱਲੀ ਤੋਂ ਲਖਨਊ ਆ ਰਹੀ ਏਅਰ ਇੰਡੀਆ ਦੀ ਇੱਕ ਫਲਾਈਟ ਦੀ ਮੰਗਲਵਾਰ ਨੂੰ ਲਖਨਊ ਹਵਾਈ ਅੱਡੇ 'ਤੇ ਦੂਜੀ ਕੋਸ਼ਿਸ਼ ਵਿੱਚ ਸੁਰੱਖਿਅਤ ਲੈਂਡਿੰਗ ਕਰਵਾਈ ਗਈ। ਇਸ ਫਲਾਈਟ ਵਿੱਚ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਵੀ ਸਵਾਰ ਸਨ। ਲੈਂਡਿੰਗ ਦੌਰਾਨ ਪਹਿਲੀ ਕੋਸ਼ਿਸ਼ ਅਸਫ਼ਲ ਰਹਿਣ ਕਾਰਨ ਪਾਇਲਟ ਨੂੰ ਜਹਾਜ਼ ਵਾਪਸ ਹਵਾ ਵਿੱਚ ਲੈ ਜਾਣਾ ਪਿਆ, ਜਿਸ ਨੂੰ ਹਵਾਬਾਜ਼ੀ ਦੀ ਭਾਸ਼ਾ ਵਿੱਚ 'ਗੋ-ਅਰਾਊਂਡ' (Go-around) ਕਿਹਾ ਜਾਂਦਾ ਹੈ।

ਲਖਨਊ ਹਵਾਈ ਅੱਡੇ ਦੇ ਸੂਤਰਾਂ ਅਨੁਸਾਰ, ਏਅਰ ਇੰਡੀਆ ਦੀ ਫਲਾਈਟ AI-1717 ਦਿੱਲੀ ਤੋਂ ਉਡਾਣ ਭਰ ਕੇ ਲਖਨਊ ਆ ਰਹੀ ਸੀ। ਦੁਪਹਿਰ ਨੂੰ ਲੈਂਡਿੰਗ ਦੇ ਸਮੇਂ ਤੇਜ਼ ਹਵਾ ਦੇ ਦਬਾਅ ਕਾਰਨ ਜਹਾਜ਼ ਪਹਿਲੀ ਕੋਸ਼ਿਸ਼ ਵਿੱਚ ਰਨਵੇਅ 'ਤੇ ਨਹੀਂ ਉਤਰ ਸਕਿਆ। ਇਸ ਕਾਰਨ ਪਾਇਲਟ ਨੇ ਦੁਪਹਿਰ 3:45 ਵਜੇ ਜਹਾਜ਼ ਨੂੰ 'ਗੋ-ਅਰਾਊਂਡ' ਕਰਵਾਇਆ। ਇਸ ਤੋਂ ਬਾਅਦ ਪਾਇਲਟ ਨੇ ਮੌਸਮ ਅਤੇ ਹਾਲਾਤ ਦਾ ਜਾਇਜ਼ਾ ਲਿਆ ਅਤੇ ਲਗਭਗ 10 ਮਿੰਟ ਬਾਅਦ, ਦੁਪਹਿਰ 3:55 ਵਜੇ ਦੂਜੀ ਕੋਸ਼ਿਸ਼ ਵਿੱਚ ਜਹਾਜ਼ ਨੂੰ ਸੁਰੱਖਿਅਤ ਰੂਪ ਵਿੱਚ ਲਖਨਊ ਏਅਰਪੋਰਟ 'ਤੇ ਉਤਾਰ ਦਿੱਤਾ।

ਸੁਰੱਖਿਅਤ ਲੈਂਡਿੰਗ ਤੋਂ ਬਾਅਦ ਰਾਹੁਲ ਗਾਂਧੀ ਸਮੇਤ ਸਾਰੇ ਯਾਤਰੀ ਬਿਨਾਂ ਕਿਸੇ ਪਰੇਸ਼ਾਨੀ ਦੇ ਆਮ ਵਾਂਗ ਜਹਾਜ਼ ਤੋਂ ਬਾਹਰ ਆ ਗਏ ਅਤੇ ਕਿਸੇ ਵੀ ਤਰ੍ਹਾਂ ਦੀ ਅਣਸੁਖਾਵੀਂ ਘਟਨਾ ਦੀ ਕੋਈ ਖ਼ਬਰ ਨਹੀਂ ਹੈ। ਮਾਹਰਾਂ ਅਨੁਸਾਰ, 'ਗੋ-ਅਰਾਊਂਡ' ਹਵਾਬਾਜ਼ੀ ਖੇਤਰ ਵਿੱਚ ਅਪਣਾਈ ਜਾਣ ਵਾਲੀ ਇੱਕ ਆਮ ਸੁਰੱਖਿਆ ਪ੍ਰਕਿਰਿਆ ਹੈ। ਜੇਕਰ ਲੈਂਡਿੰਗ ਵੇਲੇ ਪਾਇਲਟ ਨੂੰ ਮੌਸਮ, ਰਨਵੇਅ ਜਾਂ ਕਿਸੇ ਹੋਰ ਕਾਰਨ ਕਰਕੇ ਹਾਲਾਤ ਪੂਰੀ ਤਰ੍ਹਾਂ ਸੁਰੱਖਿਅਤ ਨਹੀਂ ਲੱਗਦੇ, ਤਾਂ ਜਹਾਜ਼ ਨੂੰ ਉਤਾਰਨ ਦੀ ਬਜਾਏ ਦੁਬਾਰਾ ਉਚਾਈ 'ਤੇ ਲੈ ਜਾਇਆ ਜਾਂਦਾ ਹੈ ਅਤੇ ਹਾਲਾਤ ਠੀਕ ਹੋਣ 'ਤੇ ਮੁੜ ਲੈਂਡਿੰਗ ਕੀਤੀ ਜਾਂਦੀ ਹੈ।

ਇਸ ਤੋਂ ਪਹਿਲਾਂ, ਇੱਕ ਹੋਰ ਘਟਨਾ ਵਿੱਚ ਕੋਚੀ ਤੋਂ ਅਬੂ ਧਾਬੀ ਜਾ ਰਹੀ ਏਅਰ ਇੰਡੀਆ ਐਕਸਪ੍ਰੈਸ ਦੀ ਫਲਾਈਟ IX 415 ਵਿੱਚ ਵੀ ਤਕਨੀਕੀ ਖ਼ਰਾਬੀ ਆਉਣ ਦੀ ਖ਼ਬਰ ਸਾਹਮਣੇ ਆਈ ਸੀ। ਹਵਾ ਵਿੱਚ 36 ਹਜ਼ਾਰ ਫੁੱਟ ਦੀ ਉਚਾਈ 'ਤੇ ਜਹਾਜ਼ ਦੇ ਇੱਕ ਇੰਜਣ ਵਿੱਚ ਤੇਲ ਦਾ ਪ੍ਰੈਸ਼ਰ ਘਟਣ ਕਾਰਨ ਪਾਇਲਟ ਨੇ ਹਵਾ ਵਿੱਚ ਹੀ ਇੰਜਣ ਨੂੰ ਬੰਦ ਕਰਕੇ ਜਹਾਜ਼ ਨੂੰ ਵਾਪਸ ਕੋਚੀ ਹਵਾਈ ਅੱਡੇ 'ਤੇ ਸੁਰੱਖਿਅਤ ਉਤਾਰ ਲਿਆ ਸੀ, ਜਿਸ ਨਾਲ ਸਾਰੇ ਯਾਤਰੀ ਵਾਲ-ਵਾਲ ਬਚ ਗਏ ਸਨ।