ਪੂਰੇ ਭਾਰਤ ਦਾ 99 ਫੀਸਦੀ Gold ਹੈ ਇਸ ਸੂਬੇ ਕੋਲ! ਜਾਣ ਕੇ ਰਹਿ ਜਾਓਗੇ ਹੈਰਾਨ

ਨਵੀਂ ਦਿੱਲੀ: ਭਾਰਤ ਨੂੰ ਦੁਨੀਆ ਦੇ ਸਭ ਤੋਂ ਵੱਡੇ ਸੋਨਾ ਖਪਤਕਾਰ ਦੇਸ਼ਾਂ 'ਚ ਗਿਣਿਆ ਜਾਂਦਾ ਹੈ। ਆਮ ਤੌਰ 'ਤੇ ਮੰਨਿਆ ਜਾਂਦਾ ਹੈ ਕਿ ਭਾਰਤ ਆਪਣੀ ਲੋੜ ਦਾ ਸਾਰਾ ਸੋਨਾ ਵਿਦੇਸ਼ਾਂ ਤੋਂ ਮੰਗਵਾਉਂਦਾ ਹੈ, ਪਰ ਹਕੀਕਤ ਇਹ ਹੈ ਕਿ ਸਾਡੀ ਆਪਣੀ ਧਰਤੀ ਹੇਠਾਂ ਵੀ ਸੋਨੇ ਦੇ ਵੱਡੇ ਭੰਡਾਰ ਮੌਜੂਦ ਹਨ। ਹਾਲਾਂਕਿ, ਭਾਰਤ 'ਚ ਸੋਨੇ ਦੀ ਮਾਈਨਿੰਗ ਕਾਫੀ ਸੀਮਤ ਅਤੇ ਗੁੰਝਲਦਾਰ ਪ੍ਰਕਿਰਿਆ ਹੈ।

ਕਰਨਾਟਕ ਦਾ ਦਬਦਬਾ ਤੇ ਬਿਹਾਰ 'ਚ ਛੁਪਿਆ ਖਜ਼ਾਨਾ
ਭਾਰਤ ਦੇ ਸੋਨੇ ਦੇ ਉਤਪਾਦਨ 'ਚ ਕਰਨਾਟਕ ਸਭ ਤੋਂ ਅੱਗੇ ਹੈ। ਦੇਸ਼ ਦੀਆਂ ਖਾਣਾਂ ਵਿੱਚੋਂ ਨਿਕਲਣ ਵਾਲੇ ਕੁੱਲ ਪ੍ਰਾਇਮਰੀ ਸੋਨੇ ਦਾ ਲਗਭਗ 99 ਫੀਸਦੀ ਹਿੱਸਾ ਇਕੱਲੇ ਕਰਨਾਟਕ ਤੋਂ ਹੀ ਪ੍ਰਾਪਤ ਹੁੰਦਾ ਹੈ। ਰਾਇਚੂਰ ਜ਼ਿਲ੍ਹੇ ਵਿੱਚ ਸਥਿਤ ਹੁਟੀ ਗੋਲਡ ਮਾਈਨਜ਼ ਦੇਸ਼ ਦੀ ਸਭ ਤੋਂ ਪੁਰਾਣੀ ਅਤੇ ਸਰਗਰਮ ਖਾਨ ਹੈ। ਕੋਲਾਰ ਗੋਲਡ ਫੀਲਡਜ਼ (KGF) ਕਦੇ ਕਰਨਾਟਕ ਦੀ ਪਛਾਣ ਸੀ, ਪਰ ਹੁਣ ਇੱਥੇ ਉਤਪਾਦਨ ਬੰਦ ਹੋ ਚੁੱਕਾ ਹੈ। 

ਬਿਹਾਰ ਦੀ ਸੰਭਾਵਨਾ
ਉਤਪਾਦਨ 'ਚ ਭਾਵੇਂ ਕਰਨਾਟਕ ਅੱਗੇ ਹੈ, ਪਰ ਭੰਡਾਰ ਦੇ ਮਾਮਲੇ 'ਚ ਬਿਹਾਰ ਦਾ ਜਮੂਈ ਜ਼ਿਲ੍ਹਾ ਸਿਖਰ 'ਤੇ ਮੰਨਿਆ ਜਾ ਰਿਹਾ ਹੈ। ਸਰਕਾਰੀ ਅਨੁਮਾਨਾਂ ਅਨੁਸਾਰ ਇੱਥੇ ਹਜ਼ਾਰਾਂ ਟਨ ਚੱਟਾਨਾਂ 'ਚ ਸੋਨਾ ਦੱਬਿਆ ਹੋਇਆ ਹੈ, ਜਿਸ ਦੀ ਖੁਦਾਈ ਲਈ ਤਿਆਰੀਆਂ ਚੱਲ ਰਹੀਆਂ ਹਨ।

ਖੁਦਾਈ ਮਹਿੰਗੀ ਕਿਉਂ ਹੈ?
ਭਾਰਤ 'ਚ ਸੋਨੇ ਦੀ ਮਾਈਨਿੰਗ ਕਰਨਾ ਤਕਨੀਕੀ ਤੌਰ 'ਤੇ ਬਹੁਤ ਚੁਣੌਤੀਪੂਰਨ ਹੈ। ਦੂਜੇ ਦੇਸ਼ਾਂ ਵਾਂਗ ਇੱਥੇ ਸੋਨਾ ਨਦੀਆਂ ਦੀ ਰੇਤ ਵਿੱਚ ਆਸਾਨੀ ਨਾਲ ਨਹੀਂ ਮਿਲਦਾ, ਸਗੋਂ ਇਹ ਸਖ਼ਤ ਚੱਟਾਨਾਂ ਦੇ ਅੰਦਰ ਹੁੰਦਾ ਹੈ। ਇਸੇ ਕਾਰਨ ਭਾਰਤ ਵਿੱਚ ਸੋਨੇ ਦੀ ਮਾਈਨਿੰਗ ਕਾਫੀ ਮਹਿੰਗੀ ਪੈਂਦੀ ਹੈ।

ਕਿਵੇਂ ਬਣਦਾ ਹੈ ਖਦਾਨਾਂ 'ਚੋਂ 24 ਕੈਰੇਟ ਸੋਨਾ?
ਸੋਨੇ ਨੂੰ ਬਾਜ਼ਾਰ ਤੱਕ ਪਹੁੰਚਾਉਣ ਦੀ ਪ੍ਰਕਿਰਿਆ ਕਾਫੀ ਲੰਬੀ ਹੈ। ਭਾਰਤੀ ਭੂ-ਵਿਗਿਆਨਕ ਸਰਵੇਖਣ (GSI) ਸੈਟੇਲਾਈਟ ਡੇਟਾ ਅਤੇ ਡ੍ਰਿਲਿੰਗ ਰਾਹੀਂ ਸੋਨੇ ਵਾਲੇ ਇਲਾਕਿਆਂ ਦੀ ਪਛਾਣ ਕਰਦਾ ਹੈ। ਜ਼ਮੀਨ ਦੇ ਹੇਠਾਂ ਸੁਰੰਗਾਂ ਬਣਾ ਕੇ ਕੰਟਰੋਲਡ ਵਿਸਫੋਟਾਂ ਅਤੇ ਭਾਰੀ ਮਸ਼ੀਨਾਂ ਦੀ ਮਦਦ ਨਾਲ ਚੱਟਾਨਾਂ ਨੂੰ ਤੋੜਿਆ ਜਾਂਦਾ ਹੈ। ਸੋਨੇ ਵਾਲੇ ਪੱਥਰਾਂ (ਅਇਸਕ) ਨੂੰ ਮਸ਼ੀਨਾਂ 'ਚ ਪੀਸ ਕੇ ਬਾਰੀਕ ਕੀਤਾ ਜਾਂਦਾ ਹੈ। ਰਸਾਇਣਕ ਪ੍ਰਕਿਰਿਆ ਰਾਹੀਂ ਸੋਨੇ ਨੂੰ ਵੱਖ ਕੀਤਾ ਜਾਂਦਾ ਹੈ ਅਤੇ ਫਿਰ ਰਿਫਾਇਨਰੀ ਵਿੱਚ ਭੇਜ ਕੇ 99.9 ਫੀਸਦੀ ਸ਼ੁੱਧ (24 ਕੈਰੇਟ) ਸੋਨਾ ਤਿਆਰ ਕੀਤਾ ਜਾਂਦਾ ਹੈ, ਜੋ ਸਿੱਕਿਆਂ ਅਤੇ ਗਹਿਣਿਆਂ ਦੇ ਰੂਪ 'ਚ ਸਾਡੇ ਤੱਕ ਪਹੁੰਚਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e