NCP ਆਗੂ ਦਾ ਗੋਲੀਆਂ ਮਾਰ ਕੇ ਕਤਲ, ਵਾਰਦਾਤ ਤੋਂ ਪਹਿਲਾਂ ਇਲਾਕੇ ਦੀ ਬਿਜਲੀ ਕੀਤੀ ਬੰਦ

ਪੁਣੇ- ਮਹਾਰਾਸ਼ਟਰ ਦੇ ਪੁਣੇ 'ਚ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ (ਐੱਨ.ਸੀ.ਪੀ.) ਦੇ ਸਾਬਕਾ ਕੌਂਸਲਰ ਵਨਰਾਜ ਆਂਦੇਕਰ ਦਾ ਐਤਵਾਰ ਰਾਤ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਸਾਬਕਾ ਕੌਂਸਲਰ ਨੂੰ 5 ਗੋਲੀਆਂ ਮਾਰੀਆਂ ਗਈਆਂ। ਫਾਇਰਿੰਗ ਤੋਂ ਬਾਅਦ ਵਨਰਾਜ ਆਂਦੇਕਰ ਨੂੰ ਗੰਭੀਰ ਹਾਲਤ 'ਚ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ, ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਪੁਲਸ ਨੇ ਦੱਸਿਆ ਕਿ ਪੁਣੇ ਦੇ ਨਾਨਾਪੇਠ ਦੇ ਡੇਕੇ ਤਲੀਮ ਇਲਾਕੇ 'ਚ ਇਹ ਘਟਨਾ ਰਾਤ ਕਰੀਬ 8.30 ਵਜੇ ਹੋਈ। ਖ਼ਦਸ਼ਾ ਹੈ ਕਿ ਵਿਵਾਦ ਕਾਰਨ ਆਂਦੇਕਰ ਦਾ ਕਤਲ ਕੀਤਾ ਗਿਆ ਹੈ। ਆਂਦੇਕਰ ਦੇ ਰਿਸ਼ਤੇਦਾਰਾਂ 'ਤੇ ਕਤਲ ਦਾ ਖ਼ਦਸ਼ਾ ਹੈ। ਪੁਲਸ ਨੇ ਤਿੰਨ ਲੋਕਾਂ ਨੂੰ ਹਿਰਾਸਤ 'ਚ ਲੈ ਕੇ ਪੁੱਛ-ਗਿੱਛ ਸ਼ੁਰੂ ਕਰ ਦਿੱਤੀ ਹੈ। 

ਘਟਨਾ ਦਾ ਸੀ.ਸੀ.ਟੀ.ਵੀ. ਫੁਟੇਜ ਵੀ ਵਾਇਰਲ ਹੋ ਰਿਹਾ ਹੈ। ਇਸ 'ਚ 5-6 ਬਾਈਕ 'ਤੇ ਆਏ ਕਰੀਬ 12 ਨੌਜਵਾਨ ਇਕੱਠੇ ਆਂਦੇਕਰ 'ਤੇ ਹਮਲਾ ਬੋਲਦੇ ਦਿੱਸ ਰਹੇ ਹਨ। ਜਿਵੇਂ ਹੀ ਹਮਲਾਵਰ ਆਂਦੇਕਰ ਦੇ ਕਰੀਬ ਪਹੁੰਚੇ, ਉਹ ਆਪਣੀ ਜਾਨ ਬਚਾਉਣ ਲਈ ਪਿੱਛੇ ਵੱਲ ਦੌੜਨ ਲੱਗੇ। ਇਸੇ ਦੌਰਾਨ ਇਕ ਹਮਲਾਵਰ ਨੇ ਆਂਦੇਕਰ ਦੇ ਕੰਨ ਦੇ ਕੋਲ ਗੋਲੀ ਮਾਰੀ। ਆਂਦੇਕਰ ਦੇ ਖੂਨ ਨਾਲ ਲੱਥਪੱਥ ਹੋਣ ਤੋਂ ਬਾਅਦ ਹਮਲਾਵਰ ਨੇ ਹਵਾ 'ਚ ਬੰਦੂਕ ਲਹਿਰਾਉਂਦੇ ਹੋਏ ਫਾਇਰਿੰਗ ਕੀਤੀ। ਇਸ ਤੋਂ ਬਾਅਦ ਸਾਰੇ ਮੌਕੇ 'ਤੇ ਫਰਾਰ ਹੋ ਗਏ। ਮੀਡੀਆ ਰਿਪੋਰਟਸ ਅਨੁਸਾਰ, ਆਂਦੇਕਰ ਦੇ ਕਤਲ ਲਈ ਹਮਲਾਵਰਾਂ ਨੇ ਯੋਜਨਾ ਬਣਾਈ ਸੀ। ਇਲਾਕੇ 'ਚ ਲਾਈਟ ਬੰਦ ਕਰ ਦਿੱਤੀ ਗਈ ਸੀ। ਲਾਈਟ ਨਾ ਹੋਣ ਕਾਰਨ ਆਂਦੇਕਰ ਸੜਕ 'ਤੇ ਬਾਹਰ ਇਕੱਲੇ ਖੜ੍ਹੇ ਸਨ। ਵਨਰਾਜ ਆਂਦੇਕਰ 2017 ਪੁਣੇ ਨਗਰ ਨਿਗਮ ਚੋਣਾਂ 'ਚ ਰਾਸ਼ਟਰਵਾਦੀ ਕਾਂਗਰਸ ਪਾਰਟੀ ਤੋਂ ਕੌਂਸਲਰ ਚੁਣੇ ਗਏ ਸਨ। ਐੱਨ.ਸੀ.ਪੀ. ਦੇ 2 ਧਿਰਾਂ 'ਚ ਵੰਡਣ ਤੋਂ ਬਾਅਦ ਉਨ੍ਹਾਂ ਨੇ ਅਜੀਤ ਧਿਰ ਨੂੰ ਸਮਰਥਨ ਦਿੱਤਾ ਸੀ। ਇਸ ਤੋਂ ਪਹਿਲੇ ਉਨ੍ਹਾਂ ਦੀ ਮਾਂ ਰਾਜਸ਼੍ਰੀ ਆਂਦੇਕਰ 2007 ਅਤੇ 2012 'ਚ 2 ਵਾਰ ਕੌਂਸਲਰ ਰਹਿ ਚੁੱਕੀ ਹੈ। ਵਨਰਾਜ ਦੇ ਚਚੇਰੇ ਭਰਾ ਉਦੇਕਤ ਆਂਦੇਕਰ ਵੀ ਕੌਂਸਲਰ ਸਨ। ਇਸ ਤੋਂ ਇਲਾਵਾ ਉਨ੍ਹਾਂ ਦੀ ਭੈਣ ਵਤਸਲਾ ਆਂਦੇਕਰ ਪੁਣੇ ਦੀ ਮੇਅਰ ਰਹਿ ਚੁੱਕੀ ਹੈ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8