ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ
Monday, Jul 02, 2018 - 12:41 PM (IST)
ਵੈਰੀ ਹੋਇਆ ਪਿਆ ਜ਼ਮਾਨਾ, ਮਾਂ ਤੋਂ ਹੁੰਦਾ ਪੁੱਤ ਬੇਗ਼ਾਨਾ,
ਗੋਦੀ ਆਪ ਖਿਡਾਉਂਦੀ ਪਹਿਲਾਂ, ਫਿਰ ਬੰਨਦੀ ਸ਼ਗ਼ਨਾਂ ਦਾ ਗ਼ਾਨਾ,
ਹੋ ਗਿਆ ਜਦ ਉਹ ਜਗ ਦਾ ਵੈਰੀ, ਤਾਂ ਵਿਲਕਦੀ ਮਾਂ..
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਚਾਵਾਂ ਨਾਲ ਸੀ ਜਿਸਨੂੰ ਮਾਂ ਨੇ, ਗੋਦੀ ਵਿਚ ਖਿਡਾਇਆ,
ਚੰਦਰੇ ਜਗ ਦੀਆਂ ਰੀਤਾਂ ਉਸਨੂੰ, ਵੈਰੀ ਆਪ ਬਣਾਇਆ,
ਬੁਰੇ ਹਾਲਾਤਾਂ ਮੋਹ-ਤੰਦਾਂ ਦੀ, ਖੋਹ ਲਈ ਗੂੜੀ ਛਾਂ..
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਮਾਂ ਚਾਹੁੰਦੀ ਏ ਪੁੱਤ ਉਹਦੇ ਨੂੰ, ਤੱਤੀ ਵਾ ਨਾ ਲੱਗੇ,
ਪਰ ਇਹ ਚੰਦਰੀ ਦੁਨੀਆ ਮਾਂ ਦੇ, ਮੋਹ-ਪਿਆਰ ਨੂੰ ਠੱਗੇ,
ਰੀਤ ਜ਼ਮਾਨੇ ਦੀ ਭੈੜੀ ਨੇ, ਗੈਗਸਟਰ ਦਿੱਤੇ ਬਣਾ..
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਕਾਲ ਕੋਠੜੀ ਦੁਨੀਆ ਵਾਲੀ, ਹਨੇਰਾ ਜਦ ਕੋਈ ਸਹਿੰਦਾ,
ਰੂਹ ਨੂੰ ਜ਼ਖ਼ਮੀ ਕਰੇ ਆਪਣਾ, ਡੰਗ ਮਾਰਦਾ ਰਹਿੰਦਾ,
ਇਹੋ ਗੱਲ ਦਿਲ ਵਿੱਚ ਭਰ ਦਿੰਦੀ, ਬਸ ਨਫ਼ਰਤ ਦੀ ਥਾਂ..।
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਡੌਨ ਦੇ ਗੋਲੀ ਲੱਗੇ ਭਾਵੇਂ, ਪੁਲਿਸ ਦਾ ਬੰਦਾ ਹੋਵੇ,
ਉਸ ਵੇਲੇ ਤਾਂ ਕੇਵਲ ਸੀਨਾ ਮਾਂ ਦਾ ਛਲਣੀ ਹੋਵੇ,
ਪਰਸ਼ੋਤਮ ਪੁੱਛੇ ਦੱਸੋ ਇਸ ਵਿਚ, ਮਾਂ ਦਾ ਕੀ ਗ਼ੁਨਾਹ..।
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਜਿਸਦੇ ਲਾਲ ਦੇ ਸੀਨੇ ਨੂੰ ਆ, ਗੋਲੀ ਜਦ ਕੋਈ ਛੋਂਹਦੀ,
ਉਸ ਤੋਂ ਪਹਿਲਾਂ ਉਹ ਮਰ ਜਾਂਦੀ, ਖ਼ੂਨ ਦੇ ਅੱਥਰੂ ਰੋਂਦੀ,
ਸਰੋਏ ਕਹੇ ਪੁੱਤ ਮਰਨ ਤੋਂ ਪਹਿਲਾਂ, ਮੁੱਕ ਜਾਂਦੀ ਏ ਮਾਂ..
ਮਾਂ ਤਾਂ ਕੇਵਲ ਪੁੱਤ ਜੰਮਦੀ ਏ, ਦੁਸ਼ਮਣ ਨਾ ਜੰਮਦੀ ਮਾਂ।
ਪਰਸ਼ੋਤਮ ਲਾਲ ਸਰੋਏ,
ਮੋਬਾ : 91-92175-44348
