ਜ਼ਿੰਦਗੀ ਹਰ ਨਵੇਂ ਵਰ੍ਹੇ

ਜ਼ਿੰਦਗੀ ਹਰ ਨਵੇਂ ਵਰ੍ਹੇ                         
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ
ਕੱਚਾ ਖਰੜਾ ਲੈ ਕੇ ਇਸ ਦੇ ਪਾਤਰ 
ਰੋਜ਼ ਬਿਊਟੀਪਾਰਲਰ ਤੇ ਸੈਲੂਨ ਜਾਂਦੇ ਹਨ
ਕਹਿੰਦੇ ਨੇ ਫਿਰ ਕਿਤਾਬ ਵਿਕਦੀ ਹੈ
ਜ਼ਿੰਦਗੀ ਹਰ ਨਵੇਂ ਵਰ੍ਹੇ 
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ 

ਨਿੱਖਰੇ ਚਿਹਰਿਆਂ ਤੋਂ ਭਾਫਾਂ ਛੱਡਦਾ ਪ੍ਰਭਾਵ 
ਕਿਤਾਬ ਦੇ ਉੱਤੇ ਪੈਂਦਾ ਹੈ
ਹੁਣ ਕਿਤਾਬ ਧੂੜ ਫੱਕਦੀ ਹੈ
ਅਤੇ ਹਰ ਰੋਜ਼ ਇਕ ਸਫਾ ਮੈਲਾ ਕਰਦੀ ਹੈ
ਜਦੋਂ ਇਹ ਬਜ਼ਾਰ ਵਿਚ ਆ ਟਿਕਦੀ ਹੈ
ਜ਼ਿੰਦਗੀ ਹਰ ਨਵੇਂ ਵਰ੍ਹੇ
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ

ਕੋਈ ਟੀ.ਵੀ 'ਚ ਦੇਖਦਾ ਕੋਈ ਅਖਬਾਰ ਵਿਚੋਂ ਪੜ੍ਹਦਾ ਹੈ
ਹੁਣ ਨਵਾਂ ਵਰ੍ਹਾ ਬਹੁਤਾ ਮੁਬਾਇਲ ਵਿਚੋਂ ਈ ਚੜ੍ਹਦਾ ਹੈ
ਅੱਖਾਂ ਨਜ਼ਾਰਾਂ ਦੇਖਦੀਆਂ ਹਨ
ਹੁਣ ਨਜ਼ਰਾਂ ਚਿਹਰੇ ਨਹੀਂ ਪੜ੍ਹਦੀਆਂ
ਜੋ ਖੁੱਲ੍ਹੀ ਕਿਤਾਬ ਹੁੰਦੇ ਨੇ
ਹੁਣ ਚਿਹਰੇ ਫੇਸਬੁੱਕ ਤੋਂ ਜਾਣੇ ਜਾਂਦੇ ਨੇ
ਜਾਂ ਫਿਰ ਲੁੱਕ ਤੋਂ ਪਛਾਣੇ ਜਾਂਦੇ ਨੇ
ਬਸ ਹੁਣ ਇਹ ਗੀਤ ਬਰੈਂਡਡ ਸਿੱਖਦੀ 
ਜ਼ਿੰਦਗੀ ਹਰ ਨਵੇਂ ਵਰ੍ਹੇ 
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ

ਫਿਰ ਵੀ ਵਧਾਈ ਹੋਵੇ ਨਵੇਂ ਵਰ੍ਹੇ ਦੀ
ਲਿਖੀ ਜਾ ਰਹੀ ਨਵੀਂ ਸਕਰਿਪਟ ਦੀ 
ਇਸ਼ਤਿਹਾਰ ਉੱਤੇ ਕਰਕੇ ਖਰਚ ਜੇ ਤੂੰ ਡਰਦਾ ਨੀਂ
ਸਹੀ ਗਲਤ ਦੀ ਪਰਖ ਵੀ ਫੇਰ ਕੋਈ ਕਰਦਾ ਨੀਂ
ਇਸ ਸਦੀ ਦੀ ਤਾਂ ਹਰ ਚੀਜ਼ ਹੀ ਵਿਕਦੀ ਹੈ
ਜ਼ਿੰਦਗੀ ਹਰ ਨਵੇਂ ਵਰ੍ਹੇ 
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ

ਇਸ ਸਾਲ ਦੇ ਅੰਤ ਵਿਚ ਕਰੀਂ ਤਿਆਰੀ ਛਾਪਣ ਦੀ
ਮੁੱਖ ਬੰਦ ਵੀ ਮੁੱਲ ਦਾ ਲੈਲੀਂ
ਲੋੜ ਨੀ ਕਦਰਾਂ ਕੀਮਤਾਂ ਨਾਪਣ ਦੀ
ਭਾਵੇਂ ਜ਼ਿੰਦਗੀ “ਸਾਦਗੀ'' ਪਸੰਦ ਕਰਦੀ ਹੈ
ਪਰ ਕਿਤਾਬ ਲਿਛਕਦੇ ਸਿਰਲੇਖ ਦੀ ਮੰਗ ਕਰਦੀ ਹੈ
ਇਸ ਲਈ ਹਰ ਸ਼ੈਅ 'ਚ ਬਨਾਵਟ ਦਿਸਦੀ ਹੈ
ਜ਼ਿੰਦਗੀ ਹਰ ਨਵੇਂ ਵਰ੍ਹੇ 
365 ਸਫਿਆਂ ਦੀ ਕਿਤਾਬ ਲਿਖਦੀ ਹੈ
ਗੁਰਵਰਿੰਦਰ ਸਿੰਘ ਗਰੇਵਾਲ 
ਮੋਬਾਇਲ ਨੰ. 9814655167