ਸੜਕ ਹਾਦਸੇ ''ਚ ਜ਼ਖ਼ਮੀ ਭੱਠੇ ਦੇ ਮੁਨੀਮ ਨੇ ਤੋੜਿਆ ਦਮ

ਭਵਾਨੀਗੜ੍ਹ  (ਵਿਕਾਸ): ਸ਼ਹਿਰ ਦੇ ਨੇੜੇ ਸਮਾਣਾ ਕੈਂਚੀਆਂ ਵਿਖੇ ਕੁੱਝ ਦਿੱਨ ਪਹਿਲਾਂ ਵਾਪਰੇ ਇੱਕ ਸੜਕ ਹਾਦਸੇ 'ਚ ਜ਼ਖ਼ਮੀ ਹੋਏ ਭੱਠੇ ਦੇ ਇੱਕ ਮੁਨੀਮ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਇਸ ਸਬੰਧੀ ਪੁਲਸ ਨੇ ਟੈਂਕਰ ਦੇ ਨਾ-ਮਾਲੂਮ ਚਾਲਕ ਵਿਰੁੱਧ ਕੇਸ ਦਰਜ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ। ਇਸ ਸਬੰਧੀ ਸੁਖਵਿੰਦਰ ਸਿੰਘ ਪੁੱਤਰ ਬੇਅੰਤ ਸਿੰਘ ਵਾਸੀ ਝਨੇੜੀ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਰੇਤਗੜ੍ਹ ਵਿਖੇ ਝਨੇੜੀ ਬਰਿੱਕਸ (ਇੱਟਾਂ ਵਾਲੇ ਭੱਠੇ) 'ਤੇ ਕੰਮ ਕਰਦਾ ਹੈ ਜਿੱਥੇ ਕੇ ਅਜੀਤ ਸਿੰਘ ਪੁੱਤਰ ਹਰਨੇਕ ਸਿੰਘ ਵਾਸੀ ਭਵਾਨੀਗੜ੍ਹ ਵੀ ਪਿਛਲੇ ਦੋ ਸਾਲਾਂ ਤੋਂ ਬਤੌਰ ਮੁਨਸ਼ੀ ਕੰਮ ਕਰਦਾ ਸੀ। ਲੰਘੀ 10 ਅਪ੍ਰੈਲ ਨੂੰ ਉਕਤ ਅਜੀਤ ਸਿੰਘ ਨਦਾਮਪੁਰ ਨੇੜੇ ਇੱਕ ਭੱਠੇ 'ਤੇ ਮੋਟਰਸਾਇਕਲ 'ਤੇ ਸਵਾਰ ਹੋ ਕੇ ਕੋਲੇ ਦੇ ਸੈਂਪਲ ਚੈੱਕ ਕਰਵਾਉਣ ਗਿਆ ਸੀ, ਜਿੱਥੇ ਕਿ ਉਹ (ਸੁਖਵਿੰਦਰ ਸਿੰਘ) ਪਹਿਲਾਂ ਤੋਂ ਹੀ ਮੌਜੂਦ ਸੀ।

ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਕੋਲੇ ਦੇ ਸੈਂਪਲ ਚੈੱਕ ਕਰਵਾਉਣ ਉਪਰੰਤ ਉਹ ਦੋਵੇਂ ਆਪਣੇ ਆਪਣੇ ਮੋਟਰਸਾਇਕਲ ’ਤੇ ਨਦਾਮਪੁਰ ਤੋਂ ਭਵਾਨੀਗੜ੍ਹ ਵੱਲ ਨੂੰ ਵਾਪਸ ਚੱਲ ਪਏ ਤੇ ਜਦੋਂ ਅਜੀਤ ਸਿੰਘ ਸਮਾਣਾ ਕੈਂਚੀਆਂ ਵਿਖੇ ਫਲਾਈ ਓਵਰ ਦੇ ਹੇਠਾਂ ਪਹੁੰਚਿਆ ਤਾਂ ਨਾਭਾ ਸਾਇਡ ਵੱਲੋਂ ਆਉਂਦੇ ਤੇਲ ਦੇ ਇੱਕ ਤੇਜ਼ ਰਫ਼ਤਾਰ ਟੈਂਕਰ ਦੇ ਚਾਲਕ ਨੇ ਲਾਪਰਵਾਹੀ ਨਾਲ ਅਜੀਤ ਸਿੰਘ ਦੇ ਮੋਟਰਸਾਇਕਲ ਨੂੰ ਟੱਕਰ ਮਾਰ ਦਿੱਤੀ। ਘਟਨਾ 'ਚ ਅਜੀਤ ਸਿੰਘ ਨੂੰ ਕਾਫੀ ਗੰਭੀਰ ਸੱਟਾਂ ਲੱਗੀਆਂ ਤੇ ਜਖ਼ਮੀ ਹਾਲਤ ਵਿੱਚ ਉਸਨੂੰ ਭਵਾਨੀਗੜ੍ਹ ਦੇ ਸਰਕਾਰੀ ਹਸਪਤਾਲ ਵਿਖੇ ਭਰਤੀ ਕਰਵਾਇਆ ਗਿਆ, ਇਲਾਜ ਦੌਰਾਨ ਅਜੀਤ ਸਿੰਘ ਦੀ ਮੌਤ ਹੋ ਗਈ। ਪੁਲਸ ਨੇ ਸੁਖਵਿੰਦਰ ਸਿੰਘ ਦੇ ਬਿਆਨਾ 'ਤੇ ਟੈਂਕਰ ਦੇ ਅਣਪਛਾਤੇ ਚਾਲਕ ਵਿਰੁੱਧ ਪਰਚਾ ਦਰਜ ਕਰਕੇ ਉਸਦੀ ਭਾਲ ਸ਼ੁਰੂ ਕਰ ਦਿੱਤੀ।