ਮਮਤਾ ਦਾ ਕਾਲਾ ਕਾਰੋਬਾਰ: 10 ਸੂਬਿਆਂ ''ਚ ਵੇਚੇ 50 ਤੋਂ ਵੱਧ ਨਵਜੰਮੇ ਬੱਚੇ, ਮੁਕਤਸਰ ਦੀ ਨਰਸ ਤੇ ਉਸ ਦਾ ਪਤੀ ਫ਼ਰਾਰ

ਸ੍ਰੀ ਮੁਕਤਸਰ ਸਾਹਿਬ (ਪਵਨ ਤਨੇਜਾ, ਖੁਰਾਣਾ) : ਨਵਜੰਮੇ ਬੱਚਿਆਂ ਨੂੰ ਲੱਖਾਂ ਵਿੱਚ ਖਰੀਦਣ ਅਤੇ ਵੇਚਣ ਵਾਲੇ ਗਿਰੋਹ ਨੂੰ ਪਿਛਲੇ ਦਿਨੀਂ ਹਰਿਆਣਾ ਦੀ ਬਹਾਦੁਰਗੜ੍ਹ ਪੁਲਸ ਨੇ ਫੜਿਆ ਸੀ। ਇਸ ਗਿਰੋਹ ਦੇ ਸਰਗਨਾ ਸ੍ਰੀ ਮੁਕਤਸਰ ਸਾਹਿਬ ਦੇ ਜਲਾਲਾਬਾਦ ਰੋਡ ਨਿਵਾਸੀ ਪਰਗਟ ਸਿੰਘ ਉਰਫ਼ ਲਾਡੀ ਅਤੇ ਇਸ ਦੀ ਨਰਸ ਪਤਨੀ ਰਾਣੀ ਹਨ। 

ਜਾਣਕਾਰੀ ਮਿਲੀ ਹੈ ਕਿ ਰਾਣੀ ਅਤੇ ਉਸ ਦੀ ਫਰੀਦਕੋਟ ਵਿੱਚ ਰਹਿਣ ਵਾਲੀ ਭੈਣ ਨੇ ਇਹ ਸਾਰਾ ਨੈੱਟਵਰਕ ਚਲਾ ਰੱਖਿਆ ਸੀ ਜਿਸ ਵਿੱਚ ਲਾਡੀ ਵੀ ਪ੍ਰਮੁੱਖ ਤੌਰ ‘ਤੇ ਸ਼ਾਮਲ ਸੀ। ਇਹ ਲਗਭਗ ਪੰਜ ਸਾਲਾਂ ਤੋਂ ਨਵਜਾਤ ਬੱਚਿਆਂ ਨੂੰ ਖਰੀਦ ਕੇ ਅੱਗੇ ਵੇਚਣ ਦੇ ਧੰਦੇ ਵਿੱਚ ਸਰਗਰਮ ਸਨ। ਪਹਿਲਾਂ ਵੀ ਇਨ੍ਹਾਂ ਤਿੰਨਾਂ ’ਤੇ ਬੱਚਿਆਂ ਦੀ ਖਰੀਦੋ-ਫਰੋਖ਼ਤ ਕਰ ਵੇਚਣ ਦੇ ਮਾਮਲੇ ਵਿੱਚ ਕੇਸ ਚੱਲ ਰਿਹਾ ਹੈ। ਇਸ ਮਾਮਲੇ ਵਿੱਚ ਇਹ ਜੇਲ੍ਹ ਕੱਟ ਕੇ 6 ਮਹੀਨੇ ਪਹਿਲਾਂ ਹੀ ਰਿਹਾਅ ਹੋ ਕੇ ਆਏ ਸਨ। ਜੇਲ੍ਹ ਤੋਂ ਰਿਹਾਅ ਹੋਣ ਤੋਂ ਬਾਅਦ ਫਿਰ ਤੋਂ ਇਹ ਧੰਦਾ ਸ਼ੁਰੂ ਕਰ ਦਿੱਤਾ। ਬਹਾਦੁਰਗੜ੍ਹ ਪੁਲਸ ਦੁਆਰਾ ਸਾਥੀ ਫੜੇ ਜਾਣ ਤੋਂ ਬਾਅਦ ਪਤੀ ਪਤਨੀ ਘਰ ਨੂੰ ਤਾਲਾ ਲਗਾ ਕੇ ਫਰਾਰ ਹੋ ਚੁੱਕੇ ਹਨ ਅਤੇ ਮੁਹੱਲੇ ਵਿੱਚ ਸ੍ਰੀ ਹਜ਼ੂਰ ਸਾਹਿਬ ਮੱਥਾ ਟੇਕਣ ਦਾ ਬੋਲ ਕੇ ਗਏ ਹਨ। ਉੱਥੇ ਹੀ ਦੋ ਦਿਨ ਪਹਿਲਾਂ ਬਹਾਦੁਰਗੜ੍ਹ ਪੁਲਸ ਮੁਕਤਸਰ ਵਿੱਚ ਜਲਾਲਾਬਾਦ ਰੋਡ ‘ਤੇ ਗਲੀ ਨੰਬਰ 6 ਵਿੱਚ ਸਥਿਤ ਲਾਡੀ ਅਤੇ ਨਰਸ ਰਾਣੀ ਦੇ ਘਰ ਵਿੱਚ ਰੇਡ ਕਰਨ ਆਈ ਸੀ, ਪਰ ਪਤੀ ਪਤਨੀ ਇੱਕ ਹਫ਼ਤੇ ਤੋਂ ਫਰਾਰ ਦੱਸੇ ਜਾ ਰਹੇ ਹਨ।

ਇਹ ਵੀ ਪੜ੍ਹੋ : ਅਰਮੀਨੀਆ 'ਚ ਪੰਜਾਬ ਦੇ ਨੌਜਵਾਨ ਦੀ ਮੌਤ! ਮ੍ਰਿਤਕ ਦੇਹ ਵਾਪਸੀ ਲਈ ਪਰਿਵਾਰ ਲਾ ਰਿਹਾ ਗੁਹਾਰ

ਗੌਰਤਲਬ ਹੈ ਕਿ ਬਹਾਦੁਰਗੜ੍ਹ ਪੁਲਸ ਦੀ ਜਾਂਚ ਵਿੱਚ ਦੇਸ਼ ਦੇ 10 ਰਾਜਾਂ ਵਿੱਚ ਇਸ ਗਿਰੋਹ ਦੁਆਰਾ 50 ਤੋਂ ਵੱਧ ਬੱਚਿਆਂ ਨੂੰ ਵੇਚਣ ਦੇ ਮਾਮਲਿਆਂ ਦਾ ਪਤਾ ਚੱਲਿਆ ਹੈ। ਪੰਜਾਬ ਤੋਂ ਲੈ ਕੇ ਹਰਿਆਣਾ, ਦਿੱਲੀ, ਰਾਜਸਥਾਨ, ਚੰਡੀਗੜ੍ਹ, ਮਹਾਰਾਸ਼ਟਰ, ਮੱਧ ਪ੍ਰਦੇਸ਼, ਉੱਤਰ ਪ੍ਰਦੇਸ਼, ਝਾਰਖੰਡ, ਛੱਤੀਸਗੜ੍ਹ ਵਿੱਚ ਬੱਚਿਆਂ ਦੀ ਖਰੀਦੋ-ਫਰੋਖ਼ਤ ਦਾ ਇਹ ਕਾਲਾ ਕਾਰੋਬਾਰ ਗੋਦ ਦਿਵਾਉਣ ਦੇ ਨਾਮ ‘ਤੇ ਚੱਲ ਰਿਹਾ ਸੀ। ਮਾਮਲੇ ਵਿੱਚ ਅਜੇ ਤੱਕ 9 ਲੋਕਾਂ ਦੀ ਗ੍ਰਿਫ਼ਤਾਰੀ ਹੋ ਚੁੱਕੀ ਹੈ। ਪਤਾ ਚੱਲਿਆ ਹੈ ਕਿ ਨਰਸ ਰਾਣੀ ਦਾ ਲਾਡੀ ਨਾਲ ਦੂਜਾ ਵਿਆਹ ਹੈ। ਇਨ੍ਹਾਂ ਦੇ ਦੋ ਬੱਚੇ ਹਨ। ਲਾਡੀ ਦੇ ਕੋਲ ਟਰੱਕ ਹੈ, ਜਿਸ ਨੂੰ ਚਲਾਉਣ ਲਈ ਡਰਾਈਵਰ ਰੱਖਿਆ ਹੋਇਆ ਹੈ। ਰਾਣੀ ਪਹਿਲਾਂ ਕਿਸੇ ਪ੍ਰਾਈਵੇਟ ਹਸਪਤਾਲ ਵਿੱਚ ਨਰਸ ਦੇ ਰੂਪ ਵਿੱਚ ਕੰਮ ਕਰਦੀ ਸੀ। ਬਾਅਦ ਵਿੱਚ ਇਸ ਨੇ ਜਲਾਲਾਬਾਦ ਰੋਡ ‘ਤੇ ਇੱਕ ਕਲੀਨਿਕ ਖੋਲ੍ਹਿਆ ਅਤੇ ਪੰਜ ਸਾਲ ਪਹਿਲਾਂ 20 ਲੱਖ ਰੁਪਏ ਵਿੱਚ ਨਵਾਂ ਘਰ ਜਲਾਲਾਬਾਦ ਰੋਡ ਗਲੀ ਨੰਬਰ 6 ਵਿੱਚ ਖਰੀਦਿਆ ਅਤੇ ਫਿਰ ਉਸੇ ਵਿੱਚ ਕਲੀਨਿਕ ਚਲਾਉਣ ਲੱਗੀ। ਔਰਤਾਂ ਦੀ ਡਿਲੀਵਰੀ ਆਪਣੇ ਘਰ ਵਿੱਚ ਹੀ ਕਰਦੀ ਸੀ। ਇਹ ਗਿਰੋਹ ਡਿਜੀਟਲ ਪਲੇਟਫਾਰਮ ਤੋਂ ਲੈ ਕੇ ਹਸਪਤਾਲਾਂ ਤੱਕ ਆਪਣਾ ਜਾਲ ਵਿਛਾਏ ਹੋਏ ਸਨ। ਇੰਟਰਨੈੱਟ ‘ਤੇ ਬੇਔਲਾਦ ਪਤੀ ਪਤਨੀ ਦੇ ਰੂਪ ਵਿੱਚ ਆਪਣੇ ਗ੍ਰਾਹਕਾਂ ਨੂੰ ਤਲਾਸ਼ਦੇ ਸਨ। ਸੌਦਾ ਹੋਣ ਤੋਂ ਬਾਅਦ ਬੱਚੇ ਦੀ ਡਿਲੀਵਰੀ ਦਿੰਦੇ ਸਨ। ਪੈਸਾ ਕੈਸ਼ ਵਿੱਚ ਲੈਂਦੇ ਸਨ ਤਾਂ ਜੋ ਕੋਈ ਸਬੂਤ ਨਾ ਰਹੇ।

ਬਹਾਦੁਰਗੜ੍ਹ ਪੁਲਸ ਨੇ ਜੋ ਬੱਚਾ ਬਰਾਮਦ ਕੀਤਾ ਹੈ, ਉਹ ਫਰੀਦਕੋਟ ਦੇ ਪਿੰਡ ਮਚਾਕੀ ਕਲਾਂ ਤੋਂ ਖਰੀਦਿਆ ਗਿਆ ਸੀ। ਫਰੀਦਕੋਟ ਦੇ ਰਹਿਣ ਵਾਲੇ ਕੁਲਵਿੰਦਰ ਅਤੇ ਉਸ ਦੀ ਪਤਨੀ ਪਰਮਜੀਤ ਹਨ। ਇਨ੍ਹਾਂ ਨੇ ਬੱਚੇ ਨੂੰ ਵੇਚਿਆ ਸੀ। ਇਨ੍ਹਾਂ ਦੀ ਵੀ ਗ੍ਰਿਫ਼ਤਾਰੀ ਹੋ ਚੁੱਕੀ ਹੈ। ਮੁਲਜ਼ਮ ਪਤੀ ਪਤਨੀ ਦੇ ਕੋਲ ਪਹਿਲਾਂ ਤੋਂ ਦੋ ਬੱਚੇ ਹਨ। ਤੀਜਾ ਬੱਚਾ ਪੁੱਤਰ ਹੋਇਆ ਤਾਂ ਉਸ ਨੂੰ ਗਿਰੋਹ ਨੂੰ ਸਵਾ ਦੋ ਲੱਖ ਵਿੱਚ ਵੇਚ ਦਿੱਤਾ ਸੀ।

ਇਹ ਵੀ ਪੜ੍ਹੋ : ਈਰਾਨ ਸੰਕਟ ਵਿਚਾਲੇ 312 ਭਾਰਤੀ ਮਛੇਰਿਆਂ ਦੀ ਸੁਰੱਖਿਅਤ ਵਤਨ ਵਾਪਸੀ, ਅਰਮੀਨੀਆ ਬਣਿਆ 'ਸੇਫ ਕਾਰੀਡੋਰ'

ਇਹ ਕੇਸ ਬਹਾਦੁਰਗੜ੍ਹ ਪੁਲਸ ਦੇਖ ਰਹੀ ਹੈ, ਅਸੀਂ ਸਹਿਯੋਗ ਕੀਤਾ ਹੈ

ਸਥਾਨਕ ਪੁਲਸ ਦਾ ਕਹਿਣਾ ਹੈ ਕਿ ਇਹ ਮਾਮਲਾ ਬਹਾਦੁਰਗੜ੍ਹ ਪੁਲਸ ਨਾਲ ਜੁੜਿਆ ਹੋਇਆ ਹੈ। ਬਹਾਦੁਰਗੜ੍ਹ ਪੁਲਸ ਸ੍ਰੀ ਮੁਕਤਸਰ ਸਾਹਿਬ ਵਿੱਚ ਲਾਡੀ ਦੇ ਘਰ ‘ਤੇ ਆਈ ਸੀ। ਲੋਕਲ ਪੁਲਸ ਨੇ ਉਨ੍ਹਾਂ ਦਾ ਸਹਿਯੋਗ ਕੀਤਾ ਹੈ। ਇਸ ਤੋਂ ਇਲਾਵਾ ਇਸ ਬਾਰੇ ਉਨ੍ਹਾਂ ਕੋਲ ਹੋਰ ਕੋਈ ਜਾਣਕਾਰੀ ਨਹੀਂ ਹੈ। ਇਹ ਕੇਸ ਬਹਾਦੁਰਗੜ੍ਹ ਪੁਲਸ ਹੀ ਦੇਖ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8