ਕਹਿਰ, ਮੌਤ ਆਪਣਾ ਸਮਾਂ ਤੇ ਸਥਾਨ ਨਹੀਂ ਬਦਲਦੀ, ਸੱਚ ਹੋਇਆ ਕਥਨ

ਫ਼ਰੀਦਕੋਟ (ਜਗਦੀਸ਼) : ਮੌਤ ਦੇ ਕਹਿਰ ਤੋਂ ਕਿਸੇ ਦਾ ਵੀ ਬਚਨਾਂ ਅਸੰਭਵ ਹੈ ਕਿਉਂਕਿ ਮੌਤ ਆਪਣਾ ਸਮਾਂ ਤੇ ਸਥਾਨ ਕਦੇ ਨਹੀਂ ਬਦਲਦੀ, ਇਨ੍ਹਾਂ ਕਥਨਾਂ ਦੀ ਸੱਚਾਈ ਉਸ ਵੇਲੇ ਪ੍ਰਤੱਖ ਹੋ ਗਈ ਜਦੋਂ ਜ਼ਿਲ੍ਹੇ ਦੇ ਪਿੰਡ ਰੋੜੀ ਕਪੂਰਾ ਵਿਖੇ ਆਪਣੇ ਮਾਸੜ ਦੇ ਭੋਗ ’ਤੇ ਆਈ ਇਕ ਔਰਤ ਉਸ ਵੇਲੇ ਮੌਤ ਦੇ ਮੂੰਹ ਵਿਚ ਚਲੀ ਗਈ ਜਦੋਂ ਉਹ ਭੋਗ ਉਪਰੰਤ ਆਪਣੇ ਪਿੰਡ ਜਾਣ ਲਈ ਬੱਸ ਅੱਡੇ ’ਤੇ ਜਾ ਰਹੀ ਸੀ। ਇਸ ਮਾਮਲੇ ਵਿਚ ਪੁਲਸ ਵੱਲੋਂ ਹਰਮੇਲ ਸਿੰਘ ਪੁੱਤਰ ਨੰਦ ਸਿੰਘ ਵਾਸੀ ਪਿੰਡ ਕੋਟਲੀ ਅਬਲੂ ਦੇ ਬਿਆਨਾਂ ’ਤੇ ਮੁਕੱਦਮਾ ਦਰਜ ਕੀਤਾ ਹੈ। ਹਰਮੇਲ ਸਿੰਘ ਨੇ ਦੱਸਿਆ ਕਿ ਉਹ ਖੇਤੀ ਦਾ ਕੰਮ ਕਰਦਾ ਹੈ ਅਤੇ ਉਸਦੀ ਭੈਣ ਸਰਬਜੀਤ ਕੌਰ ਆਪਣੇ ਮਾਸੜ ਦੇ ਮਰਗ ਦੇ ਭੋਗ ’ਤੇ ਪਿੰਡ ਰੋੜੀ ਕਪੂਰਾ ਵਿਖੇ ਆਈ ਹੋਈ ਸੀ। ਭੋਗ ਉਪਰੰਤ ਜਦ ਸਰਬਜੀਤ ਕੌਰ ਆਪਣੇ ਸਹੁਰੇ ਘਰ ਪਿੰਡ ਪੂਹਲਾ (ਬਠਿੰਡਾ) ਨੂੰ ਜਾਣ ਲਈ ਬੱਸ ਅੱਡੇ ’ਤੇ ਪੁੱਜੀ ਤਾਂ ਬੱਸ ਅੱਡੇ ਦੇ ਗੇਟ ਕੋਲ ਇਕ ਅਲਟੋ ਕਾਰ ਤੇਜ ਰਫਤਾਰ ਵਿਚ ਆਈ ਅਤੇ ਗੱਡੀ ਚਲਾ ਰਹੇ ਵਿਅਕਤੀ ਨੇ ਗੇਟ ’ਤੇ ਲੱਗੇ ਗਾਡਰਾਂ ਵਿਚ ਜ਼ੋਰ ਦੀ ਟੱਕਰ ਮਾਰ ਦਿੱਤੀ ਜਿਸ’ਤੇ ਇਕ ਗਾਡਰ ਬੁੜਕ ਕੇ ਸਰਬਜੀਤ ਕੌਰ ਦੇ ਸਿਰ ਵਿਚ ਜਾ ਵੱਜਾ। 

ਇਸ ਦੌਰਾਨ ਜਦ ਸਰਬਜੀਤ ਕੌਰ ਨੂੰ ਇਲਾਜ ਲਈ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਤਾਂ ਇਲਾਜ ਦੌਰਾਨ ਸਰਬਜੀਤ ਕੌਰ ਦੀ ਮੌਤ ਹੋ ਗਈ। ਇਸ ਘਟਨਾਂ ’ਤੇ ਮ੍ਰਿਤਕ ਸਰਬਜੀਤ ਕੌਰ ਦੇ ਭਰਾ ਹਰਮੇਲ ਸਿੰਘ ਦੀ ਸ਼ਨਾਖਤ ’ਤੇ ਕਾਰ ਚਾਲਕ ਲਖਵਿੰਦਰ ਸਿੰਘ ਵਾਸੀ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਥਾਣਾ ਬਾਜਾਖਾਨਾਂ ’ਤੇ ਮੁਕੱਦਮਾ ਦਰਜ ਕਰ ਲਿਆ ਹੈ।