ਸਵਾਦ ਦੇ ਨਾਲ ਸਿਹਤ ਵੀ! ਘਰ 'ਚ ਆਸਾਨ ਤਰੀਕੇ ਨਾਲ ਬਣਾਓ ਬੇਸਨ ਦਾ ਚੀਲਾ

ਵੈੱਬ ਡੈਸਕ - ਅੱਜ-ਕੱਲ੍ਹ ਦੀ ਭੱਜ-ਦੌੜ ਭਰੀ ਜ਼ਿੰਦਗੀ 'ਚ ਹਰ ਕੋਈ ਅਜਿਹਾ ਨਾਸ਼ਤਾ ਚਾਹੁੰਦਾ ਹੈ ਜੋ ਜਲਦੀ ਬਣ ਜਾਵੇ ਅਤੇ ਸਿਹਤਮੰਦ ਵੀ ਹੋਵੇ। ਜੇਕਰ ਤੁਸੀਂ ਵੀ ਸਵੇਰੇ ਦਫ਼ਤਰ ਜਾਂ ਬੱਚਿਆਂ ਦੇ ਟਿਫਿਨ ਲਈ ਕਿਸੇ ਪੌਸ਼ਟਿਕ ਵਿਕਲਪ ਦੀ ਭਾਲ ਵਿੱਚ ਹੋ, ਤਾਂ 'ਬੇਸਨ ਦਾ ਚੀਲਾ' ਸਭ ਤੋਂ ਵਧੀਆ ਚੋਣ ਹੈ। ਇਹ ਨਾ ਸਿਰਫ਼ ਪ੍ਰੋਟੀਨ ਨਾਲ ਭਰਪੂਰ ਹੁੰਦਾ ਹੈ, ਸਗੋਂ ਖਾਣ 'ਚ ਵੀ ਬਹੁਤ ਸਵਾਦਿਸ਼ਟ ਹੁੰਦਾ ਹੈ। ਇੱਥੇ ਜਾਣੋ ਘਰ ਵਿੱਚ ਆਸਾਨ ਤਰੀਕੇ ਨਾਲ ਨਰਮ ਅਤੇ ਕੁਰਕੁਰਾ ਬੇਸਨ ਦਾ ਚੀਲਾ ਬਣਾਉਣ ਦੀ ਪੂਰੀ ਵਿਧੀ:

ਸਮੱਗਰੀ :-

ਬੇਸਨ - 1 ਕੱਪ
ਸਬਜ਼ੀਆਂ : ਬਾਰੀਕ ਕੱਟਿਆ ਪਿਆਜ਼, ਟਮਾਟਰ, ਸ਼ਿਮਲਾ ਮਿਰਚ ਅਤੇ ਹਰਾ ਧਨੀਆ
ਮਸਾਲੇ : ਨਮਕ (ਸਵਾਦ ਅਨੁਸਾਰ), ਲਾਲ ਮਿਰਚ, ਹਲਦੀ, ਅਜਵਾਇਣ ਅਤੇ ਚੁਟਕੀ ਭਰ ਹਿੰਗ
ਹੋਰ : ਹਰੀ ਮਿਰਚ (ਬਾਰੀਕ ਕੱਟੀ ਹੋਈ), ਪਾਣੀ ਅਤੇ ਤੇਲ/ਘਿਓ

ਬਣਾਉਣ ਦਾ ਆਸਾਨ ਤਰੀਕਾ 

- ਸਭ ਤੋਂ ਪਹਿਲਾਂ ਇਕ ਵੱਡੇ ਭਾਂਡੇ 'ਚ ਬੇਸਨ ਲਓ। ਇਸ ਵਿੱਚ ਹੌਲੀ-ਹੌਲੀ ਪਾਣੀ ਪਾ ਕੇ ਇਕ ਗਾੜ੍ਹਾ ਅਤੇ ਮੁਲਾਇਮ ਘੋਲ ਤਿਆਰ ਕਰੋ। ਧਿਆਨ ਰਹੇ ਕਿ ਘੋਲ 'ਚ ਗੰਢਾਂ ਨਾ ਰਹਿਣ।
- ਹੁਣ ਇਸ ਘੋਲ ਵਿੱਚ ਕੱਟੀਆਂ ਹੋਈਆਂ ਸਬਜ਼ੀਆਂ, ਅਜਵਾਇਣ, ਹਿੰਗ, ਨਮਕ ਅਤੇ ਬਾਕੀ ਮਸਾਲੇ ਪਾ ਕੇ ਚੰਗੀ ਤਰ੍ਹਾਂ ਮਿਲਾ ਲਓ।
- ਇਕ ਨਾਨ-ਸਟਿਕ ਤਵਾ ਗਰਮ ਕਰੋ ਅਤੇ ਉਸ 'ਤੇ ਥੋੜ੍ਹਾ ਜਿਹਾ ਤੇਲ ਜਾਂ ਘਿਓ ਲਗਾ ਕੇ ਚਾਰੇ ਪਾਸੇ ਫੈਲਾ ਦਿਓ।
- ਤਵੇ ਦੇ ਵਿਚਕਾਰ ਇਕ ਕੜਛੀ ਭਰ ਕੇ ਬੇਸਨ ਦਾ ਘੋਲ ਪਾਓ ਅਤੇ ਉਸ ਨੂੰ ਗੋਲ ਆਕਾਰ ਵਿਚ ਹੌਲੀ-ਹੌਲੀ ਫੈਲਾਓ।
- ਚੀਲੇ ਦੇ ਕਿਨਾਰਿਆਂ 'ਤੇ ਥੋੜ੍ਹਾ ਤੇਲ ਪਾਓ। ਜਦੋਂ ਇਕ ਪਾਸਾ ਹਲਕਾ ਸੁਨਹਿਰੀ ਹੋ ਜਾਵੇ, ਤਾਂ ਇਸ ਨੂੰ ਪਲਟ ਦਿਓ ਅਤੇ ਦੂਜੇ ਪਾਸੇ ਤੋਂ ਵੀ ਚੰਗੀ ਤਰ੍ਹਾਂ ਸੇਕ ਲਓ।
- ਤੁਹਾਡਾ ਸਵਾਦਿਸ਼ਟ ਬੇਸਨ ਦਾ ਚੀਲਾ ਤਿਆਰ ਹੈ। ਇਸ ਨੂੰ ਹਰੀ ਚਟਨੀ, ਦਹੀਂ ਜਾਂ ਟਮਾਟੋ ਕੈਚੱਪ ਨਾਲ ਗਰਮਾ-ਗਰਮ ਸਰਵ ਕਰੋ।

 ਖਾਸ ਟਿਪਸ :-

- ਚੀਲੇ ਨੂੰ ਜ਼ਿਆਦਾ ਕੁਰਕੁਰਾ ਬਣਾਉਣ ਲਈ ਬੇਸਨ ਵਿੱਚ 2 ਚਮਚ ਸੂਜੀ ਜਾਂ ਚੌਲਾਂ ਦਾ ਆਟਾ ਮਿਲਾਇਆ ਜਾ ਸਕਦਾ ਹੈ।
- ਜੇਕਰ ਤੁਸੀਂ ਡਾਇਟ 'ਤੇ ਹੋ, ਤਾਂ ਇਸ ਨੂੰ ਬਹੁਤ ਘੱਟ ਤੇਲ 'ਚ ਜਾਂ ਬਿਨਾਂ ਤੇਲ ਦੇ ਵੀ ਬਣਾ ਸਕਦੇ ਹੋ।
- ਸਬਜ਼ੀਆਂ ਆਪਣੀ ਪਸੰਦ ਅਨੁਸਾਰ ਜਿਵੇਂ ਗਾਜਰ ਜਾਂ ਪਨੀਰ ਵੀ ਕੱਦੂਕਸ ਕਰਕੇ ਪਾ ਸਕਦੇ ਹੋ।