ਭਾਰਤੀਆਂ ਦਾ ਮਨਪਸੰਦ ਫੂਡ ਬਣਿਆ ''ਮੋਗ-ਮੋਗ'' ! ਦੇਸ਼ ਦੀ ਹਰ ਗਲੀ ''ਚ ਮਿਲਦੈ ਇਹ ਫਾਸਟ ਫੂਡ

ਨੈਸ਼ਨਲ ਡੈਸਕ : ਅੱਜ ਦੇ ਸਮੇਂ 'ਚ ਸ਼ਾਮ ਹੁੰਦੇ ਹੀ ਭਾਰਤ ਦੇ ਹਰ ਨੁੱਕੜ ਤੇ ਗਲੀ ਵਿੱਚ ਮੋਮੋਜ਼ ਦੇ ਸਟਾਲਾਂ 'ਤੇ ਭੀੜ ਦੇਖਣ ਨੂੰ ਮਿਲਦੀ ਹੈ। ਬਹੁਤ ਸਾਰੇ ਲੋਕਾਂ ਨੂੰ ਲੱਗਦਾ ਹੋਵੇਗਾ ਕਿ ਇਹ ਕੋਈ ਆਧੁਨਿਕ ਫਾਸਟ ਫੂਡ ਹੈ, ਪਰ ਅਸਲ ਵਿੱਚ ਇਸ ਦਾ ਇਤਿਹਾਸ 600 ਸਾਲ ਪੁਰਾਣਾ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਜਿਸ ਨੂੰ ਅੱਜ ਅਸੀਂ ਸਵਾਦ ਲਈ ਖਾਂਦੇ ਹਾਂ, ਉਸਦੀ ਸ਼ੁਰੂਆਤ ਅੱਤ ਦੀ ਠੰਡ ਤੇ ਭੁੱਖਮਰੀ ਵਰਗੇ ਮੁਸ਼ਕਲ ਹਾਲਾਤਾਂ 'ਚ ਜ਼ਿੰਦਾ ਰਹਿਣ ਦੀ ਮਜ਼ਬੂਰੀ ਕਾਰਨ ਹੋਇਆ ਸੀ।

ਤਿੱਬਤ 'ਚ ਹੋਈ ਸੀ ਸ਼ੁਰੂਆਤ
ਮੋਮੋਜ਼ ਦੀ ਸ਼ੁਰੂਆਤ 14ਵੀਂ-15ਵੀਂ ਸਦੀ ਦੇ ਆਸ-ਪਾਸ ਤਿੱਬਤ 'ਚ ਹੋਈ ਸੀ। ਉਸ ਸਮੇਂ ਤਿੱਬਤ ਦੇ ਬਹੁਤ ਜ਼ਿਆਦਾ ਠੰਡੇ ਇਲਾਕਿਆਂ ਵਿੱਚ ਖੇਤੀਬਾੜੀ ਕਰਨਾ ਅਸੰਭਵ ਸੀ ਤੇ ਖਾਣ-ਪੀਣ ਦੇ ਸਾਧਨ ਬਹੁਤ ਘੱਟ ਸਨ। ਅਜਿਹੇ ਵਿੱਚ ਲੋਕਾਂ ਨੇ ਮੈਦੇ ਦੀ ਇੱਕ ਪਤਲੀ ਪਰਤ ਦੇ ਅੰਦਰ ਮੀਟ ਨੂੰ ਭਰ ਕੇ ਭਾਫ਼ ਵਿੱਚ ਪਕਾਉਣ ਦੀ ਤਕਨੀਕ ਕੱਢੀ, ਤਾਂ ਜੋ ਘੱਟ ਸਾਧਨਾਂ ਵਿੱਚ ਜ਼ਿਆਦਾ ਲੋਕਾਂ ਦਾ ਪੇਟ ਭਰਿਆ ਜਾ ਸਕੇ ਅਤੇ ਸਰੀਰ ਨੂੰ ਗਰਮੀ ਮਿਲ ਸਕੇ। ਤਿੱਬਤੀ ਭਾਸ਼ਾ ਵਿੱਚ ਇਸ ਨੂੰ 'ਮੋਗ-ਮੋਗ' (Mog-Mog) ਕਿਹਾ ਜਾਂਦਾ ਸੀ।

ਨੇਪਾਲੀ ਵਪਾਰੀਆਂ ਨੇ ਬਦਲੀ ਤਕਦੀਰ
ਮੋਮੋਜ਼ ਨੂੰ ਤਿੱਬਤ ਦੀਆਂ ਸਰਹੱਦਾਂ ਤੋਂ ਬਾਹਰ ਕੱਢਣ ਦਾ ਸਿਹਰਾ ਨੇਪਾਲ ਦੇ ਨਿਵਾਰੀ ਵਪਾਰੀਆਂ ਨੂੰ ਜਾਂਦਾ ਹੈ। 1960 ਦੇ ਦਹਾਕੇ ਵਿੱਚ ਜਦੋਂ ਇਹ ਵਪਾਰੀ ਕਾਰੋਬਾਰ ਦੇ ਸਿਲਸਿਲੇ ਵਿੱਚ ਤਿੱਬਤ ਜਾਂਦੇ ਸਨ, ਤਾਂ ਉਹ ਇਸ ਡਿਸ਼ ਦੇ ਮੁਰੀਦ ਹੋ ਗਏ। ਉਹ ਇਸ ਰੈਸਿਪੀ ਨੂੰ ਨੇਪਾਲ ਲੈ ਆਏ, ਜਿੱਥੇ ਇਸ ਨੂੰ 'ਮਾਮੋ' (Mamo) ਕਿਹਾ ਜਾਣ ਲੱਗਾ ਅਤੇ ਨੇਪਾਲੀ ਮਸਾਲਿਆਂ ਦੇ ਨਾਲ ਇਸ ਦਾ ਸਵਾਦ ਹੋਰ ਵੀ ਨਿੱਖਰ ਗਿਆ।

ਭਾਰਤ 'ਚ ਕਿਵੇਂ ਹੋਈ ਐਂਟਰੀ? 
ਭਾਰਤ 'ਚ ਮੋਮੋਜ਼ ਦੀ ਐਂਟਰੀ ਮੁੱਖ ਰੂਪ ਵਿੱਚ 1959 ਤੋਂ ਬਾਅਦ ਹੋਈ, ਜਦੋਂ ਵੱਡੀ ਗਿਣਤੀ ਵਿੱਚ ਤਿੱਬਤੀ ਸ਼ਰਨਾਰਥੀ ਦਲਾਈ ਲਾਮਾ ਦੇ ਨਾਲ ਭਾਰਤ ਆਏ। ਉਨ੍ਹਾਂ ਨੇ ਧਰਮਸ਼ਾਲਾ, ਦਾਰਜੀਲਿੰਗ, ਸਿੱਕਮ ਅਤੇ ਦਿੱਲੀ ਵਰਗੇ ਇਲਾਕਿਆਂ ਵਿੱਚ ਆਪਣੀ ਵਿਰਾਸਤ ਦੇ ਰੂਪ ਵਿੱਚ ਮੋਮੋਜ਼ ਨੂੰ ਜ਼ਿੰਦਾ ਰੱਖਿਆ। 90 ਦੇ ਦਹਾਕੇ ਦੇ ਅੰਤ ਤੱਕ ਇਹ ਦਿੱਲੀ ਦੀਆਂ ਗਲੀਆਂ ਵਿੱਚ ਇੰਨਾ ਮਸ਼ਹੂਰ ਹੋ ਗਿਆ ਕਿ ਅੱਜ ਇਹ ਸਮੋਸੇ ਨੂੰ ਟੱਕਰ ਦੇਣ ਵਾਲਾ ਸਭ ਤੋਂ ਵੱਡਾ ਸਟ੍ਰੀਟ ਫੂਡ ਬਣ ਚੁੱਕਾ ਹੈ। ਅੱਜ ਭਾਰਤ ਵਿੱਚ ਮੋਮੋਜ਼ ਦੇ ਕਈ ਰੂਪ ਮਿਲਦੇ ਹਨ, ਜਿਵੇਂ ਕਿ ਤੰਦੂਰੀ, ਫਰਾਈਡ, ਪਨੀਰ ਅਤੇ ਸੋਇਆ ਮੋਮੋਜ਼। ਜੋ ਖਾਣਾ ਕਦੇ ਮਜ਼ਬੂਰੀ ਵਿੱਚ ਸ਼ੁਰੂ ਹੋਇਆ ਸੀ, ਉਹ ਅੱਜ ਨੌਜਵਾਨਾਂ ਦਾ ਸਭ ਤੋਂ ਪਸੰਦੀਦਾ 'ਕੰਫਰਟ ਫੂਡ' ਬਣ ਗਿਆ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e