ਵੈੱਬ ਡੈਸਕ - ਚਾਈਨੀਜ਼ ਫੂਡ ਦਾ ਨਾਂ ਸੁਣਦੇ ਹੀ ਮੂੰਹ 'ਚ ਪਾਣੀ ਆ ਜਾਂਦਾ ਹੈ ਅਤੇ ਜਦੋਂ ਗੱਲ 'ਵੈੱਜ ਮਨਚੂਰੀਅਨ' ਦੀ ਹੋਵੇ, ਤਾਂ ਬੱਚੇ ਹੋਣ ਜਾਂ ਵੱਡੇ, ਸਭ ਦੀ ਪਹਿਲੀ ਪਸੰਦ ਇਹੀ ਹੁੰਦੀ ਹੈ। ਅਕਸਰ ਲੋਕ ਸ਼ਿਕਾਇਤ ਕਰਦੇ ਹਨ ਕਿ ਘਰ 'ਚ ਬਾਜ਼ਾਰ ਵਰਗਾ ਸੁਆਦ ਜਾਂ ਉਹ ਨਰਮ ਮਨਚੂਰੀਅਨ ਬਾਲਸ ਨਹੀਂ ਬਣਦੀਆਂ। ਅੱਜ ਅਸੀਂ ਤੁਹਾਡੇ ਨਾਲ ਸਾਂਝਾ ਕਰ ਰਹੇ ਹਾਂ ਰੈਸਟੋਰੈਂਟ ਸਟਾਈਲ ਮਨਚੂਰੀਅਨ ਬਣਾਉਣ ਦਾ 'ਸੀਕਰੇਟ ਤਰੀਕਾ'।

ਜ਼ਰੂਰੀ ਸਮੱਗਰੀ : -

ਮਨਚੂਰੀਅਨ ਬਾਲਸ ਲਈ
- 2 ਕੱਪ ਬਾਰੀਕ ਕੱਟੀ ਪੱਤਾ ਗੋਭੀ, 1 ਗਾਜਰ (ਕੱਦੂਕਸ ਕੀਤੀ), 1/2 ਸ਼ਿਮਲਾ ਮਿਰਚ, 3 ਚਮਚ ਮੈਦਾ, 2 ਚਮਚ ਕੌਰਨ ਫਲੋਰ, 1 ਚਮਚ ਅਦਰਕ-ਲਸਣ ਪੇਸਟ, ਨਮਕ ਅਤੇ ਕਾਲੀ ਮਿਰਚ।

ਗ੍ਰੇਵੀ ਲਈ
- ਬਾਰੀਕ ਕੱਟਿਆ ਲਸਣ (ਜ਼ਿਆਦਾ ਮਾਤਰਾ 'ਚ), ਅਦਰਕ, ਹਰੀਆਂ ਮਿਰਚਾਂ, ਪਿਆਜ਼, ਸ਼ਿਮਲਾ ਮਿਰਚ, ਸੋਇਆ ਸੌਸ, ਚਿਲੀ ਸੌਸ, ਟਮਾਟਰ ਕੈਚਅੱਪ, ਸਿਰਕਾ ਅਤੇ ਹਰਾ ਪਿਆਜ਼।

ਬਣਾਉਣ ਦੀ ਵਿਧੀ :-

ਮਨਚੂਰੀਅਨ ਬਾਲਸ ਕਿਵੇਂ ਬਣਾਈਏ?
ਸਭ ਤੋਂ ਪਹਿਲਾਂ ਇਕ ਭਾਂਡੇ 'ਚ ਪੱਤਾ ਗੋਭੀ, ਗਾਜਰ ਅਤੇ ਸ਼ਿਮਲਾ ਮਿਰਚ ਲਓ। ਇਸ ਵਿਚ ਮੈਦਾ, ਕੌਰਨ ਫਲੋਰ, ਅਦਰਕ-ਲਸਣ ਪੇਸਟ, ਨਮਕ ਤੇ ਕਾਲੀ ਮਿਰਚ ਮਿਲਾ ਕੇ ਇਕ ਮਿਸ਼ਰਣ ਤਿਆਰ ਕਰੋ। ਇਸ ਵਿਚ ਪਾਣੀ ਨਾ ਪਾਓ, ਸਬਜ਼ੀਆਂ ਦਾ ਆਪਣਾ ਪਾਣੀ ਹੀ ਕਾਫੀ ਹੁੰਦਾ ਹੈ। ਹੁਣ ਛੋਟੀਆਂ-ਛੋਟੀਆਂ ਬਾਲਸ ਬਣਾ ਕੇ ਤੇਲ ਵਿਚ ਸੁਨਹਿਰੀ ਹੋਣ ਤੱਕ ਫਰਾਈ ਕਰ ਲਓ।

ਚਟਪਟੀ ਗ੍ਰੇਵੀ ਤਿਆਰ ਕਰਨਾ
ਇਕ ਪੈਨ 'ਚ 2 ਚਮਚ ਤੇਲ ਗਰਮ ਕਰੋ। ਇਸ 'ਚ ਬਾਰੀਕ ਕੱਟਿਆ ਲਸਣ, ਅਦਰਕ ਅਤੇ ਹਰੀ ਮਿਰਚ ਪਾ ਕੇ ਤੇਜ਼ ਅੱਗ 'ਤੇ ਭੁੰਨੋ। ਹੁਣ ਪਿਆਜ਼ ਅਤੇ ਸ਼ਿਮਲਾ ਮਿਰਚ ਪਾ ਕੇ ਹਲਕਾ ਪਕਾਓ (ਜ਼ਿਆਦਾ ਨਰਮ ਨਾ ਕਰੋ)।

ਸੌਸ ਦਾ ਤੜਕਾ
ਇਸ 'ਚ 2 ਚਮਚ ਸੋਇਆ ਸੌਸ, 1 ਚਮਚ ਚਿਲੀ ਸੌਸ ਅਤੇ 2 ਚਮਚ ਟਮਾਟਰ ਕੈਚਅੱਪ ਪਾਓ। ਇਕ ਕੌਲੀ 'ਚ 1 ਚਮਚ ਕੌਰਨ ਫਲੋਰ ਨੂੰ ਪਾਣੀ 'ਚ ਘੋਲ ਕੇ ਗ੍ਰੇਵੀ 'ਚ ਪਾ ਦਿਓ। ਜਦੋਂ ਗ੍ਰੇਵੀ ਗਾੜ੍ਹੀ ਹੋ ਜਾਵੇ, ਤਾਂ ਇਸ ਵਿੱਚ ਤਲੀਆਂ ਹੋਈਆਂ ਬਾਲਸ ਪਾ ਕੇ 1 ਮਿੰਟ ਲਈ ਪਕਾਓ।

ਸਰਵਿੰਗ
ਉੱਪਰੋਂ ਬਾਰੀਕ ਕੱਟਿਆ ਹਰਾ ਪਿਆਜ਼ ਪਾ ਕੇ ਗਰਮਾ-ਗਰਮ ਨੂਡਲਜ਼ ਜਾਂ ਫਰਾਈਡ ਰਾਈਸ ਨਾਲ ਸਰਵ ਕਰੋ।

ਰੈਸਟੋਰੈਂਟ ਵਰਗਾ ਸੁਆਦ ਪਾਉਣ ਲਈ ਖ਼ਾਸ ਟਿਪਸ :-

ਲਸਣ ਦੀ ਵਰਤੋਂ
- ਮਨਚੂਰੀਅਨ 'ਚ ਲਸਣ ਦਾ ਸੁਆਦ ਸਭ ਤੋਂ ਅਹਿਮ ਹੁੰਦਾ ਹੈ, ਇਸ ਲਈ ਇਸ ਨੂੰ ਬਾਰੀਕ ਕੱਟ ਕੇ ਚੰਗੀ ਮਾਤਰਾ 'ਚ ਪਾਓ।

ਤੇਜ਼ ਅੱਗ
- ਚਾਈਨੀਜ਼ ਫੂਡ ਹਮੇਸ਼ਾ ਤੇਜ਼ ਅੱਗ 'ਤੇ ਬਣਾਓ, ਇਸ ਨਾਲ ਸਬਜ਼ੀਆਂ ਦਾ ਕਰੰਚ ਬਣਿਆ ਰਹਿੰਦਾ ਹੈ।

ਨਰਮ ਬਾਲਸ
- ਜੇਕਰ ਬਾਲਸ ਸਖ਼ਤ ਬਣਦੀਆਂ ਹਨ, ਤਾਂ ਮੈਦੇ ਦੀ ਮਾਤਰਾ ਘੱਟ ਰੱਖੋ।