ਬਿਊਟੀ ਡੈਸਕ - ਅੱਜ-ਕੱਲ੍ਹ ਦੇ ਖ਼ਰਾਬ ਲਾਈਫਸਟਾਈਲ, ਪ੍ਰਦੂਸ਼ਣ ਅਤੇ ਕੈਮੀਕਲ ਵਾਲੇ ਸ਼ੈਂਪੂਆਂ ਦੀ ਵਰਤੋਂ ਕਾਰਨ ਵਾਲਾਂ ਦਾ ਝੜਨਾ, ਡੈਂਡਰਫ (ਸਿੱਕਰੀ) ਅਤੇ ਰੁੱਖਾਪਨ ਇਕ ਆਮ ਸਮੱਸਿਆ ਬਣ ਚੁੱਕੀ ਹੈ। ਲੋਕ ਵਾਲਾਂ ਨੂੰ ਸੁੰਦਰ ਬਣਾਉਣ ਲਈ ਮਹਿੰਗੇ ਹੇਅਰ ਸਪਾ ਅਤੇ ਟ੍ਰੀਟਮੈਂਟਸ ਕਰਵਾਉਂਦੇ ਹਨ, ਜੋ ਕਈ ਵਾਰ ਫਾਇਦੇ ਦੀ ਜਗ੍ਹਾ ਨੁਕਸਾਨ ਪਹੁੰਚਾ ਦਿੰਦੇ ਹਨ। ਅਜਿਹੀ ਸਥਿਤੀ 'ਚ, ਤੁਹਾਡੇ ਘਰ ਦੇ ਵਿਹੜੇ 'ਚ ਲੱਗਿਆ 'ਐਲੋਵੇਰਾ' ਤੁਹਾਡੇ ਵਾਲਾਂ ਦੀ ਕਿਸਮਤ ਬਦਲ ਸਕਦਾ ਹੈ।

ਬਿਊਟੀ ਅਤੇ ਹੇਅਰ ਐਕਸਪਰਟਸ ਮੁਤਾਬਕ ਐਲੋਵੇਰਾ 'ਚ ਭਰਪੂਰ ਮਾਤਰਾ 'ਚ ਵਿਟਾਮਿਨ A, C, E ਅਤੇ ਐਂਟੀ-ਬੈਕਟੀਰੀਅਲ ਗੁਣ ਹੁੰਦੇ ਹਨ, ਜੋ ਵਾਲਾਂ ਨੂੰ ਜੜ੍ਹੋਂ ਮਜ਼ਬੂਤ ਕਰਦੇ ਹਨ। ਆਓ ਜਾਣਦੇ ਹਾਂ ਵਾਲਾਂ 'ਚ ਐਲੋਵੇਰਾ ਲਗਾਉਣ ਦੇ 5 ਬੇਮਿਸਾਲ ਫਾਇਦੇ:

ਵਾਲਾਂ ਦਾ ਝੜਨਾ ਹੁੰਦਾ ਹੈ ਬੰਦ
ਐਲੋਵੇਰਾ ਜੈੱਲ 'ਚ ਅਜਿਹੇ ਐਨਜ਼ਾਈਮ ਹੁੰਦੇ ਹਨ ਜੋ ਸਿਰ ਦੀ ਚਮੜੀ ਦੀ ਮਰੀ ਹੋਈ ਚਮੜੀ ਨੂੰ ਸਾਫ਼ ਕਰਦੇ ਹਨ ਅਤੇ ਨਵੇਂ ਵਾਲ ਉਗਾਉਣ 'ਚ ਮਦਦ ਕਰਦੇ ਹਨ। ਇਸ ਨੂੰ ਨਿਯਮਿਤ ਰੂਪ 'ਚ ਲਗਾਉਣ ਨਾਲ ਵਾਲਾਂ ਦਾ ਟੁੱਟਣਾ-ਝੜਨਾ ਬਹੁਤ ਜਲਦੀ ਰੁਕ ਜਾਂਦਾ ਹੈ।

ਡੈਂਡਰਫ (ਸਿੱਕਰੀ) ਦਾ ਪੱਕਾ ਇਲਾਜ
ਗਰਮੀ ਅਤੇ ਪਸੀਨੇ ਕਾਰਨ ਸਿਰ 'ਚ ਬੈਕਟੀਰੀਆ ਅਤੇ ਫੰਗਸ ਜਮ੍ਹਾਂ ਹੋ ਜਾਂਦੀ ਹੈ, ਜੋ ਡੈਂਡਰਫ ਦਾ ਕਾਰਨ ਬਣਦੀ ਹੈ। ਐਲੋਵੇਰਾ 'ਚ ਐਂਟੀ-ਫੰਗਲ ਗੁਣ ਹੁੰਦੇ ਹਨ। ਜੇਕਰ ਐਲੋਵੇਰਾ ਜੈੱਲ 'ਚ ਥੋੜ੍ਹਾ ਜਿਹਾ ਨਿੰਬੂ ਦਾ ਰਸ ਮਿਲਾ ਕੇ ਸਿਰ 'ਤੇ ਲਗਾਇਆ ਜਾਵੇ ਤਾਂ ਸਿੱਕਰੀ ਅਤੇ ਸਿਰ ਦੀ ਖਾਰਸ਼ ਜੜ੍ਹੋਂ ਖ਼ਤਮ ਹੋ ਜਾਂਦੀ ਹੈ।

ਕੰਡੀਸ਼ਨਰ ਵਰਗੀ ਚਮਕ 
ਜੇਕਰ ਤੁਹਾਡੇ ਵਾਲ ਬਹੁਤ ਰੁੱਖੇ ਅਤੇ ਬੇਜਾਨ ਹਨ, ਤਾਂ ਐਲੋਵੇਰਾ ਤੁਹਾਡੇ ਲਈ ਸਭ ਤੋਂ ਵਧੀਆ ਨੈਚੁਰਲ ਕੰਡੀਸ਼ਨਰ ਹੈ। ਇਹ ਵਾਲਾਂ 'ਚ ਨਮੀ ਨੂੰ ਲਾਕ ਕਰਦਾ ਹੈ, ਜਿਸ ਨਾਲ ਵਾਲ ਬਹੁਤ ਹੀ ਸਿਲਕੀ, ਮੁਲਾਇਮ ਅਤੇ ਚਮਕਦਾਰ ਦਿਖਾਈ ਦੇਣ ਲੱਗਦੇ ਹਨ।

ਸਿਰ ਦੀ ਚਮੜੀ ਨੂੰ ਰੱਖੇ ਠੰਡਾ
ਗਰਮੀਆਂ ਦੇ ਮੌਸਮ 'ਚ ਤੇਜ਼ ਧੁੱਪ ਅਤੇ ਪਸੀਨੇ ਕਾਰਨ ਸਿਰ 'ਚ ਜਲਨ ਜਾਂ ਗਰਮੀ ਮਹਿਸੂਸ ਹੁੰਦੀ ਹੈ। ਐਲੋਵੇਰਾ ਦੀ ਤਾਸੀਰ ਠੰਡੀ ਹੁੰਦੀ ਹੈ, ਇਸ ਨੂੰ ਵਾਲਾਂ ਦੀਆਂ ਜੜ੍ਹਾਂ 'ਚ ਲਗਾਉਣ ਨਾਲ ਸਿਰ ਨੂੰ ਠੰਡਕ ਮਿਲਦੀ ਹੈ ਅਤੇ ਮਾਨਸਿਕ ਤਣਾਅ ਵੀ ਘੱਟ ਹੁੰਦਾ ਹੈ।

ਤੇਜ਼ੀ ਨਾਲ ਵਧਦੇ ਹਨ ਵਾਲ 
ਐਲੋਵੇਰਾ ਸਿਰ 'ਚ ਖ਼ੂਨ ਦੇ ਦੌਰੇ ਨੂੰ ਵਧਾਉਂਦਾ ਹੈ। ਜਦੋਂ ਵਾਲਾਂ ਦੀਆਂ ਜੜ੍ਹਾਂ ਨੂੰ ਪੂਰਾ ਪੋਸ਼ਣ ਮਿਲਦਾ ਹੈ, ਤਾਂ ਵਾਲਾਂ ਦੀ ਲੰਬਾਈ ਬਹੁਤ ਤੇਜ਼ੀ ਨਾਲ ਵਧਣੀ ਸ਼ੁਰੂ ਹੋ ਜਾਂਦੀ ਹੈ।

ਵਰਤਣ ਦਾ ਸਹੀ ਤਰੀਕਾ :-

ਐਲੋਵੇਰਾ ਦੇ ਪੌਦੇ ਤੋਂ ਤਾਜ਼ਾ ਜੈੱਲ ਕੱਢ ਕੇ ਉਸ ਨੂੰ ਚੰਗੀ ਤਰ੍ਹਾਂ ਮਿਕਸ ਕਰ ਲਓ। ਹੁਣ ਇਸ ਜੈੱਲ ਨੂੰ ਵਾਲਾਂ ਦੀਆਂ ਜੜ੍ਹਾਂ ਤੋਂ ਲੈ ਕੇ ਸਿਰੇ ਤੱਕ ਚੰਗੀ ਤਰ੍ਹਾਂ ਲਗਾਓ। 30 ਤੋਂ 40 ਮਿੰਟ ਤੱਕ ਲੱਗਿਆ ਰਹਿਣ ਦਿਓ ਅਤੇ ਇਸ ਤੋਂ ਬਾਅਦ ਕਿਸੇ ਹਲਕੇ ਸ਼ੈਂਪੂ ਨਾਲ ਵਾਲ ਧੋ ਲਓ। ਹਫ਼ਤੇ 'ਚ 2 ਵਾਰ ਇਸ ਦੀ ਵਰਤੋਂ ਨਾਲ ਤੁਹਾਨੂੰ ਸ਼ਾਨਦਾਰ ਨਤੀਜੇ ਮਿਲਣਗੇ।