ਵੈੱਬ ਡੈਸਕ - ਅੱਜ-ਕੱਲ੍ਹ ਦੇ ਪ੍ਰਦੂਸ਼ਣ ਅਤੇ ਭੱਜ-ਦੌੜ ਭਰੀ ਜ਼ਿੰਦਗੀ 'ਚ ਚਿਹਰੇ ਦੀ ਚਮਕ ਗੁਆਚਣਾ ਇਕ ਆਮ ਗੱਲ ਹੈ। ਚਮੜੀ ਨੂੰ ਮੁੜ ਤੋਂ ਤਰੋਤਾਜ਼ਾ ਅਤੇ ਚਮਕਦਾਰ ਬਣਾਉਣ ਲਈ ਅਸੀਂ ਅਕਸਰ ਪਾਰਲਰਾਂ 'ਚ ਹਜ਼ਾਰਾਂ ਰੁਪਏ ਖਰਚ ਕਰਦੇ ਹਾਂ ਪਰ ਬਿਊਟੀ ਮਾਹਿਰਾਂ ਅਨੁਸਾਰ, ਸਾਡੀ ਰਸੋਈ 'ਚ ਮੌਜੂਦ ਦਹੀਂ ਅਤੇ ਵੇਸਣ ਦਾ ਮਿਸ਼ਰਣ ਚਮੜੀ ਲਈ ਕਿਸੇ ਵਰਦਾਨ ਤੋਂ ਘੱਟ ਨਹੀਂ ਹੈ।

ਕਿਵੇਂ ਬਣਾਈਏ ਇਹ ਖਾਸ ਫੇਸ ਪੈਕ?

ਇਸ ਨੂੰ ਬਣਾਉਣਾ ਬਹੁਤ ਆਸਾਨ ਹੈ। ਇਕ ਕੋਲੀ 'ਚ 2 ਚਮਚ ਵੇਸਣ ਅਤੇ 1-2 ਚਮਚ ਤਾਜ਼ਾ ਦਹੀਂ ਮਿਲਾ ਕੇ ਇਕ ਗਾੜ੍ਹਾ ਪੇਸਟ ਤਿਆਰ ਕਰ ਲਓ। ਜੇਕਰ ਤੁਹਾਡੀ ਚਮੜੀ ਜ਼ਿਆਦਾ ਖੁਸ਼ਕ ਹੈ, ਤਾਂ ਤੁਸੀਂ ਇਸ 'ਚ ਇਕ ਚੁਟਕੀ ਹਲਦੀ ਜਾਂ ਸ਼ਹਿਦ ਵੀ ਮਿਲਾ ਸਕਦੇ ਹੋ।

ਵਰਤੋਂ ਦਾ ਸਹੀ ਤਰੀਕਾ :-

- ਸਭ ਤੋਂ ਪਹਿਲਾਂ ਚਿਹਰੇ ਨੂੰ ਸਾਫ਼ ਪਾਣੀ ਨਾਲ ਧੋ ਲਓ।
- ਤਿਆਰ ਕੀਤੇ ਪੇਸਟ ਨੂੰ ਚਿਹਰੇ ਅਤੇ ਗਰਦਨ 'ਤੇ ਚੰਗੀ ਤਰ੍ਹਾਂ ਲਗਾਓ।
-  ਇਸ ਨੂੰ 15 ਤੋਂ 20 ਮਿੰਟ ਤੱਕ ਲੱਗਿਆ ਰਹਿਣ ਦਿਓ ਜਦੋਂ ਤੱਕ ਇਹ ਹਲਕਾ ਸੁੱਕ ਨਾ ਜਾਵੇ।
- ਸੁੱਕਣ ਤੋਂ ਬਾਅਦ, ਹਲਕੇ ਹੱਥਾਂ ਨਾਲ ਮਸਾਜ ਕਰਦੇ ਹੋਏ ਕੋਸੇ ਪਾਣੀ ਨਾਲ ਚਿਹਰਾ ਧੋ ਲਓ।

ਹਫ਼ਤੇ 'ਚ 2 ਵਾਰ ਵਰਤਣ ਦੇ ਫਾਇਦੇ :-

ਕੁਦਰਤੀ ਕਲੀਨਜ਼ਰ
- ਵੇਸਣ ਚਮੜੀ ਦੇ ਅੰਦਰ ਤੱਕ ਜਾ ਕੇ ਗੰਦਗੀ ਅਤੇ ਵਾਧੂ ਤੇਲ ਨੂੰ ਬਾਹਰ ਕੱਢਦਾ ਹੈ।

ਟੈਨਿੰਗ ਤੋਂ ਛੁਟਕਾਰਾ
- ਦਹੀਂ 'ਚ ਮੌਜੂਦ ਲੈਕਟਿਕ ਐਸਿਡ ਸੂਰਜ ਦੀ ਧੁੱਪ ਕਾਰਨ ਹੋਈ ਕਾਲਖ ਨੂੰ ਦੂਰ ਕਰਨ 'ਚ ਮਦਦਗਾਰ ਹੈ।

ਮੁਲਾਇਮ ਸਕਿਨ 
- ਇਹ ਮਿਸ਼ਰਣ ਚਮੜੀ ਨੂੰ ਨਮੀ ਦਿੰਦਾ ਹੈ, ਜਿਸ ਨਾਲ ਚਿਹਰਾ ਨਰਮ ਅਤੇ ਮੁਲਾਇਮ ਬਣਿਆ ਰਹਿੰਦਾ ਹੈ।

ਕੁਦਰਤੀ ਨਿਖਾਰ
- ਇਸ ਦੇ ਲਗਾਤਾਰ ਇਸਤੇਮਾਲ ਨਾਲ ਚਿਹਰੇ 'ਤੇ ਕੁਦਰਤੀ ਗੁਲਾਬੀ ਨਿਖਾਰ ਆਉਂਦਾ ਹੈ ਅਤੇ ਦਾਗ-ਧੱਬੇ ਘੱਟ ਹੁੰਦੇ ਹਨ।