ਢਕੇਸ਼ਵਰੀ ਮੰਦਰ ਪੁੱਜੇ ਯੂਨਸ ਨੇ ਸੁਣਿਆ ਪੀੜਤ ਹਿੰਦੂਆਂ ਦਾ ਦਰਦ, ਕਿਹਾ- ''ਹਮਲਾਵਰਾਂ ਨੂੰ ਦਿਆਂਗੇ ਸਖ਼ਤ ਸਜ਼ਾਵਾਂ''

ਢਾਕਾ : ਬੰਗਲਾਦੇਸ਼ ਦੇ ਮੁੱਖ ਸਲਾਹਕਾਰ ਮੁਹੰਮਦ ਯੂਨਸ ਨੇ ਮੰਗਲਵਾਰ ਨੂੰ ਪ੍ਰਾਚੀਨ ਢਕੇਸ਼ਵਰੀ ਮੰਦਰ ਦਾ ਦੌਰਾ ਕੀਤਾ ਅਤੇ ਪੀੜਤ ਹਿੰਦੂ ਭਾਈਚਾਰੇ ਨਾਲ ਮੁਲਾਕਾਤ ਕੀਤੀ। ਉੱਥੇ ਉਨ੍ਹਾਂ ਨੇ ਉਨ੍ਹਾਂ ਨੂੰ ਸਬਰ ਰੱਖਣ ਦੀ ਅਪੀਲ ਕੀਤੀ ਅਤੇ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦੀ ਸਰਕਾਰ ਘੱਟ ਗਿਣਤੀ ਭਾਈਚਾਰੇ 'ਤੇ ਹਮਲਾ ਕਰਨ ਵਾਲਿਆਂ ਨੂੰ ਸਖ਼ਤ ਸਜ਼ਾ ਦੇਵੇਗੀ। 84 ਸਾਲਾ ਅਰਥਸ਼ਾਸਤਰੀ ਨੇ ਚੱਲ ਰਹੀ ਹਿੰਸਾ ਅਤੇ ਭੰਨਤੋੜ ਦਰਮਿਆਨ 8 ਅਗਸਤ ਨੂੰ ਅੰਤਰਿਮ ਸਰਕਾਰ ਦੇ ਮੁੱਖ ਸਲਾਹਕਾਰ ਵਜੋਂ ਅਹੁਦਾ ਸੰਭਾਲਿਆ ਸੀ। ਉਨ੍ਹਾਂ ਢਾਕੇ ਦੇ ਪ੍ਰਮੁੱਖ ਸ਼ਕਤੀ ਪੀਠਾਂ ਵਿੱਚੋਂ ਇਕ ਢਕੇਸ਼ਵਰੀ ਮੰਦਰ ਦਾ ਦੌਰਾ ਕੀਤਾ ਅਤੇ ਕਿਹਾ ਕਿ ਹਰੇਕ ਵਿਅਕਤੀ ਦੇ ਅਧਿਕਾਰਾਂ ਨੂੰ ਯਕੀਨੀ ਬਣਾਇਆ ਜਾਣਾ ਚਾਹੀਦਾ ਹੈ। ਯੂਨਸ ਨੇ ਦੇਸ਼ ਦੀ ਦੁਰਦਸ਼ਾ ਲਈ "ਸੰਸਥਾਗਤ ਪਤਨ" ਨੂੰ ਜ਼ਿੰਮੇਵਾਰ ਠਹਿਰਾਇਆ।

ਉਨ੍ਹਾਂ ਦਾ ਦੌਰਾ ਅਜਿਹੇ ਸਮੇਂ ਆਇਆ, ਜਦੋਂ ਬੰਗਲਾਦੇਸ਼ ਨੈਸ਼ਨਲ ਹਿੰਦੂ ਗ੍ਰੈਂਡ ਅਲਾਇੰਸ (ਬੀਐੱਨਐੱਚਜੀਏ) ਨੇ ਕਿਹਾ ਕਿ 5 ਅਗਸਤ ਨੂੰ ਸ਼ੇਖ ਹਸੀਨਾ ਦੀ ਅਗਵਾਈ ਵਾਲੀ ਸਰਕਾਰ ਦੇ ਪਤਨ ਤੋਂ ਬਾਅਦ ਘੱਟ ਗਿਣਤੀ ਭਾਈਚਾਰੇ ਨੂੰ 48 ਜ਼ਿਲ੍ਹਿਆਂ ਵਿਚ 278 ਥਾਵਾਂ 'ਤੇ ਹਮਲਿਆਂ ਅਤੇ ਧਮਕੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ। 'ਡੇਲੀ ਸਟਾਰ' ਅਖਬਾਰ ਨੇ ਯੂਨਸ ਦੇ ਹਵਾਲੇ ਨਾਲ ਕਿਹਾ, "ਅਧਿਕਾਰ ਸਾਰਿਆਂ ਲਈ ਬਰਾਬਰ ਹਨ। ਅਸੀਂ ਸਾਰੇ ਇੱਕੋ ਜਿਹੇ ਵਿਅਕਤੀ ਹਾਂ ਅਤੇ ਸਾਡੇ ਕੋਲ ਇੱਕੋ ਜਿਹੇ ਅਧਿਕਾਰ ਹਨ। ਸਾਡੇ ਵਿਚਕਾਰ ਵਿਤਕਰਾ ਨਾ ਕਰੋ। ਕਿਰਪਾ ਕਰਕੇ ਸਾਡੀ ਮਦਦ ਕਰੋ। ਧੀਰਜ ਰੱਖੋ ਅਤੇ ਬਾਅਦ ਵਿਚ ਮੁਲਾਂਕਣ ਕਰੋ।”

ਯੂਨਸ ਨੇ ਕਿਹਾ, "ਸਾਡੀਆਂ ਲੋਕਤੰਤਰੀ ਇੱਛਾਵਾਂ ਵਿਚ ਸਾਨੂੰ ਮੁਸਲਮਾਨਾਂ, ਹਿੰਦੂਆਂ ਜਾਂ ਬੋਧੀਆਂ ਦੇ ਰੂਪ ਵਿਚ ਨਹੀਂ, ਸਗੋਂ ਮਨੁੱਖਾਂ ਦੇ ਰੂਪ ਵਿਚ ਦੇਖਿਆ ਜਾਣਾ ਚਾਹੀਦਾ ਹੈ। ਸਾਡੇ ਅਧਿਕਾਰਾਂ ਨੂੰ ਯਕੀਨੀ ਬਣਾਇਆ ਜਾਣਾ ਚਾਹੀਦਾ ਹੈ। ਸਾਰੀਆਂ ਸਮੱਸਿਆਵਾਂ ਦੀ ਜੜ੍ਹ ਸੰਸਥਾਗਤ ਪ੍ਰਬੰਧਾਂ ਦੇ ਨਿਘਾਰ ਵਿਚ ਹੈ ਜਿਸ ਕਾਰਨ ਅਜਿਹੇ ਮੁੱਦੇ ਪੈਦਾ ਹੁੰਦੇ ਹਨ। ਸੰਸਥਾਗਤ ਪ੍ਰਣਾਲੀ ਨੂੰ ਠੀਕ ਕਰਨ ਦੀ ਲੋੜ ਹੈ।'' ਪ੍ਰੋ. ਯੂਨੁਸ ਨਾਲ ਕਾਨੂੰਨੀ ਸਲਾਹਕਾਰ ਆਸਿਫ਼ ਨਜ਼ਰੁਲ ਅਤੇ ਧਾਰਮਿਕ ਮਾਮਲਿਆਂ ਦੇ ਸਲਾਹਕਾਰ ਏਐੱਫਐੱਮ ਖਾਲਿਦ ਹੁਸੈਨ ਦੇ ਮੰਤਰਾਲੇ ਨੇ ਸੋਮਵਾਰ ਨੂੰ ਇਕ ਹੌਟਲਾਈਨ ਸਥਾਪਤ ਕੀਤੀ, ਜਿਸ ਵਿਚ ਲੋਕਾਂ ਨੂੰ ਮੰਦਰਾਂ, ਚਰਚਾਂ ਜਾਂ ਕਿਸੇ ਹੋਰ ਧਾਰਮਿਕ ਸੰਸਥਾਵਾਂ 'ਤੇ ਹਮਲਿਆਂ ਬਾਰੇ ਜਾਣਕਾਰੀ ਦੇਣ ਲਈ ਕਿਹਾ ਗਿਆ। ਬੰਗਾਲੀ ਭਾਸ਼ਾ ਦੇ ਅਖਬਾਰ 'ਪ੍ਰੋਥਮ ਆਲੋ' ਨੇ ਸੋਮਵਾਰ ਨੂੰ ਮੰਤਰਾਲੇ ਦੁਆਰਾ ਜਾਰੀ ਨੋਟੀਫਿਕੇਸ਼ਨ ਦੇ ਹਵਾਲੇ ਨਾਲ ਇਹ ਜਾਣਕਾਰੀ ਦਿੱਤੀ, "ਜੇਕਰ ਕਿਸੇ ਮੰਦਰ, ਚਰਚ ਜਾਂ ਕਿਸੇ ਹੋਰ ਧਾਰਮਿਕ ਸੰਸਥਾ 'ਤੇ ਬਦਮਾਸ਼ਾਂ ਦੁਆਰਾ ਹਮਲਾ ਕੀਤਾ ਜਾਂਦਾ ਹੈ ਤਾਂ ਉਨ੍ਹਾਂ ਨੂੰ ਤੁਰੰਤ ਕਾਰਵਾਈ ਕਰਨ ਦੀ ਬੇਨਤੀ ਕੀਤੀ ਜਾਂਦੀ ਹੈ। ਇਸ ਮੋਬਾਈਲ ਨੰਬਰ 01766-843809 'ਤੇ ਕਾਲ ਕਰੋ ਜਾਂ ਐੱਸਐੱਮਐੱਸ ਭੇਜੋ।

ਇਸ ਦੌਰਾਨ ਅਦਾਲਤ ਦੇ ਸੀਨੀਅਰ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਕਿਹਾ ਕਿ ਬੇਦਖਲ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ, ਉਨ੍ਹਾਂ ਦੇ ਮੰਤਰੀ ਮੰਡਲ ਦੇ ਦੋ ਸੀਨੀਅਰ ਮੰਤਰੀਆਂ ਅਤੇ ਬਰਖਾਸਤ ਪੁਲਸ ਮੁਖੀ ਸਮੇਤ 6 ਹੋਰਾਂ 'ਤੇ ਕਤਲ ਦੇ ਦੋਸ਼ਾਂ ਤਹਿਤ ਮੁਕੱਦਮਾ ਚਲਾਇਆ ਜਾਵੇਗਾ। 76 ਸਾਲਾ ਸਾਬਕਾ ਪ੍ਰਧਾਨ ਮੰਤਰੀ ਹਸੀਨਾ ਖਿਲਾਫ ਦਰਜ ਕੀਤਾ ਗਿਆ ਕਤਲ ਦਾ ਕੇਸ ਉਨ੍ਹਾਂ ਦੇ ਅਸਤੀਫੇ ਤੋਂ ਬਾਅਦ ਪਹਿਲਾ ਮਾਮਲਾ ਹੈ।

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:-  https://play.google.com/store/apps/details?id=com.jagbani&hl=en 

For IOS:-  https://itunes.apple.com/in/app/id538323711?mt=8