ਪ੍ਰਸ਼ਾਂਤ ਮਹਾਸਾਗਰ 'ਚ ਮਿਲਿਆ ਦੁਨੀਆ ਦਾ ਸਭ ਤੋਂ ਵੱਡਾ ਕੋਰਲ, ਬਲੂ ਵ੍ਹੇਲ ਵੀ ਲੱਗਦੀ ਹੈ ਛੋਟੀ

ਇੰਟਰਨੈਸ਼ਨਲ ਡੈਸਕ : ਹਾਲ ਹੀ 'ਚ ਦੱਖਣ-ਪੱਛਮੀ ਪ੍ਰਸ਼ਾਂਤ ਮਹਾਸਾਗਰ 'ਚ ਦੁਨੀਆ ਦਾ ਸਭ ਤੋਂ ਵੱਡਾ ਕੋਰਲ ਮਿਲਿਆ ਹੈ। ਨੈਸ਼ਨਲ ਜੀਓਗ੍ਰਾਫਿਕ ਸੋਸਾਇਟੀ ਦੀ ਪ੍ਰਿਸਟੀਨ ਸੀਜ਼ ਟੀਮ ਨੇ ਇਸ ਕੋਰਲ ਦੀ ਖੋਜ ਕੀਤੀ ਹੈ, ਜੋ ਕਿ ਬਲੂ ਵ੍ਹੇਲ ਤੋਂ ਵੀ ਵੱਡਾ ਹੈ ਅਤੇ ਪੁਲਾੜ ਤੋਂ ਵੀ ਦੇਖਿਆ ਜਾ ਸਕਦਾ ਹੈ। ਇੰਨਾ ਵੱਡਾ ਹੋਣ ਦੇ ਬਾਵਜੂਦ ਇਸ ਦਾ ਹੁਣ ਤੱਕ ਛੁਪਿਆ ਰਹਿਣਾ ਹੈਰਾਨੀ ਦੀ ਗੱਲ ਹੈ। ਇਹ ਕੋਰਲ 112x105 ਫੁੱਟ ਹੈ ਅਤੇ 42 ਫੁੱਟ ਦੀ ਡੂੰਘਾਈ 'ਤੇ ਮੌਜੂਦ ਹੈ, ਜਿਸ ਦੀ ਉਚਾਈ 16 ਫੁੱਟ ਦੱਸੀ ਜਾਂਦੀ ਹੈ। ਇਹ ਅੰਦਾਜ਼ਾ ਲਗਾਇਆ ਗਿਆ ਹੈ ਕਿ ਇਹ ਲਗਭਗ 300 ਸਾਲ ਜਾਂ ਇਸ ਤੋਂ ਵੀ ਵੱਧ ਪੁਰਾਣਾ ਹੈ।

ਮੁਹਿੰਮ ਦੇ ਮੁੱਖ ਵਿਗਿਆਨੀ ਮੌਲੀ ਟਿਮਰਜ਼ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਇਹ ਰਾਤ ਨੂੰ ਪਤਾ ਲੱਗਾ ਜਦੋਂ ਟੀਮ ਕਿਸੇ ਹੋਰ ਹਿੱਸੇ 'ਚ ਜਾਣ ਵਾਲੀ ਸੀ। ਇੱਕ ਵੀਡੀਓਗ੍ਰਾਫਰ ਇਹ ਸਮਝਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ ਕਿ ਜਲਵਾਯੂ ਪਰਿਵਰਤਨ ਨੇ ਪ੍ਰਸ਼ਾਂਤ ਮਹਾਸਾਗਰ ਨੂੰ ਕਿਵੇਂ ਪ੍ਰਭਾਵਿਤ ਕੀਤਾ ਹੈ ਅਤੇ ਇਸ ਦੌਰਾਨ ਉਸਨੂੰ ਇਹ ਮੈਗਾ ਕੋਰਲ ਮਿਲਿਆ। ਟਿਮਰਜ਼ ਨੇ ਕਿਹਾ ਕਿ ਇਹ ਪ੍ਰਾਣੀ ਇੱਕ ਕਿਸਮ ਦਾ ਸਖ਼ਤ ਕੋਰਲ ਹੈ ਜਿਸ ਨੂੰ ਪਾਵੋਨਾ ਕਲੇਵਸ ਜਾਂ ਸ਼ੋਲਡਲ ਬਲੇਡ ਕੋਰਲ ਕਿਹਾ ਜਾਂਦਾ ਹੈ। ਇਹ ਇਸ ਲਈ ਹੈ ਕਿਉਂਕਿ ਇਸ 'ਚ ਥੰਮ੍ਹ ਹਨ ਜੋ 'ਮੋਢਿਆਂ ਵਾਂਗ ਦਿਖਾਈ ਦਿੰਦੇ ਹਨ।' ਇਹ ਮੁੱਖ ਤੌਰ 'ਤੇ ਭੂਰੇ ਰੰਗ ਦਾ ਹੁੰਦਾ ਹੈ, ਜਿਸ ਦੇ ਨਾਲ ਪੀਲੇ, ਲਾਲ, ਗੁਲਾਬੀ ਅਤੇ ਨੀਲੇ ਰੰਗ ਵੀ ਦਿਖਾਈ ਦਿੰਦੇ ਹਨ।

ਕੋਰਲ ਕਿਹੋ ਜਿਹਾ ਦਿਖਾਈ ਦਿੰਦਾ ਹੈ?
ਫੋਟੋਗ੍ਰਾਫਰ ਮਨੂ ਸੈਨ ਫੇਲਿਕਸ ਨੇ ਕਿਹਾ ਕਿ ਕੋਰਲਾਂ ਨੂੰ ਦੇਖਣਾ 'ਅੰਡਰ ਵਾਟਰ ਕੈਥੇਡ੍ਰਲ' ਦੇਖਣ ਵਰਗਾ ਹੈ। ਫੋਟੋਗ੍ਰਾਫਰ ਨੇ ਅੱਗੇ ਕਿਹਾ, 'ਇਹ ਬਹੁਤ ਭਾਵੁਕ ਹੈ। ਮੈਂ ਉਸ ਚੀਜ਼ ਲਈ ਬਹੁਤ ਆਦਰ ਮਹਿਸੂਸ ਕੀਤਾ ਜੋ ਇੱਕ ਥਾਂ 'ਤੇ ਰਹੀ ਅਤੇ ਸੈਂਕੜੇ ਸਾਲਾਂ ਤੱਕ ਬਚੀ ਰਹੀ।' ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਜੋ ਲੱਭਿਆ ਹੈ ਉਹ ਲਗਭਗ ਇੱਕ ਅਰਬ ਛੋਟੇ ਜੀਵਾਂ ਦੀ ਬਣੀ ਕੋਰਲ ਕਲੋਨੀ ਹੈ ਜੋ ਇੱਕ ਜੀਵ ਵਾਂਗ ਇਕੱਠੇ ਕੰਮ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਸਥਾਨਕ ਲੋਕ ਸ਼ਾਇਦ ਇਸ ਨੂੰ ਵੱਡੀ ਚੱਟਾਨ ਸਮਝਦੇ ਹਨ।

ਗਰਮ ਹੋ ਰਹੇ ਸਮੁੰਦਰਾਂ ਅਤੇ ਜਲਵਾਯੂ ਤਬਦੀਲੀ ਕਾਰਨ ਕੋਰਲ ਖ਼ਤਰੇ ਵਿੱਚ ਹਨ। ਉਹ ਜੈਲੀਫਿਸ਼ ਅਤੇ ਸਮੁੰਦਰੀ ਐਨੀਮੋਨਸ ਨਾਲ ਸਬੰਧਤ ਜਾਨਵਰ ਹਨ। ਹਜ਼ਾਰਾਂ ਕੋਰਲ ਪੌਲੀਪ ਇਕੱਠੇ ਹੋ ਕੇ ਇੱਕ ਬਸਤੀ ਬਣਾਉਂਦੇ ਹਨ ਅਤੇ ਇਹ ਕਾਲੋਨੀਆਂ ਇੱਕ ਰੀਫ ਬਣਾਉਂਦੀਆਂ ਹਨ। ਸਭ ਤੋਂ ਵੱਡੇ ਕੋਰਲ ਕੁਝ ਕੋਰਲ ਰੀਫਾਂ ਨਾਲੋਂ ਬਹੁਤ ਡੂੰਘੇ ਪਾਣੀਆਂ ਵਿੱਚ ਰਹਿੰਦੇ ਹਨ ਅਤੇ ਅਜਿਹਾ ਲੱਗਦਾ ਹੈ ਕਿ ਇਸ ਨੇ ਸਮੁੰਦਰ ਦੀ ਸਤ੍ਹਾ 'ਤੇ ਉੱਚ ਤਾਪਮਾਨ ਦੇ ਖ਼ਤਰਿਆਂ ਨੂੰ ਰੋਕਿਆ ਹੈ।