ਅਮਰੀਕੀ ਏਅਰਕ੍ਰਾਫਟ ਕੈਰੀਅਰਜ਼ ''ਤੇ ਲਾਇਆ ਜਾਵੇਗਾ ਪੁਰਾਣਾ ਸਟੀਮ ਸਿਸਟਮ ! ਰਾਸ਼ਟਰਪਤੀ ਟਰੰਪ ਨੇ ਦਿੱਤੇ ਹੁਕਮ

ਇੰਟਰਨੈਸ਼ਨਲ ਡੈਸਕ- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਮੁੰਦਰੀ ਫੌਜ ਨੂੰ ਆਪਣੇ ਏਅਰਕ੍ਰਾਫਟ ਕੈਰੀਅਰਜ਼ ਤੋਂ ਅਤਿ-ਆਧੁਨਿਕ ਇਲੈਕਟ੍ਰੋਮੈਗਨੇਟਿਕ ਪ੍ਰਣਾਲੀ ਨੂੰ ਹਟਾ ਕੇ ਪੁਰਾਣੀ ਸਟੀਮ (ਭਾਫ਼) ਆਧਾਰਿਤ ਕੈਟਾਪੁਲਟ ਤਕਨੀਕ ’ਤੇ ਪਰਤਣ ਦਾ ਨਿਰਦੇਸ਼ ਦਿੱਤਾ ਹੈ। ਹਾਲਾਂਕਿ, ਰੱਖਿਆ ਮਾਹਰਾਂ ਅਤੇ ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਸ ਫ਼ੈਸਲੇ ਨਾਲ ਜਹਾਜ਼ਾਂ ਦੀ ਨਿਰਮਾਣ ਲਾਗਤ ਘਟਣ ਦੀ ਬਜਾਏ ਕਾਫ਼ੀ ਵਧ ਸਕਦੀ ਹੈ।

ਇਹ ਹੁਕਮ ਵਰਤਮਾਨ ’ਚ ਉਸਾਰੀ ਅਧੀਨ ‘ਡੋਰਿਸ ਮਿਲਰ’ ਸਮੇਤ ਭਵਿੱਖ ਦੇ ਫੋਰਡ-ਕਲਾਸ ਏਅਰਕ੍ਰਾਫਟ ਕੈਰੀਅਰਜ਼ ’ਤੇ ਲਾਗੂ ਹੋਵੇਗਾ। ਟਰੰਪ ਚਾਹੁੰਦੇ ਹਨ ਕਿ ਇਨ੍ਹਾਂ ਜਹਾਜ਼ਾਂ ਵਿਚ ਇਲੈਕਟ੍ਰੋਮੈਗਨੇਟਿਕ ਏਅਰਕ੍ਰਾਫ਼ਟ ਲਾਂਚ ਸਿਸਟਮ ਅਤੇ ਐਡਵਾਂਸ ਵੇਪਨਜ਼ ਦੀ ਜਗ੍ਹਾ ਸਟੀਮ-ਸੰਚਾਲਿਤ ਕੈਟਾਪੁਲਟ ਅਤੇ ਹਾਈਡ੍ਰੋਲਿਕ ਸਿਸਟਮ ਲਾਏ ਜਾਣ। 

ਫੈਸਲੇ ਦੀ ਵਿਆਖਿਆ ਕਰਦੇ ਹੋਏ ਇਕ ਮੈਮੋਰੰਡਮ ਵਿਚ ਟਰੰਪ ਨੇ ਕਿਹਾ ਕਿ ਜੰਗੀ ਵਿਭਾਗ ਨੂੰ ਸਮੁੰਦਰੀ ਉਦਯੋਗਿਕ ਆਧਾਰ ਦੀ ਸਮਰੱਥਾ ਅਤੇ ਮੁਕਾਬਲੇਬਾਜ਼ੀ ਦੋਵਾਂ ਨੂੰ ਬਹਾਲ ਕਰਨ ਦੀ ਲੋੜ ਹੈ, ਜਦਕਿ ਸਮੁੰਦਰੀ ਫੌਜ ਦੇ ਢਾਂਚੇ ਦਾ ਵਿਸਥਾਰ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਨਜ਼ਰੀਆ ਸਥਾਪਤ ਅਤੇ ਭਰੋਸੇਮੰਦ ਤਕਨੀਕ ’ਤੇ ਨਿਰਭਰ ਕਰਦਾ ਹੈ ਅਤੇ ਘਰੇਲੂ ਜਹਾਜ਼ ਨਿਰਮਾਣ ਉਦਯੋਗ ਵਿਚ ਨਿਵੇਸ਼ ਨੂੰ ਉਤਸ਼ਾਹ ਦਿੰਦਾ ਹੈ।