ਤਾਲਿਬਾਨ ਰਾਜ ''ਚ ਔਰਤਾਂ ''ਤੇ ਅੱਤਿਆਚਾਰਾਂ ''ਚ ਵਾਧਾ, ਕਾਬੁਲ ''ਚ ਮਿਲੀ ਮੁਟਿਆਰ ਦੀ ਲਾਸ਼

ਕਾਬੁਲ- ਕਾਬੁਲ ਦੇ ਦਸ਼ਤ-ਏ-ਬਾਰਚੀ ਇਲਾਕੇ 'ਚ ਐਤਵਾਰ ਨੂੰ ਇਕ ਔਰਤ ਦੀ ਹੱਥ ਬੰਨ੍ਹੀ ਲਾਸ਼ ਬਰਾਮਦ ਹੋਈ ਹੈ। ਸਥਾਨਕ ਮੀਡੀਆ ਨੇ ਸੂਤਰਾਂ ਦੇ ਹਵਾਲੇ ਤੋਂ ਦੱਸਿਆ ਕਿ ਲਗਦਾ ਹੈ ਕਿ ਲੜਕੀ ਨਾਲ ਜਬਰ-ਜ਼ਿਨਾਹ ਕੀਤਾ ਗਿਆ ਹੈ। ਹਾਲਾਂਕਿ ਤਾਲਿਬਾਨ ਦੇ ਸੁਰੱਖਿਆ ਅਧਿਕਾਰੀਆਂ ਨੇ ਅਜੇ ਤਕ ਇਸ ਘਟਨਾ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ। ਹਾਲ ਦੇ ਮਹੀਨਿਆਂ 'ਚ, ਅਫਗਾਨਿਸਤਾਨ 'ਚ ਔਰਤਾਂ ਦੇ ਅਗਵਾ ਹੋਣ ਜਾਂ ਕਤਲ ਦੇ ਮਾਮਲਿਆਂ 'ਚ ਕਾਫ਼ੀ ਵਾਧਾ ਹੋਇਆ ਹੈ ਤੇ ਜ਼ਿਆਦਾਤਰ ਸਮੇਂ ਲੋਕ ਡਰ ਦੇ ਕਾਰਨ ਅਜਿਹੇ ਮਾਮਲਿਆਂ ਦੀ ਰਿਪੋਰਟ ਨਹੀਂ ਕਰਦੇ ਹਨ।

ਇਸ ਤੋਂ ਪਹਿਲਾਂ ਐਤਵਾਰ ਨੂੰ ਕੈਨੇਡਾ ਦੇ ਟੋਰੰਟੋ ਸ਼ਹਿਰ 'ਚ ਕਰੀਬ 25 ਅਫਗਾਨੀ ਇਕੱਠੇ ਹੋਏ ਤੇ ਤਾਲਿਬਾਨ ਖ਼ਿਲਾਫ਼ ਪ੍ਰਦਰਸ਼ਨ ਕੀਤਾ। ਭਾਵੇਂ ਹੀ ਤਾਲਿਬਾਨ ਦੁਨੀਆ 'ਚ ਆਪਣੀ ਸਰਕਾਰ ਨੂੰ ਪਛਾਣ ਦਿਵਾਉਣ ਤੇ ਆਰਥਿਕ ਤੌਰ 'ਤੇ ਸਮਰਥਨ ਦੇਣ ਲਈ ਮਨਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਪਰ ਉਨ੍ਹਾਂ ਦੇ ਹਿੰਸਕ ਮਾਮਲੇ ਉਨ੍ਹਾਂ ਦੀ ਸਰਕਾਰ ਨੂੰ ਮਾਨਤਾ ਨਾ ਦੇਣ ਦੇ ਵੱਖ-ਵੱਖ ਕਾਰਨ ਦਸ ਰਹੇ ਹਨ। ਅਮਰੀਕਾ ਸਥਿਤ ਪਬਲੀਕੇਸ਼ਨਾਂ ਵਲੋਂ ਇੰਟਰਵਿਊ ਕੀਤੇ ਗਏ ਅੱਧਾ ਦਰਜਨ ਕਾਰਜਕਰਤਾਵਾਂ ਮੁਤਾਬਕ ਹਥਿਆਰਬੰਦ ਅੱਤਵਾਦੀਆਂ ਨੇ ਮਹਿਲਾ ਪ੍ਰਦਰਸ਼ਨਕਾਰੀਆਂ ਨਾਲ ਕੁੱਟਮਾਰ ਕੀਤੀ ਹੈ, ਉਨ੍ਹਾਂ ਦੇ ਚਿਹਰੇ 'ਤੇ ਕਾਲੀ ਮਿਰਚ ਦਾ ਸਪ੍ਰੇਅ ਛਿੜਕਿਆ ਹੈ ਤੇ ਉਨ੍ਹਾਂ ਨੂੰ ਬਿਜਲੀ ਦੇ ਉਤਪਾਦਾਂ ਨਾਲ ਝਟਕੇ ਦਿੱਤੇ ਹਨ।

ਤਾਲਿਬਾਨ ਲੜਾਕਿਆਂ ਨੇ ਔਰਤਾਂ ਨੂੰ ਨਿਸ਼ਾਨਾ ਬਣਾਇਆ ਹੈ, ਖ਼ਾਸ ਕਰਕੇ ਉਨ੍ਹਾਂ ਨੂੰ ਜੋ ਆਪਣੀ ਬੁਨਿਆਦੀ ਆਜ਼ਾਦੀ ਤੇ ਅਧਿਕਾਰਾਂ ਲਈ ਲੜ ਰਹੀਆਂ ਹਨ। ਹਿਊਮਨ ਰਾਈਟਸ ਵਾਚ ਦੇ ਸਹਾਇਕ ਖੋਜਕਰਤਾ ਸਹਿਰ ਫੇਰਾਤ ਨੇ ਕਿਹਾ ਕਿ ਇਨ੍ਹਾਂ ਔਰਤਾਂ ਦੇ ਅਗਵਾ ਹੋਣ ਨਾਲ ਤਾਲਿਬਾਨ ਇਕ ਸਪੱਸ਼ਟ ਸੰਦੇਸ਼ ਭੇਜ ਰਿਹਾ ਹੈ ਕਿ ਸਮਾਜ ਨੂੰ ਕਿਵੇਂ ਕੰਮ ਕਰਨਾ ਚਾਹੀਦਾ ਹੈ, ਹੱਕਾਂ ਤੇ ਸ਼ਕਤੀ ਕਿਸ ਕੋਲ ਹੈ ਤੇ ਲੋਕਾਂ ਨੂੰ ਇਸ ਦੀ ਪਾਲਣਾ ਕਿਵੇ ਕਰਨੀ ਚਾਹੀਦੀ ਹੈ।