ਪਾਕਿਸਤਾਨ 'ਚ ਚੀਨੀ ਡਾਕਟਰ ਨੂੰ ਨਿਸ਼ਾਨਾ ਬਣਾਉਣ ਦੀ ਯੋਜਨਾ ਬਣਾਉਣ ਵਾਲਾ ਸ਼ੱਕੀ ਅੱਤਵਾਦੀ ਗ੍ਰਿਫ਼ਤਾਰ

ਕਰਾਚੀ (ਭਾਸ਼ਾ): ਸਿੰਧ ਪੁਲਸ ਨੇ ਵੀਰਵਾਰ ਨੂੰ ਪਾਕਿਸਤਾਨ ਦੇ ਹੈਦਰਾਬਾਦ ਸ਼ਹਿਰ ਵਿੱਚ ਚੀਨੀ ਡਾਕਟਰ ਨੂੰ ਮਾਰਨ ਦੀ ਸਾਜ਼ਿਸ਼ ਰਚ ਰਹੇ ਇੱਕ ਸ਼ੱਕੀ ਅੱਤਵਾਦੀ ਨੂੰ ਗ੍ਰਿਫ਼ਤਾਰ ਕੀਤਾ।ਮੀਡੀਆ ਰਿਪੋਰਟਾਂ ਵਿਚ ਕਿਹਾ ਗਿਆ ਕਿ ਉਹ ਸਤੰਬਰ ਵਿਚ ਕਰਾਚੀ ਵਿਚ ਚੀਨੀ ਦੰਦਾਂ ਦੇ ਡਾਕਟਰਾਂ 'ਤੇ ਇਸੇ ਤਰ੍ਹਾਂ ਦੇ ਹਮਲੇ ਦੇ ਦੋਸ਼ੀਆਂ ਨਾਲ ਜੁੜਿਆ ਹੋਇਆ ਸੀ। ਡਾਨ ਅਖ਼ਬਾਰ ਦੇ ਹਵਾਲੇ ਨਾਲ ਸਿੰਧ ਪੁਲਸ ਦੇ ਅੱਤਵਾਦ ਰੋਕੂ ਵਿਭਾਗ (ਸੀ.ਟੀ.ਡੀ.) ਵਲੋਂ ਜਾਰੀ ਇਕ ਬਿਆਨ ਵਿਚ ਦੱਸਿਆ ਕਿ ਵਿਭਾਗ ਦੇ ਕਰਮਚਾਰੀਆਂ ਨੇ ਇਕ ਸੰਘੀ ਖੁਫੀਆ ਏਜੰਸੀ ਨਾਲ ਮਿਲ ਕੇ ਕਰਾਚੀ ਵਿਚ ਇਕ ਆਪਰੇਸ਼ਨ ਚਲਾਇਆ ਅਤੇ ਸਿੰਧ ਰੈਵੋਲਿਊਸ਼ਨਰੀ ਆਰਮੀ (SRA) ਵੱਲੋਂ ਪਾਬੰਦੀਸ਼ੁਦਾ ਸੰਗਠਨ ਦੇ ਇਕ ਮੈਂਬਰ ਨੂੰ ਗ੍ਰਿਫ਼ਤਾਰ ਕੀਤਾ। 

ਬਿਆਨ ਅਨੁਸਾਰ ਸ਼ੱਕੀ ਦੀ ਪਛਾਣ ਅਫਜ਼ਲ ਲੁੰਡ ਉਰਫ਼ ਆਫੀ ਵਜੋਂ ਹੋਈ ਹੈ ਅਤੇ ਉਸ ਦੇ ਕਬਜ਼ੇ ਵਿੱਚੋਂ 30 ਬੋਰ ਦਾ ਇੱਕ ਗੈਰ-ਲਾਇਸੈਂਸੀ ਪਿਸਤੌਲ, 5 ਰਾਉਂਡ ਮੈਗਜ਼ੀਨ ਅਤੇ ਇੱਕ ਮੋਟਰਸਾਈਕਲ ਬਰਾਮਦ ਕੀਤਾ ਗਿਆ।ਸੀਟੀਡੀ ਨੇ ਕਿਹਾ ਕਿ ਸ਼ੱਕੀ ਨੇ ਜਰਮਨੀ ਵਿੱਚ ਐਸਆਰਏ ਦੇ ਮੁਖੀ ਜ਼ੁਲਫਿਕਾਰ ਖਾਸਖੇਲੀ ਦੇ ਸੰਪਰਕ ਵਿੱਚ ਹੋਣ ਦੀ ਗੱਲ ਸਵੀਕਾਰ ਕੀਤੀ। ਰਿਪੋਰਟ ਵਿੱਚ ਕਿਹਾ ਗਿਆ ਕਿ ਲੁੰਡ ਨੇ ਖਾਸਖੇਲੀ ਵੱਲੋਂ ਦਿੱਤੀ ਵਿੱਤੀ ਸਹਾਇਤਾ ਨਾਲ ਹਥਿਆਰ ਅਤੇ ਮੋਟਰਸਾਈਕਲ ਖਰੀਦਿਆ।ਸੀਟੀਡੀ ਨੇ ਕਿਹਾ ਕਿ ਲੁੰਡ ਨੇ ਹੈਦਰਾਬਾਦ ਸ਼ਹਿਰ ਵਿੱਚ ਚੀਨੀ ਡਾਕਟਰ ਨੂੰ ਮਾਰਨ ਦੀ ਰੇਕੀ ਪੂਰੀ ਕਰ ਲਈ ਸੀ ਪਰ ਹਮਲਾ ਕਰਨ ਤੋਂ ਪਹਿਲਾਂ ਹੀ ਉਸਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ।

ਪੜ੍ਹੋ ਇਹ ਅਹਿਮ ਖ਼ਬਰ-ਚੀਨ 'ਚ 3 ਸਾਲ ਦੇ ਮਾਸੂਮ ਦੀ ਮੌਤ ਤੋਂ ਭੜਕੇ ਲੋਕ, ਪਿਤਾ ਨੇ ਕਿਹਾ-ਤਾਲਾਬੰਦੀ ਨਿਯਮਾਂ ਨੇ ਲਈ ਜਾਨ

ਰਿਪੋਰਟਾਂ ਅਨੁਸਾਰ ਉਸ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।ਜੀਓ ਨਿਊਜ਼ ਨੇ ਪੁਲਸ ਵੱਲੋਂ ਮਿਲੀ ਜਾਣਕਾਰੀ ਮੁਤਾਬਕ ਦੱਸਿਆ ਕਿ ਸਤੰਬਰ ਵਿੱਚ ਇੱਕ ਹਥਿਆਰਬੰਦ ਹਮਲਾਵਰ ਨੇ ਦੰਦਾਂ ਦੇ ਮਰੀਜ਼ ਵਜੋਂ ਦਾਖਲ ਹੋ ਕੇ ਇੱਕ ਚੀਨੀ-ਪਾਕਿਸਤਾਨੀ ਦੋਹਰੇ ਨਾਗਰਿਕ ਦੀ ਹੱਤਿਆ ਕਰ ਦਿੱਤੀ ਅਤੇ ਕਲੀਨਿਕ ਵਿੱਚ ਦੋ ਹੋਰਾਂ ਨੂੰ ਜ਼ਖਮੀ ਕਰ ਦਿੱਤਾ।ਪੀੜਤ ਜਿਨ੍ਹਾਂ ਦੀ ਪਛਾਣ ਡਾਕਟਰ ਰਿਚਰਡ ਹੂ, ਮਾਰਗਰੇਟ ਹੂ ਅਤੇ ਰੋਨਾਲਡ ਵਜੋਂ ਹੋਈ ਹੈ, ਸਾਰੇ ਚੀਨੀ-ਪਾਕਿਸਤਾਨੀ ਦੋਹਰੇ ਨਾਗਰਿਕ ਸਨ।ਚੀਨੀ ਨਾਗਰਿਕਾਂ ਨੂੰ ਹਾਲ ਹੀ ਦੇ ਸਾਲਾਂ ਵਿੱਚ ਅੱਤਵਾਦੀਆਂ ਦੁਆਰਾ ਨਿਸ਼ਾਨਾ ਬਣਾਇਆ ਗਿਆ ਹੈ ਅਤੇ ਉਹਨਾਂ ਦੇ ਹਮਲਿਆਂ ਵਿੱਚ ਹਾਲ ਹੀ ਵਿੱਚ ਤੇਜ਼ੀ ਆਈ ਹੈ - ਖਾਸ ਤੌਰ 'ਤੇ ਇਸ ਸਾਲ ਦੇ ਸ਼ੁਰੂ ਵਿੱਚ ਕਰਾਚੀ ਯੂਨੀਵਰਸਿਟੀ ਵਿੱਚ ਚੀਨੀ ਅਧਿਆਪਕਾਂ 'ਤੇ ਹਮਲਾ ਹੋਇਆ।

ਪੜ੍ਹੋ ਇਹ ਅਹਿਮ ਖ਼ਬਰ- ਭਗੌੜੇ ਪੰਜਾਬੀ ਦੀ ਜਾਣਕਾਰੀ ਦੇਣ 'ਤੇ ਆਸਟ੍ਰੇਲੀਆ ਦੇਵੇਗਾ 5 ਕਰੋੜ ਦਾ ਇਨਾਮ, ਜਾਣੋ ਕੀ ਹੈ ਮਾਮਲਾ