ਆਸਟ੍ਰੇਲੀਆ, ਇੰਡੋਨੇਸ਼ੀਆ 'ਚ ਦਿਸਿਆ 'ਸੂਰਜ ਗ੍ਰਹਿਣ', ਲੋਕਾਂ ਨੇ ਵੇਖਿਆ ਅਦਭੁੱਤ ਨਜ਼ਾਰਾ (ਤਸਵੀਰਾਂ)

ਮੈਲਬਰਨ (ਏਜੰਸੀ): ਆਸਟ੍ਰੇਲੀਆ ਦੇ ਤੱਟਵਰਤੀ ਸ਼ਹਿਰ ਐਕਸਮਾਊਥ ਵਿਚ ਵੀਰਵਾਰ ਤੜਕੇ ਇਕ ਦੁਰਲੱਭ ਸੂਰਜ ਗ੍ਰਹਿਣ ਨਜ਼ਰ ਆਇਆ, ਜਿਸ ਨੂੰ ਲਗਭਗ 20,000 ਲੋਕਾਂ ਨੇ ਦੇਖਿਆ। ਸੂਰਜ ਗ੍ਰਹਿਣ ਕਾਰਨ ਸੂਬੇ ਵਿੱਚ ਕਰੀਬ ਇੱਕ ਮਿੰਟ ਤੱਕ ਹਨੇਰਾ ਛਾ ਗਿਆ। ਤਿੰਨ ਹਜ਼ਾਰ ਤੋਂ ਘੱਟ ਵਸਨੀਕਾਂ ਦੇ ਇਸ ਦੂਰ-ਦੁਰਾਡੇ ਦੇ ਸੈਰ-ਸਪਾਟਾ ਸ਼ਹਿਰ ਨੂੰ ਗ੍ਰਹਿਣ ਦੇਖਣ ਲਈ ਆਸਟ੍ਰੇਲੀਆ ਦੇ ਸਭ ਤੋਂ ਵਧੀਆ ਸਥਾਨਾਂ ਵਿੱਚੋਂ ਇੱਕ ਵਜੋਂ ਚੁਣਿਆ ਗਿਆ ਸੀ, ਜੋ ਕਿ ਇੰਡੋਨੇਸ਼ੀਆ ਅਤੇ ਪੂਰਬੀ ਤਿਮੋਰ ਦੇ ਕੁਝ ਹਿੱਸਿਆਂ ਨਾਲ ਵੀ ਜੁੜਦਾ ਹੈ। 

ਸੂਰਜ ਗ੍ਰਹਿਣ ਨੂੰ ਦੇਖਣ ਲਈ ਪਿਛਲੇ ਕਈ ਦਿਨਾਂ ਤੋਂ ਅੰਤਰਰਾਸ਼ਟਰੀ ਸੈਲਾਨੀ ਐਕਸਮਾਊਥ ਵਿੱਚ ਇਕੱਠੇ ਹੋ ਰਹੇ ਹਨ। ਇਹ ਲੋਕ ਗ੍ਰਹਿਣ ਦੇਖਣ ਲਈ ਆਪਣੇ ਨਾਲ ਦੂਰਬੀਨ, ਕੈਮਰੇ ਅਤੇ ਹੋਰ ਸਾਮਾਨ ਲੈ ਕੇ ਆਏ ਸਨ। ਇਸ ਦੌਰਾਨ ਅੰਸ਼ਕ ਗ੍ਰਹਿਣ ਨੂੰ ਦੇਖਣ ਲਈ ਸੈਂਕੜੇ ਲੋਕ ਇੰਡੋਨੇਸ਼ੀਆ ਦੀ ਰਾਜਧਾਨੀ ਜਕਾਰਤਾ ਪਲੈਨੀਟੇਰੀਅਮ 'ਚ ਪੁੱਜੇ। ਅਜਕਾ ਅਜ਼ਹਾਰਾ (21) ਆਪਣੀ ਭੈਣ ਅਤੇ ਦੋਸਤਾਂ ਨਾਲ ਦੂਰਬੀਨ ਰਾਹੀਂ ਸੂਰਜ ਗ੍ਰਹਿਣ ਨੂੰ ਨੇੜਿਓਂ ਦੇਖਣ ਆਈ ਸੀ। ਉਸ ਨੇ ਕਿਹਾ ਕਿ “ਬੱਦਲ ਹੋਣ ਦੇ ਬਾਵਜੂਦ ਮੈਂ ਇੱਥੇ ਆ ਕੇ ਖੁਸ਼ ਹਾਂ। ਇਹ ਦੇਖ ਕੇ ਖੁਸ਼ੀ ਹੋਈ ਕਿ ਗ੍ਰਹਿਣ ਦੇਖਣ ਲਈ ਲੋਕ ਕਿੰਨੇ ਉਤਸ਼ਾਹ ਨਾਲ ਇੱਥੇ ਆਏ ਹਨ ਕਿਉਂਕਿ ਇਹ ਬਹੁਤ ਹੀ ਘੱਟ ਹੁੰਦਾ ਹੈ।” 

ਪੜ੍ਹੋ ਇਹ ਅਹਿਮ ਖ਼ਬਰ-ਯੂਕੇ ਨੇ 2022 'ਚ 28 ਲੱਖ ਤੋਂ ਵੱਧ ਵੀਜ਼ੇ ਕੀਤੇ ਜਾਰੀ, ਭਾਰਤੀਆਂ ਨੂੰ ਸਭ ਤੋਂ ਵੱਧ ਤਰਜੀਹ

ਨਾਸਾ ਦੇ ਖਗੋਲ ਵਿਗਿਆਨੀ ਹੈਨਰੀ ਥ੍ਰੌਪ ਉਨ੍ਹਾਂ ਲੋਕਾਂ ਵਿੱਚ ਸ਼ਾਮਲ ਸਨ ਜਿਨ੍ਹਾਂ ਨੇ ਐਕਸਮਾਊਥ ਵਿੱਚ ਗ੍ਰਹਿਣ ਦੇਖਿਆ। ਉਸਨੇ ਕਿਹਾ ਕਿ, “ਇਹ ਇੱਕ ਅਵਿਸ਼ਵਾਸ਼ਯੋਗ ਦ੍ਰਿਸ਼ ਹੈ। ਇੰਨਾ ਚਮਕਦਾਰ, ਇੰਨਾ ਤੇਜ਼। ਸੂਰਜ ਦੇ ਆਲੇ-ਦੁਆਲੇ ਕੋਰੋਨਾ ਸਾਫ ਦਿਖਾਈ ਦੇ ਰਿਹਾ ਹੈ। ਇਹ ਸਿਰਫ ਇੱਕ ਮਿੰਟ ਲੰਬਾ ਸੀ ਪਰ ਇਹ ਅਸਲ ਵਿੱਚ ਲੰਬਾ ਅਤੇ ਸ਼ਾਨਦਾਰ ਮਹਿਸੂਸ ਹੋਇਆ। ਦਿਲਚਸਪ ਗੱਲ ਇਹ ਹੈ ਕਿ ਜਦੋਂ ਅਸੀਂ ਗ੍ਰਹਿਣ ਦੇਖ ਰਹੇ ਸੀ, ਤਾਂ ਅਸੀਂ ਬ੍ਰਹਿਸਪਤੀ ਅਤੇ ਬੁਧ ਗ੍ਰਹਿ ਨੂੰ ਵੀ ਸਾਫ਼ ਦੇਖਿਆ। ਦਿਨ ਵਿੱਚ ਬੁਧ ਦਾ ਦਿਸਣਾ ਬਹੁਤ ਹੀ ਦੁਰਲੱਭ ਹੈ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।