237 ਸਾਲ ਪਹਿਲਾਂ ਛਪੀ ਅਮਰੀਕੀ ਸੰਵਿਧਾਨ ਦੀ ਦੁਰਲੱਭ ਕਾਪੀ ਦੀ ਨਿਲਾਮੀ, ਲੱਖਾਂ ਡਾਲਰ ਮਿਲਣ ਦੀ ਆਸ

ਵਾਸ਼ਿੰਗਟਨ : 237 ਸਾਲ ਪਹਿਲਾਂ ਛਪੀ ਅਮਰੀਕੀ ਸੰਵਿਧਾਨ ਦੀ ਇੱਕ ਦੁਰਲੱਭ ਕਾਪੀ ਵੀਰਵਾਰ ਸ਼ਾਮ ਨੂੰ ਉੱਤਰੀ ਕੈਰੋਲੀਨਾ 'ਚ ਨਿਲਾਮ ਹੋ ਰਹੀ ਹੈ। ਇਹ ਕਾਪੀ ਸੂਬਿਆਂ ਨੂੰ ਮਨਜ਼ੂਰੀ ਲਈ ਭੇਜੀ ਗਈ ਸੀ। Brunk Auctions ਇਸ ਕਾਪੀ ਦੀ ਨਿਲਾਮੀ ਕਰ ਰਿਹਾ ਹੈ। ਇਹ ਆਪਣੀ ਕਿਸਮ ਦੀ ਇੱਕੋ-ਇੱਕ ਕਾਪੀ ਹੈ ਅਤੇ ਮੰਨਿਆ ਜਾਂਦਾ ਹੈ ਕਿ ਇਹ ਕਿਸੇ ਦੇ ਨਿੱਜੀ ਅਧਿਕਾਰ ਵਿਚ ਸੀ। ਇਸ ਲਈ 10 ਲੱਖ ਅਮਰੀਕੀ ਡਾਲਰ ਦੀ ਘੱਟੋ-ਘੱਟ ਬੋਲੀ ਪਹਿਲਾਂ ਹੀ ਲਗਾਈ ਜਾ ਚੁੱਕੀ ਹੈ। 

ਦੱਸਿਆ ਜਾਂਦਾ ਹੈ ਕਿ ਇਹ ਕਾਪੀ ਉਦੋਂ ਛਾਪੀ ਗਈ ਸੀ ਜਦੋਂ 1787 ਵਿਚ ਸੰਵਿਧਾਨਕ ਕਨਵੈਨਸ਼ਨ ਨੇ ਦੇਸ਼ ਦੀ ਸਰਕਾਰ ਦੇ ਪ੍ਰਸਤਾਵਿਤ ਢਾਂਚੇ ਦਾ ਖਰੜਾ ਤਿਆਰ ਕੀਤਾ ਸੀ। ਇਸ ਨੂੰ 'ਆਰਟੀਕਲ ਆਫ਼ ਕਨਫੈਡਰੇਸ਼ਨ' ਦੇ ਤਹਿਤ ਪਹਿਲੀ ਅਮਰੀਕੀ ਸਰਕਾਰ ਦੀ ਕਾਂਗਰਸ ਨੂੰ ਭੇਜਿਆ ਗਿਆ ਸੀ ਅਤੇ ਬੇਨਤੀ ਕੀਤੀ ਗਈ ਸੀ ਕਿ ਉਹ ਇਸ ਨੂੰ ਪ੍ਰਮਾਣਿਤ ਕਰਨ ਲਈ ਸੂਬਿਆਂ ਨੂੰ ਭੇਜਣ। ਇਹ ਉਸ ਕਾਂਗਰਸ ਦੇ ਸਕੱਤਰ ਚਾਰਲਸ ਥਾਮਸਨ ਦੁਆਰਾ ਛਾਪੀਆਂ ਗਈਆਂ ਲਗਭਗ 100 ਕਾਪੀਆਂ 'ਚੋਂ ਇੱਕ ਹੈ। ਸਿਰਫ਼ ਅੱਠ ਕਾਪੀਆਂ ਅਜੇ ਵੀ ਮੌਜੂਦ ਹਨ ਤੇ ਬਾਕੀ ਸੱਤ ਨਿੱਜੀ ਅਧਿਕਾਰ ਵਿਚ ਹਨ। ਦੋ ਸਾਲ ਪਹਿਲਾਂ, ਪੂਰਬੀ ਉੱਤਰੀ ਕੈਰੋਲੀਨਾ ਦੇ ਐਡਨਟਨ 'ਚ ਇੱਕ ਘਰ ਨੂੰ ਖਾਲੀ ਕਰਵਾਇਆ ਜਾ ਰਿਹਾ ਸੀ। ਇਹ ਘਰ ਕਦੇ ਸੈਮੂਅਲ ਜੌਹਨਸਟਨ ਦਾ ਸੀ। ਉਹ 1787 ਤੋਂ 1789 ਤੱਕ ਉੱਤਰੀ ਕੈਰੋਲੀਨਾ ਦਾ ਗਵਰਨਰ ਸੀ ਤੇ ਆਪਣੇ ਪਿਛਲੇ ਸਾਲ ਦਫ਼ਤਰ 'ਚ ਉਸਨੇ ਸੰਵਿਧਾਨ ਦੀ ਪੁਸ਼ਟੀ ਕਰਨ ਵਾਲੇ ਰਾਜ ਸੰਮੇਲਨ ਦੀ ਨਿਗਰਾਨੀ ਕੀਤੀ। ਇਸ ਘਰ ਤੋਂ ਸੰਵਿਧਾਨ ਦੀ ਕਾਪੀ ਮਿਲੀ ਸੀ।