ਜੈਵਲਿਨ ਖਰੀਦਣ ਲਈ ਨਦੀਮ ਨੂੰ ਲੋਕਾਂ ਤੋਂ ਮੰਗਣੇ ਪਏ ਪੈਸੇ, ਹੁਣ 10 ਕਰੋੜ ਦੇਵੇਗੀ ਲਹਿੰਦੇ ਪੰਜਾਬ ਦੀ ਸਰਕਾਰ

ਕਰਾਚੀ : ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੀ ਮੁੱਖ ਮੰਤਰੀ ਮਰੀਅਮ ਨਵਾਜ਼ ਨੇ ਪੈਰਿਸ ਵਿਚ ਓਲੰਪਿਕ ਰਿਕਾਰਡ ਨਾਲ ਸੋਨ ਤਗਮਾ ਜਿੱਤਣ ਵਾਲੇ ਜੈਵਲਿਨ ਥਰੋਅਰ ਅਰਸ਼ਦ ਨਦੀਮ ਲਈ 10 ਕਰੋੜ ਰੁਪਏ (ਪਾਕਿਸਤਾਨੀ) ਦੇ ਨਕਦ ਇਨਾਮ ਦਾ ਐਲਾਨ ਕੀਤਾ ਹੈ। ਹਾਲਾਂਕਿ, ਕੁਝ ਮਹੀਨੇ ਪਹਿਲਾਂ, ਨਦੀਮ ਨੂੰ ਓਲੰਪਿਕ ਲਈ ਇੱਕ ਨਵਾਂ ਜੈਵਲਿਨ ਖਰੀਦਣ ਲਈ 'ਕਰਾਊਡ ਫੰਡਿੰਗ' ਦੀ ਮਦਦ ਲੈਣੀ ਪਈ ਸੀ। 

ਇਸ ਦੌਰਾਨ ਮਰੀਅਮ ਨਵਾਜ਼ ਸ਼ਰੀਫ ਨੇ ਇਹ ਵੀ ਕਿਹਾ ਕਿ ਇਸ ਖਿਡਾਰੀ ਦੇ ਨਾਂ 'ਤੇ ਉਨ੍ਹਾਂ ਦੇ ਜੱਦੀ ਸ਼ਹਿਰ ਖਾਨੇਵਾਲ 'ਚ ਸਪੋਰਟਸ ਸਿਟੀ ਬਣਾਈ ਜਾਵੇਗੀ। ਨਦੀਮ ਨੂੰ ਸਾਧਨਾਂ ਅਤੇ ਸਹੂਲਤਾਂ ਦੀ ਘਾਟ ਦਾ ਸਾਹਮਣਾ ਕਰਨਾ ਪਿਆ ਹੈ। ਪਾਕਿਸਤਾਨ ਦੇ ਲਗਭਗ ਹਰ ਗੈਰ-ਕ੍ਰਿਕੇਟ ਖਿਡਾਰੀ ਨੂੰ ਇਸ ਤਰ੍ਹਾਂ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਰਾਸ਼ਟਰਮੰਡਲ ਖੇਡਾਂ (2022) ਵਿਚ ਸੋਨ ਤਗਮਾ ਅਤੇ ਵਿਸ਼ਵ ਚੈਂਪੀਅਨਸ਼ਿਪ (2023) ਵਿਚ ਚਾਂਦੀ ਦਾ ਤਗਮਾ ਜਿੱਤਣ ਤੋਂ ਬਾਅਦ ਵੀ, ਨਦੀਮ ਨੂੰ ਪੈਰਿਸ ਓਲੰਪਿਕ ਤੋਂ ਪਹਿਲਾਂ ਨਵੇਂ ਜੈਵਲਿਨ ਲਈ ਗੁਹਾਰ ਲਾਉਣੀ ਪਈ। ਉਸ ਦਾ ਪੁਰਾਣਾ ਜੈਵਲਿਨ ਸਾਲਾਂ ਦੀ ਵਰਤੋਂ ਤੋਂ ਬਾਅਦ ਖਰਾਬ ਹੋ ਗਿਆ ਸੀ। ਸ਼ਾਇਦ ਇਸੇ ਲਈ ਵੀਰਵਾਰ ਨੂੰ ਪੈਰਿਸ ਤੋਂ ਨਦੀਮ ਦਾ ਆਪਣੇ ਮਾਤਾ-ਪਿਤਾ ਨੂੰ ਪਹਿਲਾ ਸੰਦੇਸ਼ ਇਹ ਦਿੱਤਾ ਕਿ ਉਹ ਹੁਣ ਆਪਣੇ ਪਿੰਡ ਜਾਂ ਇਸ ਦੇ ਆਲੇ-ਦੁਆਲੇ ਐਥਲੀਟਾਂ ਲਈ ਇੱਕ ਢੁਕਵੀਂ ਅਕੈਡਮੀ ਬਣਾਉਣ ਲਈ ਦ੍ਰਿੜ ਹੈ। ਉਸ ਦੇ ਪਿਤਾ ਮੁਹੰਮਦ ਅਰਸ਼ਦ ਨੇ ਕਿਹਾ ਕਿ ਅਸੀਂ ਉਸ ਨੂੰ ਇੰਨੀ ਪ੍ਰਸਿੱਧੀ ਦੇਣ ਲਈ ਅੱਲ੍ਹਾ ਦੇ ਸ਼ੁਕਰਗੁਜ਼ਾਰ ਹਾਂ। ਉਸ ਨੇ ਉਮੀਦ ਜ਼ਾਹਰ ਕੀਤੀ ਕਿ ਇਹ ਓਲੰਪਿਕ ਸੋਨ ਤਗਮਾ ਹੁਣ ਦਿਹਾਤੀ ਖੇਤਰ ਵਿੱਚ ਖਿਡਾਰੀਆਂ ਲਈ ਖੇਡ ਅਕੈਡਮੀ ਬਣਾਉਣ ਦੇ ਉਸ ਦੇ ਯਤਨਾਂ ਵਿੱਚ ਮਦਦ ਕਰੇਗਾ। 

ਜਨਰਲ (ਸੇਵਾਮੁਕਤ) ਮੁਹੰਮਦ ਅਕਰਮ ਸਾਹੀ, ਜਿਨ੍ਹਾਂ ਨੇ ਕਈ ਸਾਲਾਂ ਤੱਕ ਪਾਕਿਸਤਾਨ ਵਿੱਚ ਰਾਸ਼ਟਰੀ ਅਥਲੈਟਿਕਸ ਸੰਸਥਾ ਦੀ ਅਗਵਾਈ ਕੀਤੀ, ਨੂੰ ਭਰੋਸਾ ਹੈ ਕਿ ਅਰਸ਼ਦ ਦੀ ਇਸ ਪ੍ਰਾਪਤੀ ਨਾਲ ਦੇਸ਼ ਵਿੱਚ ਅਥਲੈਟਿਕਸ ਦੀ ਲੋਕਪ੍ਰਿਅਤਾ ਵਿੱਚ ਵਾਧਾ ਹੋਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਮੈਂ ਪਾਕਿਸਤਾਨ ਲਈ ਕਈ ਹੋਰ ਅਰਸ਼ਦ ਨਦੀਮ ਨੂੰ ਤਗਮੇ ਜਿੱਤਦੇ ਦੇਖਣਾ ਚਾਹੁੰਦਾ ਹਾਂ। ਜਦੋਂ ਨੀਰਜ ਚੋਪੜਾ ਉਭਰਿਆ ਤਾਂ ਉਸ ਨੇ ਭਾਰਤ ਦੇ ਗੈਰ-ਕ੍ਰਿਕੇਟ ਖਿਡਾਰੀਆਂ 'ਤੇ ਬਹੁਤ ਪ੍ਰਭਾਵ ਪਾਇਆ ਅਤੇ ਉਮੀਦ ਹੈ ਕਿ ਪਾਕਿਸਤਾਨ ਵਿੱਚ ਵੀ ਅਜਿਹਾ ਹੋਵੇਗਾ।