ਚੋਣਾਂ ਮਗਰੋਂ ਹੋਈ ਹਿੰਸਾ, ਜੇਲ੍ਹ 'ਚੋਂ ਭੱਜ ਗਏ 6 ਹਜ਼ਾਰ ਕੈਦੀ

ਮਾਪੁਟੋ (ਏਜੰਸੀ)- ਮੋਜ਼ਾਮਬੀਕ ਵਿੱਚ ਚੋਣਾਂ ਤੋਂ ਬਾਅਦ ਜਾਰੀ ਹਿੰਸਾ ਅਤੇ ਦੰਗਿਆਂ ਦਰਮਿਆਨ ਕ੍ਰਿਸਮਸ ਵਾਲੇ ਦਿਨ ਰਾਜਧਾਨੀ ਵਿਚ ਸਥਿਤ ਇੱਕ ਉੱਚ ਸੁਰੱਖਿਆ ਵਾਲੀ ਜੇਲ੍ਹ ਵਿੱਚ ਹੋਈ ਝੜਪ ਦੌਰਾਨ ਘੱਟੋ-ਘੱਟ 6,000 ਕੈਦੀ ਫਰਾਰ ਹੋ ਗਏ। ਦੇਸ਼ ਦੇ ਪੁਲਸ ਮੁਖੀ ਨੇ ਇਹ ਜਾਣਕਾਰੀ ਦਿੱਤੀ। ਪੁਲਸ ਮੁਖੀ ਬਰਨਾਰਡੀਨੋ ਰਾਫੇਲ ਨੇ ਦੱਸਿਆ ਕਿ ਸੁਰੱਖਿਆ ਬਲਾਂ ਨਾਲ ਝੜਪਾਂ 'ਚ 33 ਕੈਦੀ ਮਾਰੇ ਗਏ ਅਤੇ 15 ਹੋਰ ਜ਼ਖਮੀ ਹੋ ਗਏ।

ਦੇਸ਼ ਦੀ ਸੰਵਿਧਾਨਕ ਪਰਿਸ਼ਦ ਵੱਲੋਂ 9 ਅਕਤੂਬਰ ਨੂੰ ਹੋਈਆਂ ਚੋਣਾਂ ਵਿੱਚ ਸੱਤਾਧਾਰੀ ਫ੍ਰੇਲੀਮੋ ਪਾਰਟੀ ਦੇ ਜੇਤੂ ਹੋਣ ਦੀ ਪੁਸ਼ਟੀ ਕੀਤੇ ਜਾਣ ਤੋਂ ਬਾਅਦ ਮੋਜ਼ਾਮਬੀਕ ਵਿੱਚ ਹਿੰਸਾ ਜਾਰੀ ਹੈ, ਜਿਸ ਵਿੱਚ ਪੁਲਸ ਵਾਹਨਾਂ, ਸਟੇਸ਼ਨਾਂ ਅਤੇ ਆਮ ਜਨਤਾ ਦੇ ਬੁਨਿਆਦੀ ਢਾਂਚੇ ਨੂੰ ਤਬਾਹ ਕਰ ਦਿੱਤਾ ਗਿਆ ਹੈ। ਰਾਫੇਲ ਨੇ ਕਿਹਾ ਕਿ ਰਾਜਧਾਨੀ ਦੇ 14 ਕਿਲੋਮੀਟਰ ਦੱਖਣ-ਪੱਛਮ ਵਿੱਚ ਸਥਿਤ ਮਾਪੁਟੋ ਕੇਂਦਰੀ ਜੇਲ੍ਹ ਤੋਂ ਕੈਦੀਆਂ ਦੇ ਭੱਜਣ ਦਾ ਸਿਲਸਿਲਾ ਬੁੱਧਵਾਰ ਦੁਪਹਿਰ ਦੇ ਕਰੀਬ ਉਦੋਂ ਸ਼ੁਰੂ ਹੋਇਆ, ਜਦੋਂ ਵਿਨਾਸ਼ਕਾਰੀ ਪ੍ਰਦਰਸ਼ਨਕਾਰੀਆਂ ਦਾ ਇੱਕ ਸਮੂਹ ਪ੍ਰਦਰਸ਼ਨ ਕਰ ਰਿਹਾ ਸੀ ਅਤੇ ਇਸ ਦੌਰਾਨ ਜੇਲ੍ਹ ਦੀ ਇੱਕ ਕੰਧ ਡਿੱਗ ਗਈ। ਉਨ੍ਹਾਂ ਦੱਸਿਆ ਕਿ ਇਸ ਦੌਰਾਨ ਕੈਦੀਆਂ ਨੇ ਜੇਲ੍ਹ ਵਾਰਡਨ ਤੋਂ ਹਥਿਆਰ ਖੋਹ ਲਏ ਅਤੇ ਕੈਦੀਆਂ ਨੂੰ ਭਜਾਉਣਾ ਸ਼ੁਰੂ ਕਰ ਦਿੱਤਾ। ਰਾਫੇਲ ਨੇ ਕਿਹਾ ਕਿ ਚਿੰਤਾ ਦੀ ਗੱਲ ਹੈ ਕਿ ਇਸ ਦੌਰਾਨ 29 ਦੋਸ਼ੀ ਅੱਤਵਾਦੀਆਂ ਨੂੰ ਵੀ ਜੇਲ੍ਹ ਤੋਂ ਭਜਾ ਦਿੱਤਾ ਗਿਆ।