ਮਾਂਟਰੀਅਲ ਹਿੰਸਾ 'ਤੇ ਬੁਰੇ ਘਿਰੇ ਜਸਟਿਨ ਟਰੂਡੋ; ਪੀਅਰੇ ਨੇ ਸੁਣਾਈਆਂ ਖਰੀਆਂ-ਖਰੀਆਂ

ਓਟਾਵਾ: ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਆਪਣੀਆਂ ਨੀਤੀਆਂ ਕਾਰਨ ਘਰ ਵਿਚ ਹੀ ਘਿਰਦੇ ਜਾ ਰਹੇ ਹਨ। ਕੈਨੇਡਾ ਦੇ ਮਾਂਟਰੀਅਲ ਵਿੱਚ ਸ਼ੁੱਕਰਵਾਰ ਰਾਤ ਨੂੰ ਇਜ਼ਰਾਈਲ ਵਿਰੋਧੀ ਅਤੇ ਫਲਸਤੀਨ ਪੱਖੀ ਪ੍ਰਦਰਸ਼ਨਾਂ ਦੌਰਾਨ ਹੋਈ ਹਿੰਸਾ ਨੂੰ ਲੈ ਕੇ ਪੀਅਰੇ ਪੋਲੀਵਰੇ ਨੇ ਜਸਟਿਨ ਟਰੂਡੋ 'ਤੇ ਨਿਸ਼ਾਨਾ ਵਿੰਨ੍ਹਿਆ ਹੈ। ਕੈਨੇਡੀਅਨ ਵਿਰੋਧੀ ਧਿਰ ਦੇ ਨੇਤਾ ਪੀਅਰੇ ਪੋਲੀਵਰੇ ਨੇ ਇਸ ਘਟਨਾ ਲਈ ਪੀ.ਐਮ ਟਰੂਡੋ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ ਅਤੇ ਕਿਹਾ ਹੈ ਕਿ ਤੁਸੀਂ ਇਸ ਹਿੰਸਾ ਦੀ ਨਿੰਦਾ ਕਰਨ ਦਾ ਸਿਰਫ਼ ਦਿਖਾਵਾ ਕਰ ਰਹੇ ਹੋ। ਅਸਲੀਅਤ ਇਹ ਹੈ ਕਿ ਅਸੀਂ ਉਹੀ ਵੱਢ ਰਹੇ ਹਾਂ ਜੋ ਤੁਸੀਂ ਬੀਜਿਆ ਹੈ। ਪੋਲੀਵਰੇ ਨੇ ਕਿਹਾ ਕਿ ਕੈਨੇਡਾ ਵਿੱਚ ਅਜਿਹੀਆਂ ਘਟਨਾਵਾਂ ਟਰੂਡੋ ਸਰਕਾਰ ਦੀਆਂ ਨੀਤੀਆਂ ਦਾ ਨਤੀਜਾ ਹਨ।

ਜਸਟਿਨ ਟਰੂਡੋ ਨੇ ਸ਼ਨੀਵਾਰ ਨੂੰ ਹਿੰਸਾ ਬਾਰੇ ਟਵੀਟ ਕਰਦੇ ਹੋਏ ਲਿਖਿਆ, 'ਅਸੀਂ ਬੀਤੀ ਰਾਤ ਮਾਂਟਰੀਅਲ ਦੀਆਂ ਸੜਕਾਂ 'ਤੇ ਜੋ ਦੇਖਿਆ, ਉਹ ਡਰਾਉਣਾ ਸੀ। ਯਹੂਦੀ-ਵਿਰੋਧੀ ਭਾਵਨਾਵਾਂ, ਧਮਕੀਆਂ ਅਤੇ ਹਿੰਸਾ ਦੇ ਕੰਮ ਜਿੱਥੇ ਵੀ ਹੁੰਦੇ ਹਨ, ਉਨ੍ਹਾਂ ਦੀ ਨਿੰਦਾ ਕੀਤੀ ਜਾਣੀ ਚਾਹੀਦੀ ਹੈ। RCMP ਸਥਾਨਕ ਪੁਲਸ ਦੇ ਸੰਪਰਕ ਵਿੱਚ ਹਨ। ਇਸ ਲਈ ਜ਼ਿੰਮੇਵਾਰ ਅਤੇ ਦੰਗਾਕਾਰੀਆਂ ਨੂੰ ਜਵਾਬਦੇਹ ਬਣਾਇਆ ਜਾਵੇਗਾ। ਟਰੂਡੋ ਦੇ ਇਸ ਟਵੀਟ 'ਤੇ ਪੋਲੀਵਰੇ ਨੇ ਖਰੀਆਂ ਖਰੀਆਂ ਸੁਣਾਈਆਂ ਹਨ।

ਹਿੰਸਾ ਦੇ ਮਾਹੌਲ ਲਈ ਤੁਸੀਂ ਜ਼ਿੰਮੇਵਾਰ: ਪੋਲੀਵਰੇ

ਜਸਟਿਨ ਟਰੂਡੋ ਨੂੰ ਜਵਾਬ ਦਿੰਦਿਆਂ ਕੈਨੇਡੀਅਨ ਸਿਆਸਤਦਾਨ ਪੀਅਰੇ ਪੋਲੀਵਰੇ ਨੇ ਕਿਹਾ, 'ਤੁਸੀਂ ਹੈਰਾਨ ਹੋਣ ਦਾ ਦਿਖਾਵਾ ਕਰ ਰਹੇ ਹੋ। ਅਸੀਂ ਉਹੀ ਵੱਢ ਰਹੇ ਹਾਂ ਜੋ ਤੁਸੀਂ ਬੀਜਿਆ ਹੈ। ਪ੍ਰਧਾਨ ਮੰਤਰੀ ਹੋਣ ਦੇ ਨਾਤੇ ਤੁਸੀਂ 9 ਸਾਲਾਂ ਤੱਕ ਜ਼ਹਿਰੀਲੀ ਪਛਾਣ ਦੀ ਰਾਜਨੀਤੀ ਨੂੰ ਅੱਗੇ ਵਧਾਉਂਦੇ ਹੋਏ ਲੋਕਾਂ ਨੂੰ ਨਸਲ, ਲਿੰਗ, ਧਰਮ ਅਤੇ ਖੇਤਰ ਦੇ ਆਧਾਰ 'ਤੇ ਵੰਡਿਆ ਹੈ। ਤੁਸੀਂ ਇੱਥੋਂ ਤੱਕ ਕਿਹਾ ਕਿ ਕੈਨੇਡਾ ਇੱਕ 'ਪੋਸਟ-ਨੈਸ਼ਨਲ ਸਟੇਟ' ਹੈ ਜਿਸਦੀ ਕੋਈ ਮੂਲ ਪਛਾਣ ਨਹੀਂ ਹੈ। ਤੁਸੀਂ ਕਾਨੂੰਨ ਤੋੜਨ ਵਾਲਿਆਂ ਲਈ ਸਰਹੱਦਾਂ ਖੋਲ੍ਹ ਦਿੱਤੀਆਂ ਹਨ ਅਤੇ ਸਵਾਲ ਉਠਾਉਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਨਸਲਵਾਦੀ ਕਿਹਾ ਹੈ। ਤੁਸੀਂ ਆਪਣੇ ਸੰਸਦ ਮੈਂਬਰਾਂ ਨੂੰ ਮਸਜਿਦ ਵਿੱਚ ਕੁਝ ਹੋਰ, ਮੰਦਰ ਵਿੱਚ ਕੁਝ ਹੋਰ ਅਤੇ ਗੁਰਦੁਆਰੇ ਵਿੱਚ ਕੁਝ ਹੋਰ ਕਹਿਣ ਲਈ ਭੇਜਦੇ ਹੋ।

ਪੜ੍ਹੋ ਇਹ ਅਹਿਮ ਖ਼ਬਰ-Canada ਵੱਲੋਂ ਪੰਜਾਬੀਆਂ ਨੂੰ ਇਕ ਹੋਰ ਝਟਕਾ

ਪੀਅਰੇ ਨੇ ਅੱਗੇ ਕਿਹਾ, 'ਟਰੂਡੋ, ਤੁਸੀਂ ਕੈਨੇਡਾ ਨੂੰ ਵਿਦੇਸ਼ੀ ਦਖਲ ਦਾ ਮੈਦਾਨ ਬਣਾ ਦਿੱਤਾ ਹੈ। ਤੁਸੀਂ ਈਰਾਨ ਦੇ IRGC ਅੱਤਵਾਦੀਆਂ ਨੂੰ ਚਾਰ ਸਾਲਾਂ ਲਈ ਇੱਥੇ ਕਾਨੂੰਨੀ ਤੌਰ 'ਤੇ ਕੰਮ ਕਰਨ ਦੀ ਇਜਾਜ਼ਤ ਦਿੱਤੀ ਸੀ। ਤੁਸੀਂ ਅਜਿਹੇ ਕਾਨੂੰਨ ਪਾਸ ਕੀਤੇ ਹਨ ਜੋ ਅਪਰਾਧੀਆਂ ਨੂੰ ਉਨ੍ਹਾਂ ਦੀ 80ਵੀਂ ਗ੍ਰਿਫ਼ਤਾਰੀ ਦੇ ਘੰਟਿਆਂ ਦੇ ਅੰਦਰ ਜੇਲ੍ਹ ਤੋਂ ਬਾਹਰ ਆਉਣ ਦਿੰਦੇ ਹਨ। ਨਤੀਜਾ ਕੈਨੇਡੀਅਨ ਧਰਤੀ 'ਤੇ ਕਤਲ, ਬੰਬ ਧਮਾਕੇ, ਹਮਲੇ ਅਤੇ ਹਿੰਸਾ ਹੈ। ਇੰਨਾ ਹੀ ਨਹੀਂ ਮਾਂਟਰੀਅਲ ਸੜ ਰਿਹਾ ਸੀ ਤਾਂ ਤੁਸੀਂ ਡਾਂਸ ਕਰ ਰਹੇ ਸੀ। ਤੁਹਾਨੂੰ ਤੁਰੰਤ ਚੋਣਾਂ ਦਾ ਐਲਾਨ ਕਰਨਾ ਚਾਹੀਦਾ ਹੈ।

ਇਸ ਲਈ ਹੋਈ ਮਾਂਟਰੀਅਲ ਵਿੱਚ ਹਿੰਸਾ 

ਕੈਨੇਡਾ ਦੇ ਸ਼ਹਿਰ ਮਾਂਟਰੀਅਲ 'ਚ ਸ਼ੁੱਕਰਵਾਰ ਰਾਤ ਨੂੰ ਇਜ਼ਰਾਈਲ ਵਿਰੋਧੀ ਅਤੇ ਫਲਸਤੀਨ ਸਮਰਥਕਾਂ ਵਿਚਾਲੇ ਹਿੰਸਾ ਹੋਈ। ਇਹ ਉਦੋਂ ਹੋਇਆ ਹੈ ਜਦੋਂ ਨਾਟੋ ਦੇ ਮੈਂਬਰਾਂ ਅਤੇ ਭਾਈਵਾਲ ਦੇਸ਼ਾਂ ਦੇ 300 ਪ੍ਰਤੀਨਿਧੀ ਮਾਂਟਰੀਅਲ ਵਿੱਚ ਮੀਟਿੰਗ ਕਰ ਰਹੇ ਹਨ। ਇਸ ਦੌਰਾਨ ਇਜ਼ਰਾਈਲ ਦੇ ਸਮਰਥਨ 'ਚ ਇਕੱਠੇ ਹੋਏ ਪ੍ਰਦਰਸ਼ਨਕਾਰੀਆਂ ਅਤੇ ਲੋਕਾਂ 'ਚ ਝੜਪ ਹੋ ਗਈ। ਹਿੰਸਾ ਅਤੇ ਅੱਗਜ਼ਨੀ ਤੋਂ ਬਾਅਦ ਪੁਲਸ ਨੂੰ ਅੱਥਰੂ ਗੈਸ ਅਤੇ ਲਾਠੀਚਾਰਜ ਕਰਨਾ ਪਿਆ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।