ਬੰਗਲਾਦੇਸ਼ ਨੂੰ 1 ਲੱਖ ਟਨ ਚੌਲ ਨਿਰਯਾਤ ਕਰੇਗਾ ਪਾਕਿਸਤਾਨ

ਕਰਾਚੀ (ਏਜੰਸੀ)- ਬੰਗਲਾਦੇਸ਼ ਨੂੰ ਪਾਕਿਸਤਾਨ 1 ਲੱਖ ਟਨ ਚੌਲ ਨਿਰਯਾਤ ਕਰੇਗਾ। ਇਹ ਪਿਛਲੇ ਸਾਲ ਅਗਸਤ ਵਿਚ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਨੂੰ ਸੱਤਾ ਤੋਂ ਹਟਾਏ ਜਾਣ ਤੋਂ ਬਾਅਦ ਦੋਹਾਂ ਦੇਸ਼ਾਂ ਵਿਚਾਲੇ ਬਿਹਤਰ ਹੋਏ ਵਪਾਰਕ ਸਬੰਧਾਂ ਨੂੰ ਦਰਸਾਉਂਦਾ ਹੈ। ਟੀਸੀਪੀ ਦੇ ਇਕ ਅਧਿਕਾਰੀ ਮੁਤਾਬਕ ਇਸ ਸਬੰਧੀ ਪਿਛਲੇ ਹਫਤੇ 'ਟਰੇਡਿੰਗ ਕਾਰਪੋਰੇਸ਼ਨ ਆਫ ਪਾਕਿਸਤਾਨ' (ਟੀਸੀਪੀ) ਵੱਲੋਂ ਟੈਂਡਰ ਜਾਰੀ ਕੀਤਾ ਗਿਆ ਸੀ। ਇਹ ਪਾਕਿਸਤਾਨ ਤੋਂ ਬੰਗਲਾਦੇਸ਼ ਨੂੰ ਭੇਜੀ ਜਾਣ ਵਾਲੀ ਚੌਲ ਦੀ ਹੁਣ ਤੱਕ ਦੀ ਸਭ ਤੋਂ ਵੱਡੀ ਖੇਪ ਹੈ। ਇਸ ਸਾਲ ਫਰਵਰੀ ਵਿਚ ਦੋਹਾਂ ਦੇਸ਼ਾਂ ਵੱਲੋਂ ਚੌਲ ਆਯਾਤ ਦੇ ਨਾਲ ਸਰਕਾਰੀ ਪੱਧਰ 'ਤੇ ਵਪਾਰ ਸ਼ੁਰੂ ਕਰਨ ਦੇ ਬਾਅਦ 50,000 ਟਨ ਚੌਲ ਦੀ ਪਹਿਲੀ ਖੇਪ ਨਿਰਯਾਤ ਕੀਤੀ ਗਈ ਸੀ।

ਇਕ ਮੁੱਖ ਚੌਲ ਨਿਰਯਾਤਕ ਨੇ ਕਿਹਾ ਕਿ ਜੇਕਰ ਬੰਗਲਾਦੇਸ਼ ਨਾਲ ਵਪਾਰ ਵਧਾਉਣਾ ਹੈ ਤਾਂ ਇਹ ਕਾਰੋਬਾਰ ਲਈ ਚੰਗਾ ਹੋਵੇਗਾ, ਕਿਉਂਕਿ ਵਿੱਤੀ ਸਾਲ 2025-26 ਦੀ ਪਹਿਲੀ ਤਿਮਾਹੀ ਵਿਚ ਚੌਲ ਨਿਰਯਾਤ ਵਿਚ 28 ਫੀਸਦੀ ਦੀ ਗਿਰਾਵਟ ਆਈ ਹੈ। ਪੰਜਾਬ ਸੂਬੇ ਵਿਚ ਆਪਣੀ ਚੌਲ ਮਿੱਲ ਚਲਾਉਣ ਵਾਲੇ ਵਕਾਰ ਅਹਿਮਦ ਨੇ ਕਿਹਾ, ਸਰਕਾਰ ਵੱਲੋਂ ਸਾਨੂੰ ਕਈ ਰੁਕਾਵਟਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਜਿਸ ਨਾਲ ਪੂਰੀ ਪ੍ਰਕਿਰਿਆ ਗੁੰਝਲਦਾਰ ਹੋ ਜਾਂਦੀ ਹੈ। ਉਨ੍ਹਾਂ ਕਿਹਾ ਕਿ ਗਿਰਾਵਟ ਦਾ ਕਾਰਨ ਪਿਛਲੇ ਸਾਲ ਭਾਰਤ ਵੱਲੋਂ ਚੌਲ ਨਿਰਯਾਤ ਨੂੰ ਫਿਰ ਤੋਂ ਸ਼ੁਰੂ ਕਰਨਾ ਅਤੇ ਸਰਕਾਰ ਵੱਲੋਂ ਬਾਸਮਤੀ ਦੇ ਘੱਟੋ-ਘੱਟ ਨਿਰਯਾਤ ਮੁੱਲ ਨੂੰ ਹਟਾਉਣਾ ਅਤੇ ਚੌਲ ਨਿਰਯਾਤ 'ਤੇ ਜ਼ੀਰੋ ਦਰ ਲਾਗੂ ਕਰਨਾ ਹੈ। ਵਕਾਰ ਨੇ ਕਿਹਾ, "ਪਿਛਲੇ ਸਾਲ ਤੋਂ, ਪਾਕਿਸਤਾਨੀ ਨਿਰਯਾਤਕ ਭਾਰਤ ਨਾਲ ਵਧੀਆ ਮੁਕਾਬਲਾ ਕਰ ਰਹੇ ਹਨ ਅਤੇ ਸਾਡੇ ਕੋਲ ਚੌਲ ਨਿਰਯਾਤ ਵਧਾਉਣ ਦੇ ਮੌਕੇ ਹਨ, ਖਾਸ ਕਰਕੇ ਅਮਰੀਕੀ ਬਾਜ਼ਾਰ ਵਿੱਚ ਕਿਉਂਕਿ ਅਮਰੀਕਾ ਨੇ ਬਾਸਮਤੀ ਚੌਲਾਂ ਸਮੇਤ ਭਾਰਤੀ ਸਾਮਾਨਾਂ 'ਤੇ 50 ਫੀਸਦੀ ਟੈਰਿਫ ਲਗਾਇਆ ਹੈ।"