ਪਾਕਿਸਤਾਨ ਦੇ ''ਤਿੰਨ ਹਿੱਸਿਆਂ ''ਚ ਟੁੱਟਣ'' ਦੀ ਧਮਕੀ ''ਤੇ ਸ਼ਹਿਬਾਜ਼ ਨੇ ਇਮਰਾਨ ਨੂੰ ਦਿੱਤੀ ਚੇਤਾਵਨੀ

ਇਸਲਾਮਾਬਾਦ/ਅੰਕਾਰਾ (ਭਾਸ਼ਾ)- ਪਾਕਿਸਤਾਨ ਦੇ 'ਤਿੰਨ ਟੁਕੜਿਆਂ ਵਿੱਚ ਟੁੱਟਣ' ਦੀ ਇਮਰਾਨ ਖ਼ਾਨ ਦੀ ਟਿੱਪਣੀ 'ਤੇ ਤਿੱਖੀ ਪ੍ਰਤੀਕਿਰਿਆ ਦਿੰਦਿਆਂ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ਼ ਨੇ ਵੀਰਵਾਰ ਨੂੰ ਕਿਹਾ ਕਿ ਸਾਬਕਾ ਪ੍ਰਧਾਨ ਮੰਤਰੀ "ਜਨਤਕ ਅਹੁਦੇ ਲਈ ਯੋਗ ਨਹੀਂ" ਹਨ। ਫਿਲਹਾਲ ਤੁਰਕੀ ਦੀ ਯਾਤਰਾ ਕਰ ਰਹੇ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਨੇ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ ਦੇ ਸੁਪਰੀਮੋ 'ਤੇ "ਦੇਸ਼ ਵਿਰੁੱਧ ਧਮਕੀ" ਦੇਣ ਦਾ ਦੋਸ਼ ਲਗਾਇਆ ਅਤੇ ਆਪਣੇ ਪੂਰਵਜ ਨੂੰ "ਪਾਕਿਸਤਾਨ ਦੀ ਵੰਡ ਬਾਰੇ ਗੱਲ ਕਰਨ" ਵਿਰੁੱਧ ਚੇਤਾਵਨੀ ਦਿੱਤੀ। 

ਪ੍ਰਧਾਨ ਮੰਤਰੀ ਨੇ ਟਵੀਟ ਕੀਤਾ ਕਿ ਇਮਰਾਨ ਨਿਆਜ਼ੀ ਦੇਸ਼ ਵਿਰੁੱਧ ਧਮਕੀਆਂ ਦੇ ਰਿਹਾ ਹੈ ਜਦੋਂ ਮੈਂ ਤੁਰਕੀ ਵਿੱਚ ਸਮਝੌਤੇ 'ਤੇ ਦਸਤਖ਼ਤ ਕਰ ਰਿਹਾ ਹਾਂ। ਨਿਆਜ਼ੀ ਜਨਤਕ ਅਹੁਦੇ ਲਈ ਅਯੋਗ ਹਨ ਅਤੇ ਜੇਕਰ ਇਸ ਲਈ ਕਿਸੇ ਸਬੂਤ ਦੀ ਲੋੜ ਸੀ, ਤਾਂ ਉਸਦਾ ਤਾਜ਼ਾ ਇੰਟਰਵਿਊ ਹੀ ਕਾਫੀ ਹੈ। ਉਨ੍ਹਾਂ ਨੇ ਆਪਣੇ ਟਵੀਟ 'ਚ ਇਮਰਾਨ ਖਾਨ ਨੂੰ ਚਿਤਾਵਨੀ ਦਿੱਤੀ, 'ਆਪਣੀ ਰਾਜਨੀਤੀ ਕਰੋ ਪਰ ਸਰਹੱਦ ਪਾਰ ਕਰਨ ਅਤੇ ਪਾਕਿਸਤਾਨ ਦੀ ਵੰਡ ਦੀ ਗੱਲ ਕਰਨ ਦੀ ਹਿੰਮਤ ਨਾ ਕਰੋ।' ਟਵਿੱਟਰ 'ਤੇ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ਼ (ਪੀ.ਐੱਮ.ਐੱਲ.-ਐੱਨ.) ਦੇ ਪ੍ਰਧਾਨ ਮੰਤਰੀ ਦੀਆਂ ਤਾਜ਼ਾ ਟਿੱਪਣੀਆਂ ਖਾਨ ਦੁਆਰਾ ਇੱਕ ਨਿੱਜੀ ਨਿਊਜ਼ ਗਰੁੱਪ "ਬੋਲ ਨਿਊਜ਼" ਨੂੰ ਦਿੱਤੇ ਇੰਟਰਵਿਊ ਦਾ ਹਵਾਲਾ ਦਿੰਦੀਆਂ ਹਨ। ਇਸ ਇੰਟਰਵਿਊ ਵਿੱਚ ਪੀਟੀਆਈ ਮੁਖੀ ਨੇ ਸਰਕਾਰ ਨੂੰ "ਸਹੀ ਫ਼ੈਸਲਾ" ਲੈਣ ਦੀ ਅਪੀਲ ਕੀਤੀ ਅਤੇ ਚੇਤਾਵਨੀ ਦਿੱਤੀ ਕਿ ਜੇਕਰ ਪਾਕਿਸਤਾਨ ਆਪਣੀ ਪਰਮਾਣੂ ਸ਼ਕਤੀ ਗੁਆ ਬੈਠਦਾ ਹੈ, ਤਾਂ ਉਹ "ਤਿੰਨ ਟੁਕੜਿਆਂ" ਵਿੱਚ ਵੰਡਿਆ ਜਾਵੇਗਾ। 

ਪੜ੍ਹੋ ਇਹ ਅਹਿਮ ਖ਼ਬਰ -ਪਾਕਿਸਤਾਨ 'ਚ ਮਹਿੰਗਾਈ ਨੇ ਕੱਢੇ ਵੱਟ, ਘਿਓ 208 ਰੁਪਏ ਅਤੇ ਤੇਲ 213 ਰੁਪਏ ਹੋਇਆ ਮਹਿੰਗਾ

ਕ੍ਰਿਕਟਰ ਤੋਂ ਸਿਆਸਤਦਾਨ ਬਣੇ ਇਮਰਾਨ ਨੇ ਇਹ ਵੀ ਕਿਹਾ ਕਿ ਮੌਜੂਦਾ ਸਿਆਸੀ ਸਥਿਤੀ ਦੇਸ਼ ਦੇ ਨਾਲ-ਨਾਲ ਸਰਕਾਰ ਲਈ ਵੀ ਸਮੱਸਿਆ ਹੈ।ਉਹਨਾਂ ਨੇ ਕਿਹਾ ਕਿ "ਜੇ ਸਰਕਾਰ ਨੇ ਸਹੀ ਫ਼ੈਸਲਾ ਨਹੀਂ ਲਿਆ, ਤਾਂ ਮੈਂ ਤੁਹਾਨੂੰ ਲਿਖਤੀ ਰੂਪ ਵਿੱਚ  ਭਰੋਸਾ ਦੇ ਸਕਦਾ ਹਾਂ ਕਿ ਕਿਸੇ ਹੋਰ ਤੋਂ ਪਹਿਲਾਂ ਉਹ ਅਤੇ ਫ਼ੌਜ ਨਸ਼ਟ ਹੋ ਜਾਵੇਗੀ ਕਿਉਂਕਿ ਜੇਕਰ ਦੇਸ਼ ਦੀਵਾਲੀਆ ਹੋ ਗਿਆ ਤਾਂ ਦੇਸ਼ ਦਾ ਕੀ ਹੋਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਪਾਕਿਸਤਾਨ ਕਰਜ਼ ਡਿਫਾਲਟ ਵੱਲ ਜਾ ਰਿਹਾ ਹੈ। ਜੇਕਰ ਅਜਿਹਾ ਹੁੰਦਾ ਹੈ ਤਾਂ ਕਿਹੜੀ ਸੰਸਥਾ (ਸਭ ਤੋਂ ਵੱਧ) ਪ੍ਰਭਾਵਿਤ ਹੋਵੇਗੀ? ਫ਼ੌਜ। ਇਸ ਦੇ ਇੱਕ ਵਾਰ ਪ੍ਰਭਾਵਿਤ ਹੋਣ 'ਤੇ ਸਾਡੇ ਤੋਂ ਕੀ ਰਿਆਇਤ ਲਈ ਜਾਵੇਗੀ? ਪ੍ਰਮਾਣੂ ਨਿਸ਼ਸਤਰੀਕਰਨ।" ਉਨ੍ਹਾਂ ਕਿਹਾ ਕਿ ਦੇਸ਼ ‘ਖੁਦਕੁਸ਼ੀ’ ਵੱਲ ਜਾ ਰਿਹਾ ਹੈ ਅਤੇ ਸਰਕਾਰ ਨੂੰ ‘ਸਹੀ ਫ਼ੈਸਲਾ’ ਲੈਣ ਦੀ ਲੋੜ ਹੈ। 

ਪੀਐਮਐਲ-ਐਨ ਦੇ ਟਵਿੱਟਰ ਹੈਂਡਲ 'ਤੇ ਸਾਂਝੇ ਕੀਤੇ ਗਏ ਇੱਕ ਵੱਖਰੇ ਬਿਆਨ ਵਿੱਚ ਸ਼ਹਿਬਾਜ਼ ਸ਼ਰੀਫ ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਗਿਆ ਕਿ ਖਾਨ ਦੀ ਟਿੱਪਣੀ ਇਸ ਗੱਲ ਦਾ ਸਬੂਤ ਹੈ ਕਿ ਪੀਟੀਆਈ ਮੁਖੀ "ਰਾਜਨੀਤੀ ਵਿੱਚ ਨਹੀਂ, ਇੱਕ ਸਾਜ਼ਿਸ਼ ਵਿੱਚ ਸ਼ਾਮਲ ਸਨ।" ਪੀਐਮਐਲ-ਐਨ ਦੇ ਟਵੀਟ ਵਿੱਚ ਸ਼ਰੀਫ਼ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ ਇਹ ਕੋਈ ਬਿਆਨ ਨਹੀਂ ਹੈ, ਸਗੋਂ ਦੇਸ਼ ਵਿੱਚ ਅਰਾਜਕਤਾ ਅਤੇ ਵੰਡ ਦੀ ਅੱਗ ਨੂੰ ਭੜਕਾਉਣ ਦੀ ਸਾਜ਼ਿਸ਼ ਹੈ। ਇਸ ਤੋਂ ਪਹਿਲਾਂ, ਖਾਨ ਦੀ ਟਿੱਪਣੀ ਦੀ ਨਿੰਦਾ ਕਰਦੇ ਹੋਏ, ਪਾਕਿਸਤਾਨ ਪੀਪਲਜ਼ ਪਾਰਟੀ (ਪੀਪੀਪੀ) ਦੇ ਸਹਿ-ਪ੍ਰਧਾਨ ਆਸਿਫ ਅਲੀ ਜ਼ਰਦਾਰੀ ਨੇ ਟਵੀਟ ਕੀਤਾ ਕਿ ਇਮਰਾਨ ਖਾਨ, ਇਸ ਦੁਨੀਆ ਵਿੱਚ ਸ਼ਕਤੀ ਹੀ ਸਭ ਕੁਝ ਨਹੀਂ ਹੈ। ਹਿੰਮਤੀ ਬਣੋ ਅਤੇ ਆਪਣੇ ਪੈਰਾਂ 'ਤੇ ਖੜ੍ਹੇ ਹੋ ਕੇ ਰਾਜਨੀਤੀ ਕਰਨਾ ਸਿੱਖੋ।