ਪੰਜਾਬ ਲਾਕਡਾਊਨ ''ਤੇ ਕੈਨੇਡਾ ''ਚ ਪੰਜਾਬਣ ਦੀ ਪਟੀਸ਼ਨ, ਵਿੱਢੀ ਇਹ ਮੁਹਿੰਮ

03/28/2020 7:27:04 PM

ਟੋਰਾਂਟੋ : ਓਂਟਾਰੀਓ ਦੀ ਇਕ ਪੰਜਾਬਣ ਦੇ ਪਰਿਵਾਰਕ ਮੈਂਬਰ ਭਾਰਤ ਲਾਕਡਾਊਨ ਹੋਣ ਕਾਰਨ ਪੰਜਾਬ ਵਿਚ ਫਸ ਗਏ ਹਨ, ਜਿਸ ਨੂੰ ਲੈ ਕੇ ਉਸ ਨੇ ਇਕ ਆਨਲਾਈਨ ਪਟੀਸ਼ਨ ਦਰਜ ਕੀਤੀ ਹੈ ਤਾਂ ਕਿ ਲੋਕਾਂ ਦਾ ਸਮਰਥਨ ਲੈ ਕੇ ਉਹ ਕੈਨੇਡਾ ਸਰਕਾਰ 'ਤੇ ਦਬਾਅ ਬਣਾ ਸਕੇ। ਪਟੀਸ਼ਨਕਰਤਾ ਰਿਤੂ ਸਹੋਤਾ ਨੇ ਆਪਣੇ ਪਰਿਵਾਰ ਨੂੰ ਭਾਰਤ ਤੋਂ ਵਾਪਸ ਲਿਆਉਣ ਲਈ ਜੋ ਮੁਹਿੰਮ ਵਿੱਢੀ ਹੈ, ਉਸ ਨੂੰ ਲੋਕਾਂ ਦਾ ਭਾਰੀ ਸਮਰਥਨ ਵੀ ਮਿਲ ਰਿਹਾ ਹੈ। ਪਟੀਸ਼ਨ ਲਾਂਚ ਹੋਣ ਦੇ ਤਿੰਨ ਦਿਨਾਂ ਵਿਚ ਇਸ 'ਤੇ 10,000 ਤੋਂ ਵੱਧ ਦਸਤਖਤ ਹੋ ਚੁੱਕੇ ਹਨ। 

PunjabKesari


ਰਿਤੂ ਸਹੋਤਾ ਦਾ ਕਹਿਣਾ ਹੈ ਕਿ ਉਸ ਦੇ ਪਿਤਾ ਤੇ ਗ੍ਰੈਂਡ ਪੇਰੈਂਟਸ ਪੰਜਾਬ ਵਿਚ ਫਸੇ ਹੋਏ ਹਨ। ਚਾਰੋਂ ਰਿਸ਼ਤੇਦਾਰ ਸਿਹਤ ਸੰਬੰਧੀ ਚਿੰਤਾਵਾਂ ਦਾ ਸਾਹਮਣਾ ਕਰ ਰਹੇ ਹਨ ਅਤੇ ਉਸ ਦੇ ਪਿਤਾ ਦੀ ਦਵਾਈ ਜਲਦ ਖਤਮ ਹੋਣ ਵਾਲੀ ਹੈ।

PunjabKesari

ਸਹੋਤਾ ਨੇ ਕੈਨੇਡੀਅਨ ਸਰਕਾਰ ਨੂੰ ਉਸ ਦੇ ਪਰਿਵਾਰ ਨੂੰ ਘਰ ਲਿਆਉਣ ਦੀ ਮੰਗ ਕੀਤੀ ਹੈ। ਸਹੋਤਾ ਨੇ ਕੈਨੇਡੀਅਨ ਸੰਸਦ ਮੈਂਬਰਾਂ ਅਤੇ ਐੱਮ. ਪੀ. ਪੀਜ਼. ਨੂੰ ਈਮੇਲ ਵੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਮੈਨੂੰ ਵਾਰ-ਵਾਰ ਇਹ ਹੀ ਜਵਾਬ ਮਿਲ ਰਹੇ ਹਨ ਕਿ ਇਸ ਸਮੇਂ ਇਹ ਮੁਸ਼ਕਲ ਹੈ। ਰਿਤੂ ਨੇ ਕਿਹਾ ਕਿ ਕੈਨੇਡਾ ਸਰਕਾਰ ਦੁਨੀਆ ਭਰ ਦੀਆਂ ਥਾਵਾਂ ਤੋਂ ਫਸੇ ਕੈਨੇਡੀਅਨਾਂ ਨੂੰ ਵਾਪਸ ਲਿਆ ਰਹੀ ਹੈ। ਪਿਛਲੇ ਹਫਤੇ ਪੇਰੂ, ਮੋਰੱਕੋ, ਹਾਂਡੂਰਸ, ਸਪੇਨ, ਇਕੂਏਟਰ, ਅਲ ਸਲਵਾਡੋਰ ਅਤੇ ਗੁਆਟੇਮਾਲਾ ਤੋਂ ਕੈਨੇਡੀਅਨ ਲਿਆਂਦੇ ਗਏ ਹਨ।

PunjabKesari

ਦੂਜੇ ਦੇਸ਼ਾਂ ਨੇ ਵੀ ਆਪਣੇ ਨਾਗਰਿਕਾਂ ਨੂੰ ਲਿਆਉਣ ਲਈ ਭਾਰਤ ਨੂੰ ਵਿਸ਼ੇਸ਼ ਉਡਾਣਾਂ ਭੇਜੀਆਂ ਹਨ। ਬੁੱਧਵਾਰ ਨੂੰ ਜਰਮਨੀ ਨੇ ਦਿੱਲੀ ਤੋਂ ਫਰੈਂਕਫਰਟ ਲਈ ਇਕ ਵਿਸ਼ੇਸ਼ ਉਡਾਣ ਭੇਜੀ ਸੀ। ਭਾਰਤ ਵਿਚ 15 ਹਜ਼ਾਰ ਕੈਨੇਡੀਅਨ ਫਸੇ ਹਨ। ਸਹੋਤਾ ਨੇ ਕਿਹਾ ਹੈ ਕਿ ਕੈਨੇਡਾ ਨੂੰ ਵੀ ਚਾਹੀਦਾ ਹੈ ਕਿ ਉਹ ਵੀ ਭਾਰਤ ਤੋਂ ਆਪਣੇ ਨਾਗਰਿਕਾਂ ਨੂੰ ਲੈਣ ਲਈ ਵਿਸ਼ੇਸ਼ ਜਹਾਜ਼ ਭੇਜੇ। ਉਨ੍ਹਾਂ ਕਿਹਾ ਕਿ ਅਜਿਹਾ ਨਹੀਂ ਕਿ ਭਾਰਤ ਹੋਰ ਦੇਸ਼ਾਂ ਨੂੰ ਆਪਣੇ ਨਾਗਰਿਕਾਂ ਨੂੰ ਲਿਜਾਣ ਦੀ ਆਗਿਆ ਨਹੀਂ ਦੇ ਰਿਹਾ ਬਸ ਕੈਨੇਡਾ ਸਰਕਾਰ ਹੀ ਕੋਸ਼ਿਸ਼ ਨਹੀਂ ਕਰ ਰਹੀ। 

PunjabKesari


Sanjeev

Content Editor

Related News