ਪਾਕਿਸਤਾਨ ''ਚ ਬੈਂਕ ਡਕੈਤੀ ਦੌਰਾਨ ਇਕ ਵਿਅਕਤੀ ਦੀ ਮੌਤ ਤੇ ਪੰਜ ਜ਼ਖਮੀ

ਇਸਲਾਮਾਬਾਦ : ਮੰਗਲਵਾਰ ਨੂੰ ਇੱਥੇ ਇਕ ਬੈਂਕ ਦੇ ਬਾਹਰ ਕੈਸ਼ ਵੈਨ ਅਤੇ ਸੁਰੱਖਿਆ ਗਾਰਡਾਂ 'ਤੇ ਲੁਟੇਰੇ ਵੱਲੋਂ ਗੋਲੀਬਾਰੀ ਕਰਨ ਨਾਲ ਇਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਪੰਜ ਹੋਰ ਜ਼ਖਮੀ ਹੋ ਗਏ। ਸੂਤਰਾਂ ਨੇ ਸਿਨਹੂਆ ਨਿਊਜ਼ ਏਜੰਸੀ ਨੂੰ ਦੱਸਿਆ ਕਿ ਇਹ ਘਟਨਾ ਪਾਕਿਸਤਾਨ ਦੀ ਸੰਘੀ ਰਾਜਧਾਨੀ ਦੇ ਵਿਅਸਤ G-9 ਖੇਤਰ 'ਚ ਵਾਪਰੀ, ਜਿੱਥੇ ਇੱਕ ਬਾਈਕ 'ਤੇ ਸਵਾਰ ਅਣਪਛਾਤੇ ਲੁਟੇਰੇ ਨੇ ਕੈਸ਼ ਵੈਨ 'ਤੇ ਗੋਲੀਬਾਰੀ ਕੀਤੀ।

ਸੂਤਰਾਂ ਨੇ ਕਿਹਾ ਕਿ ਲੁਟੇਰੇ ਨੇ ਇੱਕ ਗੈਰ-ਰਜਿਸਟਰਡ ਮੋਟਰਸਾਈਕਲ ਦੀ ਵਰਤੋਂ ਕਰਕੇ ਹਮਲਾ ਕੀਤਾ। ਉਸ ਨੇ ਇੱਕ ਰਾਈਡ-ਹੇਲਿੰਗ ਕੰਪਨੀ ਦਾ ਹੈਲਮੇਟ ਪਾਇਆ ਹੋਇਆ ਸੀ ਅਤੇ ਇੱਕ ਸਬਮਸ਼ੀਨ ਗੰਨ ਨਾਲ ਲੈਸ ਸੀ। ਗੋਲੀਬਾਰੀ ਕਾਰਨ ਬੈਂਕ ਨੂੰ ਨਕਦੀ ਪਹੁੰਚਾਉਣ ਵਾਲੀ ਸੁਰੱਖਿਆ ਕੰਪਨੀ ਦੇ ਤਿੰਨ ਸੁਰੱਖਿਆ ਗਾਰਡ ਅਤੇ ਨੇੜਲੇ ਰੈਸਟੋਰੈਂਟ ਦੇ ਦੋ ਕਰਮਚਾਰੀ ਜ਼ਖਮੀ ਹੋ ਗਏ ਜਦਕਿ ਰੈਸਟੋਰੈਂਟ ਦਾ ਇਕ ਹੋਰ ਕਰਮਚਾਰੀ ਮਾਰਿਆ ਗਿਆ। ਉਨ੍ਹਾਂ ਨੇ ਦੱਸਿਆ ਕਿ ਲੁਟੇਰਾ 850,000 ਰੁਪਏ (3,000 ਅਮਰੀਕੀ ਡਾਲਰ ਤੋਂ ਵੱਧ) ਨਕਦ ਲੈ ਕੇ ਭੱਜਣ ਵਿੱਚ ਕਾਮਯਾਬ ਹੋ ਗਿਆ।

ਸੋਮਵਾਰ ਸਵੇਰ ਤੋਂ ਇਸਲਾਮਾਬਾਦ ਵਿੱਚ ਇੱਕ ਮੋਟਰਸਾਈਕਲ ਸਵਾਰ ਹਮਲਾਵਰ ਵੱਲੋਂ ਬੈਂਕ ਲੁੱਟਣ ਦੀ ਇਹ ਤੀਜੀ ਵਾਰਦਾਤ ਸੀ। ਸੂਤਰਾਂ ਨੇ ਦੱਸਿਆ ਕਿ ਪਹਿਲਾਂ ਸ਼ਹਿਰ ਦੇ ਬਾਹਰਵਾਰ ਦੋ ਬੈਂਕਾਂ ਦੇ ਬਾਹਰ ਬੈਂਕ ਕੈਸ਼ ਵੈਨਾਂ ਨਾਲ ਅਜਿਹੀ ਵਾਰਦਾਤ ਵਾਪਰ ਚੁੱਕੀ ਹੈ।