ਕਿਮ ਜੋਂਗ ਉਨ ਦੀ ਸੁਰੱਖਿਆ ''ਚ ਵੱਡਾ ਫੇਰਬਦਲ, ਸਿਖਰਲੇ ਸੁਰੱਖਿਆ ਅਧਿਕਾਰੀ ਹਟਾਏ

ਸਿਓਲ/ਪਿਓਂਗਯਾਂਗ: ਉੱਤਰੀ ਕੋਰੀਆ ਦੇ ਤਾਨਾਸ਼ਾਹ ਕਿਮ ਜੋਂਗ ਉਨ ਦੀ ਸੁਰੱਖਿਆ ਨੂੰ ਲੈ ਕੇ ਵੱਡੀ ਖਬਰ ਸਾਹਮਣੇ ਆਈ ਹੈ। ਦੱਖਣੀ ਕੋਰੀਆ ਦੇ ਇੱਕ ਅਹਿਮ ਵਿਸ਼ਲੇਸ਼ਣ ਮੁਤਾਬਕ, ਉੱਤਰੀ ਕੋਰੀਆ ਨੇ ਪਿਛਲੇ ਕੁਝ ਸਾਲਾਂ 'ਚ ਆਪਣੇ ਸਿਖਰਲੇ ਨੇਤਾ ਦੀ ਸੁਰੱਖਿਆ ਲਈ ਜ਼ਿੰਮੇਵਾਰ ਤਿੰਨ ਪ੍ਰਮੁੱਖ ਸੁਰੱਖਿਆ ਢਾਂਚਿਆਂ ਦੇ ਮੁਖੀਆਂ ਨੂੰ ਬਦਲ ਦਿੱਤਾ ਹੈ। ਸਿਓਲ ਸਥਿਤ ਏਕੀਕਰਨ ਮੰਤਰਾਲੇ (Unification Ministry) ਨੇ ਖੁਲਾਸਾ ਕੀਤਾ ਹੈ ਕਿ ਵਰਕਰਜ਼ ਪਾਰਟੀ ਦੇ ਗਾਰਡ ਆਫਿਸ, ਸਟੇਟ ਅਫੇਅਰਜ਼ ਕਮਿਸ਼ਨ ਦੇ ਗਾਰਡ ਵਿਭਾਗ ਅਤੇ ਗਾਰਡ ਕਮਾਂਡ ਦੇ ਚੀਫ ਹਟਾ ਦਿੱਤੇ ਗਏ ਹਨ।

ਸੁਰੱਖਿਆ ਮੁਖੀਆਂ ਦਾ ਬਦਲਣਾ ਹੈ ਅਸਾਧਾਰਨ
ਸੂਤਰਾਂ ਅਨੁਸਾਰ ਇੰਨੇ ਘੱਟ ਸਮੇਂ ਵਿੱਚ ਸਾਰੇ ਪ੍ਰਮੁੱਖ ਸੁਰੱਖਿਆ ਮੁਖੀਆਂ ਦਾ ਬਦਲਿਆ ਜਾਣਾ ਕਾਫ਼ੀ ਅਸਾਧਾਰਨ ਅਤੇ ਹੈਰਾਨੀਜਨਕ ਮੰਨਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਉੱਤਰੀ ਕੋਰੀਆ ਦੇ ਚੋਟੀ ਦੇ ਫੌਜੀ ਨੇਤਾ ਰੀ ਪਿਓਂਗ-ਚੋਲ ਨੂੰ ਵੀ ਸੱਤਾਧਾਰੀ ਪਾਰਟੀ ਦੇ ਮਿਲਟਰੀ ਸੈਂਟਰਲ ਕਮਿਸ਼ਨ ਦੇ ਉਪ-ਪ੍ਰਧਾਨ ਦੇ ਅਹੁਦੇ ਤੋਂ ਹਟਾਏ ਜਾਣ ਦੀ ਸੰਭਾਵਨਾ ਹੈ। ਅਕਤੂਬਰ 2025 ਵਿੱਚ ਹੋਣ ਵਾਲੀ ਫੌਜੀ ਪਰੇਡ ਦੀਆਂ ਤਿਆਰੀਆਂ ਦੌਰਾਨ ਨਵੇਂ ਅਧਿਕਾਰੀਆਂ ਦੀ ਮੌਜੂਦਗੀ ਨੇ ਇਸ ਵੱਡੇ ਫੇਰਬਦਲ ਦੀ ਪੁਸ਼ਟੀ ਕੀਤੀ ਹੈ।

ਰੂਸ-ਯੂਕਰੇਨ ਜੰਗ 'ਚ ਮਾਰੇ ਗਏ ਸੈਨਿਕਾਂ ਲਈ ਅਜਾਇਬ ਘਰ
ਇਨ੍ਹਾਂ ਸਿਆਸੀ ਹਲਚਲਾਂ ਦਰਮਿਆਨ ਕਿਮ ਜੋਂਗ ਉਨ ਹਾਲ ਹੀ ਵਿੱਚ ਰੂਸ-ਯੂਕਰੇਨ ਜੰਗ ਵਿੱਚ ਮਾਰੇ ਗਏ ਉੱਤਰੀ ਕੋਰੀਆਈ ਸੈਨਿਕਾਂ ਦੀ ਯਾਦ ਵਿੱਚ ਬਣਾਏ ਜਾ ਰਹੇ ਸਮਾਰਕ ਅਜਾਇਬ ਘਰ ਦੇ ਨਿਰਮਾਣ ਸਥਾਨ 'ਤੇ ਪਹੁੰਚੇ। ਉਨ੍ਹਾਂ ਨੇ ਇਨ੍ਹਾਂ ਸੈਨਿਕਾਂ ਦੀ ਕੁਰਬਾਨੀ ਨੂੰ ਦੇਸ਼ ਦੀ ਤਾਕਤ ਦੀ "ਅਨੰਤ ਨੀਂਹ" ਦੱਸਿਆ। ਇਹ ਪਹਿਲੀ ਵਾਰ ਹੈ ਜਦੋਂ ਪਿਓਂਗਯਾਂਗ ਵਿਦੇਸ਼ਾਂ 'ਚ ਮਾਰੇ ਗਏ ਆਪਣੇ ਸੈਨਿਕਾਂ ਲਈ ਕੋਈ ਅਧਿਕਾਰਤ ਅਜਾਇਬ ਘਰ ਬਣਾ ਰਿਹਾ ਹੈ। ਰਿਪੋਰਟਾਂ ਮੁਤਾਬਕ ਉੱਤਰੀ ਕੋਰੀਆ ਨੇ ਰੂਸ ਦੀ ਮਦਦ ਲਈ 10,000 ਤੋਂ ਵੱਧ ਸੈਨਿਕ ਭੇਜੇ ਹਨ, ਜਿਨ੍ਹਾਂ ਵਿੱਚੋਂ ਹਜ਼ਾਰਾਂ ਦੇ ਮਾਰੇ ਜਾਣ ਦਾ ਖਦਸ਼ਾ ਹੈ।

ਪਰਿਵਾਰ ਨਾਲ ਨਜ਼ਰ ਆਏ ਕਿਮ
ਇਸ ਦੌਰੇ ਦੌਰਾਨ ਕਿਮ ਜੋਂਗ ਉਨ ਦੇ ਨਾਲ ਉਨ੍ਹਾਂ ਦੀ ਪਤਨੀ ਰੀ ਸੋਲ-ਜੂ ਅਤੇ ਬੇਟੀ ਜੂ-ਏ ਵੀ ਨਜ਼ਰ ਆਈਆਂ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਘਟਨਾਕ੍ਰਮ ਉੱਤਰੀ ਕੋਰੀਆ ਦੀਆਂ ਅੰਦਰੂਨੀ ਸੁਰੱਖਿਆ ਚਿੰਤਾਵਾਂ, ਨਵੀਂ ਫੌਜੀ ਰਣਨੀਤੀ ਅਤੇ ਰੂਸ ਵਰਗੇ ਦੇਸ਼ਾਂ ਨਾਲ ਵਧਦੀ ਗਠਜੋੜ ਦੀ ਸਾਂਝ ਨੂੰ ਦਰਸਾਉਂਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e