ਕੈਨੇਡਾ 'ਚ ਰੂਹ ਕੰਬਾਊ ਘਟਨਾ; ਕਲਯੁੱਗੀ ਮਾਂ ਨੇ ਕੂੜੇ 'ਚ ਸੁੱਟ 'ਤਾ ਮੁੰਡਾ ! ਫਿਰ ਵੀ ਅਦਾਲਤ ਨੇ ਨਹੀਂ ਸੁਣਾਈ ਸਜ਼ਾ

ਟੋਰਾਂਟੋ-  ਕੈਨੇਡਾ ਦੇ ਟੋਰਾਂਟੋ ਤੋਂ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨੇ ਸਭ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਕ 30 ਸਾਲਾ ਮਾਂ ਨੇ ਆਪਣੇ ਹੀ ਚਾਰ ਮਹੀਨੇ ਦੇ ਬੱਚੇ ਨੂੰ ਇਮਾਰਤ ਦੀ ਅੱਠਵੀਂ ਮੰਜ਼ਿਲ ਤੋਂ ਕੂੜਾ ਸੁੱਟਣ ਵਾਲੀ ਪਾਈਪ (garbage chute) ਵਿਚ ਸੁੱਟ ਦਿੱਤਾ। ਹਾਲਾਂਕਿ ਅਦਾਲਤ ਨੇ ਮਹਿਲਾ ਦੀ ਮਾਨਸਿਕ ਹਾਲਤ ਨੂੰ ਦੇਖਦੇ ਹੋਏ ਉਸ ਨੂੰ 'ਕਾਤਲ' ਨਹੀਂ ਮੰਨਿਆ ਅਤੇ "ਨੋਟ ਕ੍ਰਿਮੀਨਲੀ ਰਿਸਪੌਂਸੀਬਲ" (NCR) ਕਰਾਰ ਦਿੱਤਾ ਹੈ।

ਇਹ ਹੈ ਪੂਰਾ ਮਾਮਲਾ? 

ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਇਹ ਘਟਨਾ ਨਵੰਬਰ 2024 ਦੀ ਹੈ। ਮਿਡਟਾਊਨ ਟੋਰਾਂਟੋ ਦੀ ਇਕ ਉੱਚੀ ਇਮਾਰਤ ਦੀ ਅੱਠਵੀਂ ਮੰਜ਼ਿਲ 'ਤੇ ਰਹਿਣ ਵਾਲੀ ਇਸ ਮਹਿਲਾ ਨੇ ਆਪਣੇ ਪਤੀ ਦੇ ਘਰੋਂ ਬਾਹਰ ਜਾਣ ਤੋਂ ਬਾਅਦ ਬੱਚੇ ਨੂੰ ਕੂੜਾ ਸੁੱਟਣ ਵਾਲੀ ਪਾਈਪ ਵਿਚ ਸੁੱਟ ਦਿੱਤਾ ਅਤੇ ਖੁਦ ਵੀ ਉੱਥੋਂ ਕੂਦਣ ਦੀ ਕੋਸ਼ਿਸ਼ ਕੀਤੀ। ਜਦੋਂ ਬੱਚੇ ਦਾ ਪਿਓ ਵਾਪਸ ਆਇਆ ਅਤੇ ਉਸ ਨੇ ਬੱਚੇ ਬਾਰੇ ਪੁੱਛਿਆ, ਤਾਂ ਮਹਿਲਾ ਨੇ ਬੇਹੱਦ ਅਜੀਬ ਜਵਾਬ ਦਿੱਤਾ: "ਮੈਨੂੰ ਨਹੀਂ ਪਤਾ ਬੱਚਾ ਕਿੱਥੇ ਹੈ.. ਸ਼ਾਇਦ ਉਹ ਕੂੜੇਦਾਨ ਵਿੱਚ ਹੋਵੇਗਾ"। ਪੁਲਿਸ ਨੂੰ ਬੱਚੇ ਦੀ ਲਾਸ਼ ਬਿਲਡਿੰਗ ਦੇ ਬੇਸਮੈਂਟ ਵਿਚ ਕੂੜੇ ਦੇ ਵਿਚਕਾਰ ਮਿਲੀ।

ਪੜ੍ਹੋ ਇਹ ਅਹਿਮ ਖ਼ਬਰ- ਕੈਨੇਡਾ ਜਾਣ ਦਾ ਚਾਅ ਪਿਆ ਫਿੱਕਾ! ਕੋਵਿਡ ਕਾਲ ਤੋਂ ਵੀ ਮਾੜੇ ਹੋਏ ਹਾਲਾਤ

ਓਂਟਾਰੀਓ ਸੁਪੀਰੀਅਰ ਕੋਰਟ ਦੀ ਜੱਜ ਜੇਨ ਕੈਲੀ ਨੇ ਸੁਣਵਾਈ ਦੌਰਾਨ ਕਿਹਾ ਕਿ ਮਹਿਲਾ 'ਸਿਜ਼ੋਫ੍ਰੇਨੀਆ' ਵਰਗੇ ਗੰਭੀਰ ਮਾਨਸਿਕ ਲੱਛਣਾਂ ਤੋਂ ਪੀੜਤ ਸੀ। ਅਦਾਲਤ ਅਨੁਸਾਰ ਉਸ ਸਮੇਂ ਮਹਿਲਾ ਨੂੰ ਇਹ ਸਮਝ ਨਹੀਂ ਸੀ ਕਿ ਉਹ ਜੋ ਕਰ ਰਹੀ ਹੈ, ਉਹ ਨੈਤਿਕ ਤੌਰ 'ਤੇ ਗਲਤ ਹੈ। ਇਸੇ ਆਧਾਰ 'ਤੇ ਉਸ ਨੂੰ ਅਪਰਾਧਿਕ ਤੌਰ 'ਤੇ ਜ਼ਿੰਮੇਵਾਰ ਨਹੀਂ ਠਹਿਰਾਇਆ ਗਿਆ। ਇੱਕ ਫੋਰੈਂਸਿਕ ਮਨੋਵਿਗਿਆਨੀ ਜਿਸਨੇ ਕਰੇਸਾ ਐਡਵਰਡਸ ਦਾ ਮੁਲਾਂਕਣ ਕੀਤਾ, ਨੇ ਗਵਾਹੀ ਦਿੱਤੀ ਕਿ 30 ਸਾਲਾ ਔਰਤ ਉਸ ਸਮੇਂ ਮਾਨਸਿਕ ਤੌਰ 'ਤੇ ਬਿਮਾਰ ਸੀ ਅਤੇ ਉਸਨੇ ਇਸ ਹਾਲਤ ਵਿਚ ਆਪਣੇ ਪੁੱਤਰ ਨੂੰ ਕੂੜੇ ਦੇ ਢੇਰ ਵਿੱਚ ਸੁੱਟ ਦਿੱਤਾ।

ਪੜ੍ਹੋ ਇਹ ਅਹਿਮ ਖ਼ਬਰ- ਨਹੀਂ ਰਹੇ ਧਾਕੜ ਫੁੱਟਬਾਲ ਖਿਡਾਰੀ ਧਰਮਿੰਦਰ ਸਿੰਘ ਸੰਘੇੜਾ, ਅਮਰੀਕਾ 'ਚ ਲਿਆ ਆਖਰੀ ਸਾਹ

ਪੋਸਟਪਾਰਟਮ ਸਾਈਕੋਸਿਸ: ਇਕ ਭਿਆਨਕ ਸਥਿਤੀ 

ਮਾਹਿਰਾਂ ਅਨੁਸਾਰ, ਬੱਚੇ ਨੂੰ ਜਨਮ ਦੇਣ ਤੋਂ ਬਾਅਦ ਕਈ ਮਹਿਲਾਵਾਂ 'ਪੋਸਟਪਾਰਟਮ ਡਿਪ੍ਰੈਸ਼ਨ' ਦਾ ਸ਼ਿਕਾਰ ਹੋ ਜਾਂਦੀਆਂ ਹਨ, ਜੋ ਗੰਭੀਰ ਹੋਣ 'ਤੇ 'ਪੋਸਟਪਾਰਟਮ ਸਾਈਕੋਸਿਸ' (Postpartum Psychosis) ਦਾ ਰੂਪ ਲੈ ਲੈਂਦਾ ਹੈ। ਇਹ ਇਕ ਅਜਿਹੀ ਮਾਨਸਿਕ ਹਾਲਤ ਹੈ ਜਿਸ ਵਿਚ ਮਾਂ ਦੀ ਹਕੀਕਤ ਸਮਝਣ ਦੀ ਸਮਰੱਥਾ ਖ਼ਤਮ ਹੋ ਜਾਂਦੀ ਹੈ ਅਤੇ ਉਹ ਭਰਮ ਜਾਂ ਆਵਾਜ਼ਾਂ ਸੁਣਨ ਵਰਗੀਆਂ ਸਥਿਤੀਆਂ ਵਿਚ ਆਪਣੇ ਹੀ ਬੱਚੇ ਨੂੰ ਨੁਕਸਾਨ ਪਹੁੰਚਾ ਸਕਦੀ ਹੈ। ਨਿਊਰੋਸਾਇੰਸ ਅਨੁਸਾਰ ਇਹ ਸਥਿਤੀ ਦਿਮਾਗ ਵਿਚ ਡੋਪਾਮਿਨ ਵਰਗੇ ਨਿਊਰੋਟ੍ਰਾਂਸਮੀਟਰਾਂ ਦੇ ਅਸੰਤੁਲਨ ਅਤੇ ਹਾਰਮੋਨਲ ਬਦਲਾਅ ਕਾਰਨ ਹੁੰਦੀ ਹੈ। ਅਜਿਹੇ ਮਾਮਲਿਆਂ ਵਿਚ ਸਜ਼ਾ ਨਾਲੋਂ ਮਾਨਸਿਕ ਇਲਾਜ ਨੂੰ ਜ਼ਿਆਦਾ ਮਹੱਤਵ ਦਿੱਤਾ ਜਾਂਦਾ ਹੈ ਕਿਉਂਕਿ ਮਹਿਲਾ ਨੂੰ ਸਹੀ-ਗਲਤ ਦਾ ਅਹਿਸਾਸ ਨਹੀਂ ਹੁੰਦਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ-  ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।