ਫਿਰ ਦਹਿਲਿਆ ਲੇਬਨਾਨ, ਪੇਜਰ ਤੋਂ ਬਾਅਦ ਹੁਣ ਰੇਡੀਓ ਸੈੱਟ 'ਚ ਹੋ ਰਹੇ ਧਮਾਕੇ, 9 ਦੀ ਮੌਤ

ਇੰਟਰਨੈਸ਼ਨਲ ਡੈਸਕ- ਲੇਬਨਾਨ ਵਿੱਚ ਪੇਜਰ ਲੜੀਵਾਰ ਧਮਾਕਿਆਂ ਤੋਂ ਬਾਅਦ ਬੁੱਧਵਾਰ ਨੂੰ ਇੱਕ ਵਾਰ ਫਿਰ ਧਮਾਕੇ ਹੋਏ ਹਨ। ਇਸ 'ਚ ਕਈ ਲੋਕ ਜ਼ਖਮੀ ਹੋਏ ਹਨ, ਜਿਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ। ਜਾਣਕਾਰੀ ਮੁਤਾਬਕ ਇਹ ਧਮਾਕੇ ਵਾਇਰਲੈੱਸ ਕਮਿਊਨੀਕੇਸ਼ਨ ਡਿਵਾਈਸਿਜ਼ 'ਚ ਹੋਏ ਹਨ। ਸੁਰੱਖਿਆ ਸੂਤਰਾਂ ਮੁਤਾਬਕ ਹੁਣ ਜਿਨ੍ਹਾਂ ਕਮਿਊਨੀਕੇਸ਼ਨ ਡਿਵਾਈਸਿਜ਼ 'ਚ ਧਮਾਕਾ ਹੋਇਆ ਹੈ, ਉਹ ਹੱਥ 'ਚ ਫੜੇ ਜਾਣ ਵਾਲੇ ਰੇਡੀਓ ਸੈੱਟ 'ਵਾਕੀ-ਟਾਕੀ' ਹਨ। ਧਮਾਕੇ ਉਸ ਸਮੇਂ ਹੋਏ ਜਦੋਂ ਹਿਜ਼ਬੁੱਲ੍ਹਾ ਦੇ ਕਮਾਂਡਰਾਂ ਨੇ ਇਨ੍ਹਾਂ ਨੂੰ ਹੱਥ 'ਚ ਫੜਿਆ ਹੋਇਆ ਸੀ। ਇਨ੍ਹਾਂ ਧਮਾਕਿਆਂ 'ਚ 9 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂਕਿ 300 ਲੋਕ ਜ਼ਖ਼ਮੀ ਦੱਸੇ ਜਾ ਰਹੇ ਹਨ।

ਹਿਜ਼ਬੁੱਲ੍ਹਾ ਨੇ ਪੇਜਰਾਂ ਦੀ ਤਰ੍ਹਾਂ ਹੀ ਇਹ ਡਿਵਾਈਸ ਵੀ ਕਰੀਬ ਪੰਜ ਮਹੀਨੇ ਪਹਿਲਾਂ ਖਰੀਦੇ ਸਨ। ਹਿਜ਼ਬੁੱਲਾ ਦੇ ਚੋਟੀ ਦੇ ਅਧਿਕਾਰੀ ਹਾਸ਼ਮ ਸਫੀਦੀਨ ਨੇ ਧਮਾਕਿਆਂ ਬਾਰੇ ਕਿਹਾ ਕਿ ਸੰਗਠਨ ਮਾੜੇ ਸਮੇਂ ਦਾ ਸਾਹਮਣਾ ਕਰ ਰਿਹਾ ਹੈ ਪਰ ਇਸ ਦਾ ਬਦਲਾ ਲਿਆ ਜਾਵੇਗਾ।

ਰਾਇਟਰਜ਼ ਦੇ ਅਨੁਸਾਰ, ਇਹ ਵਾਇਰਲੈੱਸ ਰੇਡੀਓ ਸੈੱਟ ਹਿਜ਼ਬੁੱਲ੍ਹਾ ਲੜਾਕਿਆਂ ਦੁਆਰਾ ਵਰਤੇ ਜਾ ਰਹੇ ਸਨ। ਦੇਸ਼ ਦੇ ਦੱਖਣੀ ਹਿੱਸੇ ਅਤੇ ਰਾਜਧਾਨੀ ਬੇਰੂਤ ਦੇ ਦੱਖਣੀ ਉਪਨਗਰਾਂ ਵਿੱਚ ਕਮਿਊਨੀਕੇਸ਼ਨ ਸੈੱਟ ਫਟ ਰਹੇ ਹਨ। ਇਕ ਧਮਾਕਾ ਉਸ ਜਗ੍ਹਾ ਵੀ ਹੋਇਆ, ਜਿਥੇ ਹਿਜ਼ਬੁੱਲ੍ਹਾ ਦੁਆਰਾ ਪੇਜਰ ਧਮਾਕੇ 'ਚ ਮਾਰੇ ਗਏ ਲੋਕਾਂ ਦਾ ਅੰਤਿਮ ਸੰਸਕਾਰ ਕੀਤਾ ਜਾ ਰਿਹਾ ਸੀ।

ਦੱਸ ਦੇਈਏ ਕਿ ਮੰਗਲਵਾਰ ਨੂੰ ਲੇਬਨਾਨ ਅਤੇ ਸੀਰੀਆ ਦੇ ਕਈ ਸ਼ਹਿਰਾਂ ਵਿੱਚ ਇੱਕੋ ਸਮੇਂ ਪੇਜਰ ਧਮਾਕੇ ਹੋਏ। ਕਰੀਬ ਇੱਕ ਘੰਟੇ ਦੇ ਅੰਦਰ ਸੈਂਕੜੇ ਪੇਜਰਾਂ ਦਾ ਧਮਾਕਾ ਹੋਇਆ। 12 ਲੋਕਾਂ ਦੀ ਮੌਤ ਹੋ ਗਈ ਅਤੇ 4000 ਤੋਂ ਵੱਧ ਲੋਕ ਜ਼ਖਮੀ ਹੋ ਗਏ। ਇਸ ਪੇਜ਼ਰ ਹਮਲੇ ਤੋਂ ਬਾਅਦ ਹਿਜ਼ਬੁੱਲ੍ਹਾ ਨੇ ਇਜ਼ਰਾਈਲ 'ਤੇ ਗੰਭੀਰ ਦੋਸ਼ ਲਗਾਏ ਅਤੇ ਕਿਹਾ ਕਿ ਇਸ ਸਾਜ਼ਿਸ਼ ਦੇ ਪਿੱਛੇ ਉਸ ਦੀ ਖੁਫੀਆ ਏਜੰਸੀ ਮੋਸਾਦ ਦਾ ਹੱਥ ਹੈ। ਹਿਜ਼ਬੁੱਲ੍ਹਾ ਨੇ ਬਦਲਾ ਲੈਣ ਦੀ ਧਮਕੀ ਦਿੱਤੀ ਹੈ।