ਕ੍ਰੈਸ਼ ਹੋ ਗਿਆ ਹੈਲੀਕਾਪਟਰ, ਦਰਿਆ ''ਚ ਡਿੱਗਾ, 5 ਲੋਕ ਸਨ ਸਵਾਰ

ਜੋਹੋਰ ਬਾਰੂ : ਮਲੇਸ਼ੀਆ ਦੇ ਜੋਹੋਰ ਸੂਬੇ ਵਿੱਚ ਬੁੱਧਵਾਰ ਸਵੇਰੇ ਐਮਰਜੈਂਸੀ ਲੈਂਡਿੰਗ ਦੌਰਾਨ ਇੱਕ ਪੁਲਸ ਹੈਲੀਕਾਪਟਰ ਕ੍ਰੈਸ਼ ਹੋ ਕੇ ਸਿੱਧਾ ਦਰਿਆ ਵਿੱਚ ਡਿੱਗ ਗਿਆ। ਇਹ ਹਾਦਸਾ ਸੁੰਗਾਈ ਪੁਲਾਈ ਖੇਤਰ ਵਿੱਚ ਹੋਇਆ। ਹਾਦਸੇ ਵੇਲੇ, ਹੈਲੀਕਾਪਟਰ ਇੱਕ ਨਿਯਮਤ ਫੌਜੀ ਅਭਿਆਸ (MITSATOM 2025) ਵਿੱਚ ਸ਼ਾਮਲ ਸੀ। ਹੈਲੀਕਾਪਟਰ ਵਿੱਚ ਸਵਾਰ ਸਾਰੇ ਪੰਜ ਚਾਲਕ ਦਲ ਦੇ ਮੈਂਬਰਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ।

ਬਚਾਅ ਕਾਰਜ ਤੋਂ ਬਾਅਦ, ਸਾਰੇ ਜ਼ਖਮੀ ਅਧਿਕਾਰੀਆਂ ਨੂੰ ਜੋਹੋਰ ਬਾਰੂ ਦੇ ਸੁਲਤਾਨਾ ਅਮੀਨਾ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਮਲੇਸ਼ੀਆ ਦੀ ਸਿਵਲ ਏਵੀਏਸ਼ਨ ਅਥਾਰਟੀ ਨੇ ਕਿਹਾ ਹੈ ਕਿ ਹਵਾਈ ਹਾਦਸਾ ਜਾਂਚ ਬਿਊਰੋ ਹਾਦਸੇ ਦੀ ਜਾਂਚ ਕਰੇਗਾ। ਮਲੇਸ਼ੀਆ ਦੀ ਸਿਵਲ ਏਵੀਏਸ਼ਨ ਅਥਾਰਟੀ (CAAM) ਦੇ ਅਨੁਸਾਰ, ਹੈਲੀਕਾਪਟਰ ਨੇ ਸਵੇਰੇ 9:51 ਵਜੇ ਤੰਜੁੰਗ ਕੁਪਾਂਗ ਪੁਲਸ ਸਟੇਸ਼ਨ ਤੋਂ ਉਡਾਣ ਭਰੀ। ਪਰ ਕੁਝ ਮਿੰਟਾਂ ਵਿੱਚ ਹੀ ਤਕਨੀਕੀ ਸਮੱਸਿਆਵਾਂ ਕਾਰਨ ਇਸਨੂੰ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ। ਇਹ ਲੈਂਡਿੰਗ ਨਦੀ ਵਿੱਚ ਹੋਈ।

ਨਦੀ ਵਿੱਚ ਡਿੱਗਣ ਤੋਂ ਤੁਰੰਤ ਬਾਅਦ ਸਮੁੰਦਰੀ ਪੁਲਸ ਫੋਰਸ ਵਲੋਂ ਚਾਲਕ ਦਲ ਦੇ ਪੰਜ ਮੈਂਬਰਾਂ ਨੂੰ ਬਚਾਇਆ ਗਿਆ ਅਤੇ ਉਨ੍ਹਾਂ ਨੂੰ ਨੇੜਲੇ ਮਲੇਸ਼ੀਅਨ ਮੈਰੀਟਾਈਮ ਇਨਫੋਰਸਮੈਂਟ ਏਜੰਸੀ (MMEA) ਜੈੱਟੀ 'ਤੇ ਲਿਆਂਦਾ ਗਿਆ। ਫਿਰ ਉਨ੍ਹਾਂ ਨੂੰ ਇਲਾਜ ਲਈ ਭੇਜਿਆ ਗਿਆ। ਹਾਦਸੇ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ, ਪਰ ਮਲੇਸ਼ੀਅਨ ਸਿਵਲ ਏਵੀਏਸ਼ਨ ਰੈਗੂਲੇਟਰ ਨੇ ਇਸਨੂੰ ਇੱਕ ਗੰਭੀਰ ਹਵਾਬਾਜ਼ੀ ਘਟਨਾ ਵਜੋਂ ਮੰਨਦੇ ਹੋਏ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।