ਜਾਪਾਨ 'ਚ ਭਾਰੀ ਬਰਫਬਾਰੀ, ਸੜਕਾਂ 'ਤੇ ਫਸੀਆਂ 1000 ਤੋਂ ਵਧੇਰੇ ਕਾਰਾਂ

ਟੋਕੀਓ— ਜਾਪਾਨ ਵਿੱਚ ਲਗਾਤਾਰ ਬਰਫਬਾਰੀ ਹੋ ਰਹੀ ਹੈ। ਬਰਫਬਾਰੀ ਦੀ ਵਜ੍ਹਾ ਨਾਲ ਜੀਵਨ ਅਸਤ-ਵਿਅਸਤ ਹੋ ਗਿਆ ਹੈ। ਇਸ ਕਾਰਨ ਇੱਕ ਹਜ਼ਾਰ ਤੋਂ ਜ਼ਿਆਦਾ ਕਾਰਾਂ ਸੜਕਾਂ ਉੱਤੇ ਫਸੀਆਂ ਹੋਈਆਂ ਹਨ । ਟੋਕੀਓ ਦੇ ਪੱਛਮ ਤੋਂ 320 ਕਿਲੋਮੀਟਰ ਦੂਰ ਸਥਿਤ ਫੁਕੁਈ ਸੂਬੇ ਵਿੱਚ ਚਾਰੋ ਪਾਸੇ 54 ਇੰਚ ਤੱਕ ਬਰਫ ਜੰਮੀ ਹੈ । ਮੌਸਮ ਵਿਭਾਗ ਦੇ ਮੁਤਾਬਕ ਇਸ ਬਰਫਬਾਰੀ ਨੇ ਚਾਰ ਦਹਾਕਿਆਂ ਦਾ ਰਿਕਾਰਡ ਤੋੜ ਦਿੱਤਾ ਹੈ । ਬਰਫ ਵਿੱਚ ਫਸੀਆਂ ਕਾਰਾਂ ਅਤੇ ਲੋਕਾਂ ਨੂੰ ਕੱਢਣ ਲਈ ਪ੍ਰਸ਼ਾਸਨ ਨੇ ਫੌਜ ਦੀ ਸਹਾਇਤਾ ਮੰਗੀ ਹੈ । ਫਿਲਹਾਲ ਕਿਸੇ ਦੇ ਜ਼ਖਮੀ ਜਾਂ ਬੀਮਾਰ ਹੋਣ ਦੀ ਸੂਚਨਾ ਨਹੀਂ ਹੈ । 

ਬਰਫਬਾਰੀ ਨਾਲ ਫੁਕੁਈ ਸੂਬੇ ਵਿੱਚ 10 ਕਿੱਲੋ ਮੀਟਰ ਲੰਬਾ ਜਾਮ ਲੱਗਾ ਹੋਇਆ ਹੈ। ਬਰਫੀਲੀਆਂ ਹਵਾਵਾਂ ਵਿੱਚ ਕੁੱਝ ਡਰਾਈਵਰ ਸੜਕਾਂ ਉੱਤੇ ਹੀ ਰੁਕ ਕੇ ਕਾਰਾਂ ਦੇ ਟਾਇਰਾਂ ਵਿੱਚ ਚੇਨ ਲਗਾਉਣ ਲੱਗ ਗਏ , ਤਾਂ ਕਿ ਟਾਇਰ ਬਰਫ ਵਿੱਚ ਨਾ ਜਾ ਧੱਸੇ। ਇਸੇ ਕਾਰਨ ਇੱਥੇ ਜਾਮ ਲੱਗ ਗਿਆ । ਸਥਾਨਕ ਪ੍ਰਸ਼ਾਸਨ ਨੇ ਪ੍ਰਭਾਵਿਤ ਇਲਾਕੇ ਵਿੱਚ ਕਾਰ ਜਾਂ ਹੋਰ ਕਿਸੇ ਵਾਹਨ ਦੇ ਜਾਣ ਉੱਤੇ ਰੋਕ ਲਗਾ ਦਿੱਤੀ ਹੈ । 

ਕੁੱਝ ਥਾਂਵਾਂ ਉੱਤੇ ਬਰਫ ਵਿੱਚ ਫਸੀਆਂ ਕਾਰਾਂ ਨੂੰ ਕੱਢ ਲਿਆ ਗਿਆ ਹੈ । ਮਾਹਿਰਾਂ ਦਾ ਅਨੁਮਾਨ ਹੈ ਕਿ ਫੁਕੁਈ ਵਿੱਚ ਬੁੱਧਵਾਰ ਦੀ ਸਵੇਰੇ ਤੱਕ ਬਰਫਬਾਰੀ ਜਾਰੀ ਰਹੇਗੀ । ਇਸ ਲਈ ਲੋਕਾਂ ਨੂੰ ਸੁਚੇਤ ਰਹਿਣ ਨੂੰ ਕਿਹਾ ਗਿਆ ਹੈ। ਭਾਰੀ ਬਰਫਬਾਰੀ ਕਾਰਨ ਕੰਮ-ਕਾਜ 'ਤੇ ਜਾਣ ਵਾਲੇ ਲੋਕ ਵਧੇਰੇ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰ ਰਹੇ ਹਨ।