"ਜੇ ਭਾਰਤੀ ਤੇ ਸੱਪ ਮਿਲੇ ਤਾਂ ਪਹਿਲਾਂ ਭਾਰਤੀ ਨੂੰ ਮਾਰੋ": ਐਪਸਟੀਨ ਫਾਈਲਾਂ ''ਚ ਨਫਰਤੀ ਸੋਚ ਦਾ ਖੁਲਾਸਾ

ਵਾਸ਼ਿੰਗਟਨ : ਅਮਰੀਕਾ ਦੇ ਨਿਆਂ ਵਿਭਾਗ ਵੱਲੋਂ ਦੋਸ਼ੀ ਜਿਨਸੀ ਅਪਰਾਧੀ ਜੈਫਰੀ ਐਪਸਟੀਨ ਨਾਲ ਸਬੰਧਤ ਲਗਭਗ 30 ਲੱਖ ਪੰਨਿਆਂ ਦੀਆਂ ਫਾਈਲਾਂ ਜਨਤਕ ਕੀਤੇ ਜਾਣ ਤੋਂ ਬਾਅਦ ਇੱਕ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਇਨ੍ਹਾਂ ਫਾਈਲਾਂ ਵਿੱਚ ਨਾਰਵੇ ਦੇ ਇੱਕ ਸੀਨੀਅਰ ਡਿਪਲੋਮੈਟ ਟੇਰਜੇ ਰੋਡ-ਲਾਰਸਨ ਵੱਲੋਂ ਭਾਰਤੀਆਂ ਵਿਰੁੱਧ ਕੀਤੀ ਗਈ ਇੱਕ ਬੇਹੱਦ ਇਤਰਾਜ਼ਯੋਗ ਅਤੇ ਨਫਰਤੀ ਟਿੱਪਣੀ ਸਾਹਮਣੇ ਆਈ ਹੈ।

ਕੀ ਹੈ ਪੂਰਾ ਮਾਮਲਾ? 
ਜੈਫਰੀ ਐਪਸਟੀਨ ਨੇ ਇੱਕ ਭਾਰਤੀ ਸਿਆਸਤਦਾਨ ਦੀ ਈਮੇਲ ਟੇਰਜੇ ਰੋਡ-ਲਾਰਸਨ ਨੂੰ ਫਾਰਵਰਡ ਕੀਤੀ ਸੀ। ਇਸ ਦੇ ਜਵਾਬ ਵਿੱਚ 25 ਦਸੰਬਰ 2015 ਨੂੰ ਭੇਜੀ ਗਈ ਈਮੇਲ ਵਿੱਚ ਰੋਡ-ਲਾਰਸਨ ਨੇ ਲਿਖਿਆ ਸੀ, ‘ਕੀ ਤੁਸੀਂ ਉਹ ਕਹਾਵਤ ਸੁਣੀ ਹੈ: ਜਦੋਂ ਤੁਹਾਨੂੰ ਇੱਕ ਭਾਰਤੀ ਅਤੇ ਇੱਕ ਸੱਪ ਮਿਲੇ, ਤਾਂ ਪਹਿਲਾਂ ਭਾਰਤੀ ਨੂੰ ਮਾਰੋ!’। ਇਸ ਖੁਲਾਸੇ ਤੋਂ ਬਾਅਦ ਭਾਰਤੀਆਂ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।

ਕੌਣ ਹੈ ਟੇਰਜੇ ਰੋਡ-ਲਾਰਸਨ? 
ਟੇਰਜੇ ਰੋਡ-ਲਾਰਸਨ ਨਾਰਵੇ ਦੇ ਇੱਕ ਸੀਨੀਅਰ ਡਿਪਲੋਮੈਟ ਰਹੇ ਹਨ ਅਤੇ ਸੰਯੁਕਤ ਰਾਸ਼ਟਰ (UN) ਵਿੱਚ ਰਾਜਦੂਤ ਵਜੋਂ ਵੀ ਸੇਵਾਵਾਂ ਨਿਭਾ ਚੁੱਕੇ ਹਨ। ਉਹ ਵੱਕਾਰੀ ਇੰਟਰਨੈਸ਼ਨਲ ਪੀਸ ਇੰਸਟੀਚਿਊਟ ਦੇ ਪ੍ਰਧਾਨ ਵੀ ਸਨ, ਪਰ ਸਾਲ 2020 ਵਿੱਚ ਜੈਫਰੀ ਐਪਸਟੀਨ ਨਾਲ ਸਬੰਧ ਸਾਹਮਣੇ ਆਉਣ ਤੋਂ ਬਾਅਦ ਉਨ੍ਹਾਂ ਨੂੰ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਣਾ ਪਿਆ ਸੀ।

ਸੋਸ਼ਲ ਮੀਡੀਆ 'ਤੇ ਉੱਠਿਆ ਗੁੱਸਾ 
ਐਪਸਟੀਨ ਫਾਈਲਾਂ ਵਿੱਚ ਇਸ ਈਮੇਲ ਦੇ ਸਾਹਮਣੇ ਆਉਣ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਲੋਕਾਂ ਦੀ ਤਿੱਖੀ ਪ੍ਰਤੀਕਿਰਿਆ ਦੇਖਣ ਨੂੰ ਮਿਲ ਰਹੀ ਹੈ। ਵਰਤੋਂਕਾਰਾਂ ਨੇ ਇਸ ਨੂੰ "ਬੇਹੱਦ ਨਫ਼ਰਤ ਭਰਿਆ" ਅਤੇ "ਸ਼ਰਮਨਾਕ" ਕਰਾਰ ਦਿੱਤਾ ਹੈ। ਇੱਕ ਯੂਜ਼ਰ ਨੇ ਲਿਖਿਆ ਕਿ ਇਹ ਟਿੱਪਣੀ ਦਿਖਾਉਂਦੀ ਹੈ ਕਿ ਇਹ ਲੋਕ ਭਾਰਤੀਆਂ ਪ੍ਰਤੀ ਕਿੰਨੀ ਨਫ਼ਰਤ ਰੱਖਦੇ ਹਨ।

ਜੈਫਰੀ ਐਪਸਟੀਨ ਦਾ ਪਿਛੋਕੜ 
ਜੈਫਰੀ ਐਪਸਟੀਨ ਇੱਕ ਅਮਰੀਕੀ ਫਾਈਨਾਂਸਰ ਸੀ, ਜਿਸ 'ਤੇ ਨਾਬਾਲਗ ਲੜਕੀਆਂ ਦੇ ਜਿਨਸੀ ਸ਼ੋਸ਼ਣ ਅਤੇ ਵੇਸਵਾਗਮਨੀ ਦੇ ਕਈ ਗੰਭੀਰ ਦੋਸ਼ ਸਨ। ਸਾਲ 2008 ਵਿੱਚ ਉਸਨੂੰ ਸਜ਼ਾ ਵੀ ਹੋਈ ਸੀ, ਪਰ ਬਾਅਦ ਵਿੱਚ ਉਹ ਰਿਹਾਅ ਹੋ ਗਿਆ ਸੀ। ਉਸਦੀ ਉੱਚ ਪੱਧਰੀ ਰਾਜਨੀਤਿਕ ਪਹੁੰਚ ਕਾਰਨ ਇਹ ਮਾਮਲਾ ਹਮੇਸ਼ਾ ਚਰਚਾ ਵਿੱਚ ਰਿਹਾ ਹੈ ਅਤੇ ਹੁਣ ਜਨਤਕ ਹੋਈਆਂ ਫਾਈਲਾਂ ਕਈ ਵੱਡੇ ਚਿਹਰਿਆਂ ਨੂੰ ਬੇਨਕਾਬ ਕਰ ਰਹੀਆਂ ਹਨ।