ਸਿੰਧ ''ਚ ਵੱਡੀ ਵਾਰਦਾਤ ! ਭਰੀ ਬੱਸ ''ਚੋਂ 18 ਪੁਰਸ਼ ਯਾਤਰੀਆਂ ਨੂੰ ਅਗਵਾ ਕਰ ਲੈ ਗਏ ਬੰਦੂਕਧਾਰੀ

ਕਰਾਚੀ (ਭਾਸ਼ਾ) : ਪਾਕਿਸਤਾਨ ਦੇ ਸਿੰਧ ਸੂਬੇ ਵਿੱਚ ਅਣਪਛਾਤੇ ਬੰਦੂਕਧਾਰੀਆਂ ਨੇ 18 ਲੋਕਾਂ ਨੂੰ ਅਗਵਾ ਕਰ ਲਿਆ ਹੈ। ਇਹ ਸਾਰੇ ਯਾਤਰੀ ਇੱਕ ਬੱਸ ਵਿੱਚ ਕੁਏਟਾ ਜਾ ਰਹੇ ਸਨ। ਇਹ ਘਟਨਾ ਸੋਮਵਾਰ ਰਾਤ ਨੂੰ ਘੋਟਕੀ ਇਲਾਕੇ ਦੇ ਨੇੜੇ ਵਾਪਰੀ, ਜਦੋਂ ਹਮਲਾਵਰਾਂ ਨੇ ਸਿੰਧ-ਪੰਜਾਬ ਸਰਹੱਦ ਦੇ ਨੇੜੇ ਹਾਈਵੇਅ ਲਿੰਕ ਰੋਡ 'ਤੇ ਬੱਸ 'ਤੇ ਗੋਲੀਆਂ ਚਲਾਈਆਂ ਅਤੇ 18 ਪੁਰਸ਼ ਯਾਤਰੀਆਂ ਨੂੰ ਬੰਧਕ ਬਣਾ ਲਿਆ। ਇਸ ਗੋਲੀਬਾਰੀ ਵਿੱਚ ਬੱਸ ਦਾ ਚਾਲਕ ਅਤੇ ਕੁਝ ਹੋਰ ਯਾਤਰੀ ਜ਼ਖਮੀ ਹੋ ਗਏ।

ਜਿਓ ਨਿਊਜ਼ ਅਨੁਸਾਰ, ਬੱਸ ਵਿੱਚ ਸਫ਼ਰ ਕਰ ਰਹੀ ਇੱਕ ਮਹਿਲਾ ਯਾਤਰੀ ਨੇ ਦੱਸਿਆ ਕਿ ਘਟਨਾ ਵਾਲੀ ਥਾਂ 'ਤੇ ਕੁੱਲ 18 ਤੋਂ 20 ਹਮਲਾਵਰ ਮੌਜੂਦ ਸਨ, ਜੋ ਸਾਰੇ ਹਥਿਆਰਬੰਦ ਸਨ ਅਤੇ ਉਨ੍ਹਾਂ ਦੇ ਚਿਹਰੇ ਢਕੇ ਹੋਏ ਸਨ। ਮਹਿਲਾ ਯਾਤਰੀ ਨੇ ਇਹ ਵੀ ਦੱਸਿਆ ਕਿ ਹਮਲਾਵਰਾਂ ਨੇ 25 ਯਾਤਰੀਆਂ ਨੂੰ ਬੱਸ ਤੋਂ ਹੇਠਾਂ ਉਤਰਨ ਲਈ ਕਿਹਾ, ਪਰ ਮਹਿਲਾ ਯਾਤਰੀਆਂ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਾਇਆ। ਸਿੰਧ ਦੇ ਗ੍ਰਹਿ ਮੰਤਰੀ ਦੇ ਬੁਲਾਰੇ ਜ਼ਿਆ ਉਲ ਹਸਨ ਲਾਂਝਰ ਨੇ ਜਾਣਕਾਰੀ ਦਿੱਤੀ ਕਿ ਡਰਾਈਵਰ ਅਤੇ ਕੰਡਕਟਰ ਤੋਂ ਇਲਾਵਾ ਬੱਸ ਵਿੱਚ ਕਰੀਬ 30 ਯਾਤਰੀ ਸਵਾਰ ਸਨ।