ਸਕਾਟਲੈਂਡ: ਗਲਾਸਗੋ 'ਚ ਗੱਡੀਆਂ ਪਾਰਕ ਕਰਨ ਲਈ ਡਰਾਈਵਰਾਂ ਨੇ ਖਰਚੇ 25 ਮਿਲੀਅਨ ਤੋਂ ਵੱਧ ਪੌਂਡ

ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ) : ਗੱਡੀ ਹਰ ਕਿਸੇ ਲਈ ਜ਼ਰੂਰੀ ਸਾਧਨ ਬਣ ਗਈ ਹੈ। ਸ਼ਹਿਰਾਂ 'ਚ ਗੱਡੀ ਪਾਰਕ ਕਰਨ ਲਈ ਭੁਗਤਾਨ ਕਰਨਾ ਪੈਂਦਾ ਹੈ। ਗਲਾਸਗੋ ਦੀ ਗੱਲ ਕਰੀਏ ਤਾਂ ਪਿਛਲੇ 3 ਵਿੱਤੀ ਸਾਲਾਂ ਵਿੱਚ ਡਰਾਈਵਰਾਂ ਨੇ ਸ਼ਹਿਰ 'ਚ ਗੱਡੀਆਂ ਪਾਰਕ ਕਰਨ ਲਈ 25 ਮਿਲੀਅਨ ਤੋਂ ਵੱਧ ਪੌਂਡ ਖਰਚ ਕੀਤੇ ਹਨ। ਗਲਾਸਗੋ ਸਿਟੀ ਕੌਂਸਲ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ 2019-20 ਦੇ ਵਿਚਕਾਰ ਪਾਰਕਿੰਗ ਮੀਟਰਾਂ ਰਾਹੀਂ ਕਮਾਈ ਗਈ ਰਕਮ 12.8 ਮਿਲੀਅਨ ਪੌਂਡ ਸੀ ਪਰ ਇਸ ਤੋਂ ਪਹਿਲਾਂ ਲਾਕਡਾਊਨ ਦੌਰਾਨ 2020-21 ਵਿੱਚ ਇਹ ਕਮਾਈ ਘਟ ਕੇ 4.04 ਮਿਲੀਅਨ ਪੌਂਡ ਰਹਿ ਗਈ। ਇਸ ਤੋਂ ਬਾਅਦ 2021-22 ਵਿੱਚ ਥੋੜ੍ਹਾ ਵੱਧ ਕੇ 8.3 ਮਿਲੀਅਨ ਹੋ ਗਿਆ ਅਤੇ ਅਗਸਤ 2021 ਤੇ ਮਾਰਚ 2022 ਦੇ ਵਿਚਕਾਰ ਐੱਨ.ਆਰ.ਐੱਸ. ਸਿਟੀ ਪਾਰਕਿੰਗ ਆਫ਼ ਸਟ੍ਰੀਟ ਪਾਰਕਿੰਗ ਤੋਂ ਪੈਦਾ ਹੋਈ ਰਕਮ ਸਿਰਫ਼ 5 ਮਿਲੀਅਨ ਤੋਂ ਵੱਧ ਸੀ।

ਖ਼ਬਰ ਇਹ ਵੀ : ਜਲੰਧਰ 'ਚ ਬੰਦੂਕ ਦੀ ਨੋਕ ’ਤੇ ਲੁੱਟੀ ਬੈਂਕ, ਉਥੇ ਮਾਨ ਸਰਕਾਰ ਵੱਲੋਂ ਬਕਾਇਆ ਬਿਜਲੀ ਬਿੱਲ ਮੁਆਫ਼, ਪੜ੍ਹੋ TOP 10

ਇਸ ਸਬੰਧੀ ਕੌਂਸਲ ਦਾ ਮੰਨਣਾ ਹੈ ਕਿ ਆਮਦਨ ਵਿੱਚ ਗਿਰਾਵਟ ਲੋਕਾਂ ਦੇ ਘਰ ਤੋਂ ਕੰਮ ਕਰਨਾ ਜਾਰੀ ਰੱਖਣ ਅਤੇ ਅਕਸਰ ਸ਼ਹਿਰ ਵਿੱਚ ਨਾ ਆਉਣ ਦੇ ਸਿੱਧੇ ਨਤੀਜੇ ਵਜੋਂ ਹੋ ਸਕਦੀ ਹੈ। ਕੋਵਿਡ ਸੰਕਟ ਦੀ ਸ਼ੁਰੂਆਤ 'ਚ ਪਾਰਕਿੰਗ ਖਰਚੇ ਵੀ 3 ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤੇ ਗਏ ਸਨ। ਸਥਾਨਕ ਅਥਾਰਟੀ ਨੂੰ ਕੋਵਿਡ ਨਾਲ ਜੁੜੇ ਮਾਲੀਏ ਦੇ ਨੁਕਸਾਨ ਨੂੰ ਪੂਰਾ ਕਰਨ ਲਈ ਸਕਾਟਿਸ਼ ਸਰਕਾਰ ਤੋਂ ਵਾਧੂ ਫੰਡ ਪ੍ਰਾਪਤ ਹੋਏ। ਇਸ ਸਬੰਧੀ ਕੌਂਸਲ ਦੇ ਬੁਲਾਰੇ ਨੇ ਕਿਹਾ ਕਿ ਇਹ ਅੰਕੜੇ ਮਾਰਚ 2020 ਤੋਂ ਲਾਗੂ ਵੱਖ-ਵੱਖ ਤਾਲਾਬੰਦੀਆਂ ਅਤੇ ਹੋਰ ਪਾਬੰਦੀਆਂ ਦੇ ਵੱਡੇ ਪ੍ਰਭਾਵ ਨੂੰ ਦਰਸਾਉਂਦੇ ਹਨ, ਜਿਸ ਲਈ ਲੋਕਾਂ ਨੂੰ ਮੁੱਖ ਤੌਰ ’ਤੇ ਘਰ ਰਹਿਣ ਦੀ ਲੋੜ ਸੀ। ਜਦੋਂ ਪਹਿਲਾ ਲਾਕਡਾਊਨ ਹਟਾਇਆ ਗਿਆ ਸੀ ਤਾਂ ਗੱਡੀਆਂ ਨੂੰ ਪਾਰਕ ਕਰਨ ਲਈ ਜਗ੍ਹਾ ਦੀ ਮੰਗ ਵਧ ਗਈ ਸੀ ਅਤੇ ਜੁਲਾਈ 2020 ਵਿੱਚ ਚਾਰਜ ਬਹਾਲ ਕਰ ਦਿੱਤੇ ਗਏ ਸਨ। ਉਨ੍ਹਾਂ ਕਿਹਾ ਕਿ ਜਿਉਂ ਹੀ ਬਾਅਦ ਵਿੱਚ ਪਾਬੰਦੀਆਂ ਵਿੱਚ ਢਿੱਲ ਦਿੱਤੀ ਗਈ, ਟ੍ਰੈਫਿਕ ਦੀ ਆਵਾਜਾਈ ਵਿੱਚ ਵੀ ਵਾਧਾ ਹੋਇਆ ਹੈ, ਜਿਸ ਦੇ ਸਿੱਟੇ ਵਜੋਂ ਲੋਕਾਂ ਦੀਆਂ ਜੇਬਾਂ 'ਚੋਂ ਪਾਰਕਿੰਗ ਫੀਸ ਦੇ ਰੂਪ ਵਿੱਚ ਨਿਕਲ ਕੇ ਮਿਲੀਅਨ ਪੌਂਡ ਕੌਂਸਲ ਦੀ ਝੋਲੀ ਪਏ ਹਨ।

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।