ਚੱਕਰਵਾਤੀ ਤੂਫਾਨ ਦਾ ਕਹਿਰ, ਪੂਰੇ ਦੇਸ਼ 'ਚ Emergency ਲਾਗੂ ! ਰਾਸ਼ਟਰਪਤੀ ਕੁਮਾਰਾ ਨੇ ਕੀਤਾ ਐਲਾਨ
Saturday, Nov 29, 2025 - 04:18 PM (IST)
ਇੰਟਰਨੈਸ਼ਨਲ ਡੈਸਕ- ਚੱਕਰਵਾਤੀ ਤੂਫਾਨ 'ਦਿਤਵਾ' ਕਾਰਨ ਸ਼੍ਰੀਲੰਕਾ ਵਿੱਚ ਹੜ੍ਹਾਂ, ਲੈਂਡਸਲਾਈਡਾਂ ਅਤੇ ਇਮਾਰਤਾਂ ਦੇ ਨੁਕਸਾਨ ਕਾਰਨ ਲੱਖਾਂ ਲੋਕ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ। ਆਫ਼ਤ ਪ੍ਰਬੰਧਨ ਕੇਂਦਰ ਦੇ ਅਨੁਸਾਰ ਸ਼ਨੀਵਾਰ ਸਵੇਰ ਤੱਕ ਮੌਤਾਂ ਦੀ ਅਧਿਕਾਰਤ ਗਿਣਤੀ ਵੱਧ ਕੇ 123 ਹੋ ਗਈ ਹੈ, ਜਦਕਿ 130 ਲੋਕ ਹਾਲੇ ਲਾਪਤਾ ਹਨ। ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਤੂਫ਼ਾਨ ਪ੍ਰਭਾਵਿਤ ਇਲਾਕਿਆਂ ਵਿੱਚ ਸੰਚਾਰ ਠੱਪ ਹੋਣ ਕਾਰਨ ਮੌਤਾਂ ਦੀ ਗਿਣਤੀ ਹੋਰ ਵੀ ਜ਼ਿਆਦਾ ਹੋਣ ਦੀ ਸੰਭਾਵਨਾ ਹੈ।
ਇਸ ਸੰਕਟ ਦੀ ਸਥਿਤੀ ਦੇ ਮੱਦੇਨਜ਼ਰ ਸ਼੍ਰੀਲੰਕਾ ਦੇ ਰਾਸ਼ਟਰਪਤੀ ਅਨੁਰਾ ਕੁਮਾਰਾ ਦਿਸਾਨਾਇਕੇ ਨੇ ਜਨਤਕ ਸੁਰੱਖਿਆ ਅਤੇ ਤੇਜ਼ੀ ਨਾਲ ਰਾਹਤ ਕਾਰਜਾਂ ਨੂੰ ਯਕੀਨੀ ਬਣਾਉਣ ਲਈ ਤੁਰੰਤ ਪ੍ਰਭਾਵ ਨਾਲ 'ਜਨਤਕ ਐਮਰਜੈਂਸੀ ਦੀ ਸਥਿਤੀ' ਦਾ ਐਲਾਨ ਕਰ ਦਿੱਤਾ ਹੈ। ਇਹ ਫੈਸਲਾ ਵਿਰੋਧੀ ਨੇਤਾਵਾਂ ਅਤੇ ਡਾਕਟਰਾਂ ਦੀਆਂ ਟਰੇਡ ਯੂਨੀਅਨਾਂ ਦੀਆਂ ਮੰਗਾਂ ਤੋਂ ਬਾਅਦ ਲਿਆ ਗਿਆ ਹੈ।
ਮੌਸਮ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਭਾਵੇਂ ਚੱਕਰਵਾਤ 'ਦਿਤਵਾ' ਸ਼੍ਰੀਲੰਕਾ ਤੋਂ ਦੱਖਣੀ ਭਾਰਤੀ ਤੱਟ ਵੱਲ ਵਧ ਗਿਆ ਹੈ, ਫਿਰ ਵੀ ਪੱਛਮੀ ਅਤੇ ਸਾਬਰਾਗਮੁਵਾ ਪ੍ਰਾਂਤਾਂ ਵਿੱਚ 50 ਮਿਲੀਮੀਟਰ ਤੋਂ ਵੱਧ ਭਾਰੀ ਬਾਰਿਸ਼ ਦਾ ਅਸਿੱਧਾ ਪ੍ਰਭਾਵ ਕੁਝ ਸਮੇਂ ਲਈ ਬਣਿਆ ਰਹੇਗਾ। ਦੇਸ਼ ਦੇ ਆਸ-ਪਾਸ ਸਮੁੰਦਰਾਂ ਵਿੱਚ ਹਵਾ ਦੀ ਗਤੀ 60-70 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਵਧਣ ਦੀ ਉਮੀਦ ਹੈ ਅਤੇ ਮਛੇਰਿਆਂ ਨੂੰ ਸ਼ਨੀਵਾਰ ਨੂੰ ਸਮੁੰਦਰੀ ਗਤੀਵਿਧੀਆਂ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ। ਐਤਵਾਰ ਦੇਰ ਸ਼ਾਮ ਤੱਕ ਮੌਸਮ ਦੇ ਆਮ ਹੋ ਜਾਣ ਦੀ ਸੰਭਾਵਨਾ ਹੈ।
ਸ਼੍ਰੀਲੰਕਾ 'ਤੇ ਆਏ ਹੋਏ ਇਸ ਔਖੇ ਸਮੇਂ ਵਿੱਚ ਭਾਰਤ ਨੇ 'ਆਪ੍ਰੇਸ਼ਨ ਸਾਗਰ ਬੰਧੂ' ਤਹਿਤ ਤੁਰੰਤ ਉੱਥੇ ਮਨੁੱਖੀ ਸਹਾਇਤਾ ਭੇਜੀ ਹੈ। ਭਾਰਤੀ ਹਵਾਈ ਸੈਨਾ ਦੇ ਜਹਾਜ਼ਾਂ ਨੇ ਸ਼ਨੀਵਾਰ ਨੂੰ ਕੋਲੰਬੋ ਲਈ ਕੁੱਲ 21 ਟਨ ਰਾਹਤ ਸਮੱਗਰੀ (ਜਿਸ ਵਿੱਚ ਤੰਬੂ, ਤਰਪਾਲਾਂ ਤੇ ਖਾਣ-ਪੀਣ ਦੀਆਂ ਵਸਤੂਆਂ ਸ਼ਾਮਲ ਹਨ) ਦੇ ਨਾਲ-ਨਾਲ 80 ਤੋਂ ਵੱਧ NDRF ਕਰਮਚਾਰੀ ਅਤੇ 8 ਟਨ ਉਪਕਰਣ ਪਹੁੰਚਾਏ।
ਇਸ ਤੋਂ ਇਲਾਵਾ, ਆਈ.ਐੱਨ.ਐੱਸ. ਵਿਕਰਾਂਤ ਤੋਂ ਦੋ ਚੇਤਕ ਹੈਲੀਕਾਪਟਰ, ਜਿਨ੍ਹਾਂ ਵਿੱਚ ਸ਼੍ਰੀਲੰਕਾਈ ਹਵਾਈ ਸੈਨਾ ਦੇ ਕਰਮਚਾਰੀ ਵੀ ਸ਼ਾਮਲ ਹਨ, ਖੋਜ ਅਤੇ ਬਚਾਅ ਕਾਰਜਾਂ ਵਿੱਚ ਹਿੱਸਾ ਲੈ ਰਹੇ ਹਨ। ਸ਼੍ਰੀਲੰਕਾ ਦੇ ਵਿਦੇਸ਼ ਮੰਤਰੀ ਵਿਜਿਤਾ ਹੇਰਾਥ ਸਮੇਤ ਕਈ ਨੇਤਾਵਾਂ ਨੇ ਇਸ ਸਹਾਇਤਾ ਲਈ ਭਾਰਤ ਦਾ ਧੰਨਵਾਦ ਕੀਤਾ ਹੈ। ਭਾਰਤੀ ਹਾਈ ਕਮਿਸ਼ਨ ਨੇ ਲੋੜਵੰਦ ਯਾਤਰੀਆਂ ਲਈ ਕੋਲੰਬੋ ਦੇ ਬੰਦਰਾਨਾਇਕੇ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਇੱਕ 'ਐਮਰਜੈਂਸੀ ਹੈਲਪ ਡੈਸਕ' ਵੀ ਸਥਾਪਿਤ ਕੀਤਾ ਹੈ।
