ਡੋਨਾਲਡ ਟਰੰਪ ਨੇ ਨਵੇਂ Air Force One ਜਹਾਜ਼ ਦਾ ਕੀਤਾ ਉਦਘਾਟਨ, ਕਤਰ ਦੇ ਸ਼ਾਸਕ ਨੇ ਦਿੱਤਾ ਸੀ Gift

ਇੰਟਰਨੈਸ਼ਨਲ ਡੈਸਕ- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਨਵੇਂ ਸਿਰੇ ਤੋਂ ਤਿਆਰ ਕੀਤੇ ਗਏ 'ਏਅਰ ਫੋਰਸ ਵਨ' ਜਹਾਜ਼ ਦਾ ਉਦਘਾਟਨ ਕਰ ਦਿੱਤਾ ਹੈ। ਅਗਲੇ ਮਹੀਨੇ ਦੀ ਸ਼ੁਰੂਆਤ ਤੋਂ ਰਾਸ਼ਟਰਪਤੀ ਦੀਆਂ ਅਧਿਕਾਰਤ ਯਾਤਰਾਵਾਂ ਲਈ ਵਰਤੇ ਜਾਣ ਤੋਂ ਪਹਿਲਾਂ, ਇਸ ਜਹਾਜ਼ ਨੂੰ ਟੈਸਟ ਫਲਾਈਟ ਲਈ ਭੇਜਿਆ ਜਾਵੇਗਾ। ਇਹ ਜਹਾਜ਼ ਪਹਿਲਾਂ ਕਤਰ ਦੇ ਸ਼ਾਸਕ ਦੀ ਮਲਕੀਅਤ ਹੇਠ ਸੀ, ਜਿਸ ਨੂੰ ਅਮਰੀਕਾ ਨੇ ਵੱਡੇ ਪੱਧਰ 'ਤੇ ਅਪਗ੍ਰੇਡ ਅਤੇ ਆਧੁਨਿਕ ਬਣਾਇਆ ਹੈ।

ਇਸ ਬੋਇੰਗ 747-8i ਜਹਾਜ਼ ਨੂੰ ਅਮਰੀਕੀ ਰਾਸ਼ਟਰੀ ਝੰਡੇ ਦੇ ਰੰਗਾਂ- ਲਾਲ, ਚਿੱਟੇ ਅਤੇ ਗੂੜ੍ਹੇ ਨੀਲੇ ਰੰਗ ਵਿੱਚ ਰੰਗਿਆ ਗਿਆ ਹੈ। ਜਹਾਜ਼ ਦੀ ਟੇਲ 'ਤੇ ਅਮਰੀਕੀ ਝੰਡਾ ਬਣਾਇਆ ਗਿਆ ਹੈ। ਟਰੰਪ ਨੇ ਦੱਸਿਆ ਕਿ ਇਹ ਜਹਾਜ਼ ਪਿਛਲੇ 40 ਸਾਲਾਂ ਤੋਂ ਵਰਤੇ ਜਾ ਰਹੇ ਹਲਕੇ ਅਸਮਾਨੀ ਰੰਗ ਦੇ ਪੁਰਾਣੇ ਜਹਾਜ਼ ਨਾਲੋਂ ਆਕਾਰ ਵਿੱਚ ਲਗਭਗ ਦੁੱਗਣਾ ਵੱਡਾ ਹੈ।

ਟਰੰਪ ਨੇ 'ਜੁਆਇੰਟ ਬੇਸ ਐਂਡਰਿਊਜ਼' ਵਿਖੇ ਆਯੋਜਿਤ ਸਮਾਰੋਹ ਵਿੱਚ ਦੱਸਿਆ ਕਿ ਬੋਇੰਗ ਕੰਪਨੀ ਦੇ ਨਵੇਂ ਜਹਾਜ਼ ਦੇ ਪ੍ਰੋਗਰਾਮ ਵਿੱਚ ਹੋ ਰਹੀ ਦੇਰੀ ਕਾਰਨ ਉਹ ਨਿਰਾਸ਼ ਸਨ। ਇਸ ਲਈ ਉਨ੍ਹਾਂ ਨੇ ਖ਼ੁਦ ਕਤਰ ਦੇ ਸ਼ਾਸਕ ਅਮੀਰ ਨਾਲ ਗੱਲ ਕਰਕੇ ਇਸ ਬਿਲਕੁਲ ਨਵੇਂ 747 ਜਹਾਜ਼ ਨੂੰ ਲਿਆ, ਜਿਸ ਦੀ ਵਰਤੋਂ ਪਹਿਲਾਂ ਬਹੁਤ ਹੀ ਘੱਟ ਸਮੇਂ ਲਈ ਕੀਤੀ ਗਈ ਸੀ। ਟਰੰਪ ਨੇ ਕਿਹਾ, "ਕੋਈ ਆਮ ਰਾਸ਼ਟਰਪਤੀ ਅਜਿਹਾ ਨਹੀਂ ਕਰਦਾ, ਪਰ ਸਾਡੇ ਦੇਸ਼ ਦੀ ਪ੍ਰਤੀਨਿਧਤਾ ਸਹੀ ਢੰਗ ਨਾਲ ਹੋਣੀ ਚਾਹੀਦੀ ਹੈ।"

ਰਾਸ਼ਟਰਪਤੀ ਟਰੰਪ ਨੇ ਐਲਾਨ ਕੀਤਾ ਕਿ ਇਹ ਨਵਾਂ 'ਏਅਰ ਫੋਰਸ ਵਨ' ਜਹਾਜ਼ ਅਮਰੀਕਾ ਦੇ 250ਵੇਂ ਸੁਤੰਤਰਤਾ ਦਿਵਸ ਦੇ ਮੌਕੇ 'ਤੇ 4 ਜੁਲਾਈ ਨੂੰ 'ਨੈਸ਼ਨਲ ਮਾਲ' ਵਿਖੇ ਹੋਣ ਵਾਲੇ ਸਮਾਰੋਹਾਂ ਦੌਰਾਨ ਏਅਰ ਸ਼ੋਅ ਕਰੇਗਾ। ਇਸ ਤੋਂ ਬਾਅਦ, ਉਹ ਅਗਲੇ ਮਹੀਨੇ ਤੁਰਕੀ ਵਿੱਚ ਹੋਣ ਵਾਲੇ ਨਾਟੋ ਦੇ ਸਿਖਰ ਸੰਮੇਲਨ ਵਿੱਚ ਭਾਗ ਲੈਣ ਲਈ ਇਸੇ ਨਵੇਂ ਜਹਾਜ਼ ਰਾਹੀਂ ਯਾਤਰਾ ਕਰਨਗੇ।