ਈਰਾਨ ਤੋਂ ਪਹਿਲੀ ਵਾਰ ਰੇਲ ਰਾਹੀਂ ਅਫਗਾਨਿਸਤਾਨ ਪਹੁੰਚਿਆ ਡੀਜ਼ਲ

ਕਾਬੁਲ (ਇੰਟ.)– ਤਾਲਿਬਾਨ ਦੇ ਲੋਕ ਨਿਰਮਾਣ ਮੰਤਰਾਲੇ ਨੇ ਸੋਮਵਾਰ ਨੂੰ ਐਲਾਨ ਕੀਤਾ ਕਿ ਅਫਗਾਨਿਸਤਾਨ ਨੂੰ ਖਾਫ-ਹੇਰਾਤ ਰੇਲਵੇ ਰਾਹੀਂ ਡੀਜ਼ਲ ਦੀ ਪਹਿਲੀ ਖੇਪ ਮਿਲੀ ਹੈ। ਇਸ ਨੂੰ ਅਫਗਾਨਿਸਤਾਨ ਦੇ ਇਤਿਹਾਸ ਵਿਚ ਇਕ ਮੀਲ ਪੱਥਰ ਮੰਨਿਆ ਜਾ ਰਿਹਾ ਹੈ।

ਇਸ ਰੇਲ ਲਾਈਨ ਰਾਹੀਂ ਡੀਜ਼ਲ ਦੀ ਸਪਲਾਈ ਅਫਗਾਨਿਸਤਾਨ ਦੀ ਪਾਕਿਸਤਾਨ ’ਤੇ ਨਿਰਭਰਤਾ ਨੂੰ ਘਟਾ ਦੇਵੇਗੀ। ਅਜੇ ਤੱਕ ਅਫਗਾਨਿਸਤਾਨ ਵਿਦੇਸ਼ੀ ਵਪਾਰ ਲਈ ਪਾਕਿਸਤਾਨ ’ਤੇ ਬਹੁਤ ਜ਼ਿਆਦਾ ਨਿਰਭਰ ਸੀ। ਇਸ ਤਾਜ਼ਾ ਵਿਕਾਸ ਨੂੰ ਪਾਕਿਸਤਾਨ-ਅਫਗਾਨਿਸਤਾਨ ਸਰਹੱਦੀ ਟਕਰਾਅ ਦੇ ਵਿਚਕਾਰ ਤਾਲਿਬਾਨ ਲਈ ਇਕ ਵੱਡੀ ਸਫਲਤਾ ਵਜੋਂ ਵੀ ਦੇਖਿਆ ਜਾ ਰਿਹਾ ਹੈ।

ਤਾਲਿਬਾਨ ਦੇ ਲੋਕ ਨਿਰਮਾਣ ਮੰਤਰਾਲੇ ਦੇ ਬੁਲਾਰੇ ਮੁਹੰਮਦ ਅਸ਼ਰਫ ਹੱਕਸ਼ੇਨਸ ਨੇ ਦੱਸਿਆ ਕਿ ਹੇਰਾਤ ਸੂਬੇ ਦੇ ਰੋਜ਼ਾਨਕ ਸਟੇਸ਼ਨ ’ਤੇ 1,120 ਟਨ ਡੀਜ਼ਲ ਪਹੁੰਚਿਆ। ‘ਐਕਸ’ ’ਤੇ ਇਕ ਪੋਸਟ ਵਿਚ ਹੱਕਸ਼ੇਨਸ ਨੇ ਕਿਹਾ ਕਿ ਇਸ ਖੇਪ ਵਿਚ ਟਾਈਪ-02 ਡੀਜ਼ਲ ਬਾਲਣ ਲਿਜਾਣ ਵਾਲੇ 20 ਵੈਗਨ ਸ਼ਾਮਲ ਸਨ, ਜਿਨ੍ਹਾਂ ਦਾ ਕੁੱਲ ਭਾਰ 1,120 ਟਨ ਸੀ। ਅਧਿਕਾਰੀ ਨੇ ਇੰਪੋਰਟ ਕਰਨ ਵਾਲੀ ਕੰਪਨੀ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ, ਉਸ ਨੇ ਪੁਸ਼ਟੀ ਕੀਤੀ ਕਿ ਇਹ ਖੇਪ ਇਕ ਨਿੱਜੀ ਕੰਪਨੀ ਦੀ ਹੈ।

ਕੀ ਹੈ ਖਾਫ-ਹੇਰਾਤ ਰੇਲਵੇ ਪ੍ਰਾਜੈਕਟ

ਖਾਫ-ਹੇਰਾਤ ਰੇਲਵੇ ਅਫਗਾਨਿਸਤਾਨ ਅਤੇ ਈਰਾਨ ਵਿਚਕਾਰ ਇਕ ਸਾਂਝਾ ਪ੍ਰਾਜੈਕਟ ਹੈ। ਇਹ ਦੋਵਾਂ ਦੇਸ਼ਾਂ ਵਿਚਕਾਰ ਵਪਾਰ, ਆਵਾਜਾਈ ਅਤੇ ਊਰਜਾ ਸਹਿਯੋਗ ਨੂੰ ਵਧਾਉਣ ਲਈ ਇਕ ਵਿਆਪਕ ਪਹਿਲਕਦਮੀ ਦਾ ਹਿੱਸਾ ਹੈ। ਇਹ ਰੇਲਵੇ ਲਾਈਨ ਪੂਰਬੀ ਈਰਾਨ ਵਿਚ ਖਾਫ ਨੂੰ ਪੱਛਮੀ ਅਫਗਾਨਿਸਤਾਨ ਵਿਚ ਹੇਰਾਤ ਨਾਲ ਜੋੜਦੀ ਹੈ।

ਈਰਾਨ ਦੁਆਰਾ ਫੰਡ ਕੀਤੇ ਗਏ ਇਸ ਪ੍ਰਾਜੈਕਟ ਦੀ ਸ਼ੁਰੂਆਤ 2007 ਵਿਚ ਹੋਈ ਸੀ ਅਤੇ ਇਸ ਨੂੰ ਇਲਾਕੇ ਵਿਚ ਵਪਾਰ ਅਤੇ ਸੰਪਰਕ ਵਧਾਉਣ ਲਈ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ। ਇਹ ਰੇਲਵੇ ਲਾਈਨ ਅਫਗਾਨਿਸਤਾਨ ਨੂੰ ਸਹਾਇਤਾ ਲਈ ਪਾਕਿਸਤਾਨ ’ਤੇ ਨਿਰਭਰ ਕੀਤੇ ਬਿਨਾਂ ਆਪਣੇ ਵਿਦੇਸ਼ੀ ਵਪਾਰ ਦਾ ਵਿਸਥਾਰ ਕਰਨ ਦੇ ਯੋਗ ਬਣਾਏਗੀ।