''ਕੋਰੋਨਾ'' ਕਾਰਨ ਸਭ ਤੋਂ ਘੱਟ ਉਮਰ ਦੀ ਔਰਤ ਦੀ ਮੌਤ, ਡਿਲਵਰੀ ਤੋਂ ਬਾਅਦ ਤੋੜਿਆ ਦਮ

ਵਰਸਾ- ਕੋਰੋਨਾਵਾਇਰਸ ਦਾ ਕਹਿਰ ਪੂਰੀ ਦੁਨੀਆ ਵਿਚ ਜਾਰੀ ਹੈ। ਇਟਲੀ ਵਿਚ ਕੋਰੋਨਾਵਾਇਰਸ ਕਾਰਨ ਮਰਨ ਵਾਲੀਆਂ ਦੀ ਗਿਣਤੀ 4000 ਪਾਰ ਕਰ ਗਈ ਹੈ। ਇਸ ਮਹਾਮਾਰੀ ਕਾਰਨ ਜਿਥੇ ਮਰਨ ਵਾਲਿਆਂ ਵਿਚ ਵਧੇਰੇ ਗਿਣਤੀ ਬਜ਼ੁਰਗਾਂ ਦੀ ਹੈ ਉਥੇ ਹੀ ਪੋਲੈਂਡ ਵਿਚ ਇਕ ਸਿਹਤਮੰਦ ਔਰਤ ਨੇ ਸਿਰਫ 27 ਸਾਲ ਦੀ ਉਮਰ ਵਿਚ ਕੋਰੋਨਾਵਾਇਰਸ ਕਾਰਨ ਦਮ ਤੋੜ ਦਿੱਤਾ ਹੈ।

ਮਹਿਲਾ ਦੀ ਮੌਤ ਇਕ ਬੱਚੇ ਨੂੰ ਜਨਮ ਦੇਣ ਤੋਂ ਬਾਅਦ ਹੋਈ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਔਰਤ ਪੂਰੀ ਤਰ੍ਹਾਂ ਨਾਲ ਸਿਹਤਮੰਦ ਸੀ। ਪੋਲੈਂਡ ਵਿਚ ਇਹ ਕੋਰੋਨਾਵਾਇਰਸ ਕਾਰਨ 6ਵੀਂ ਮੌਤ ਹੈ ਜਦਕਿ ਦੁਨੀਆਭਰ ਵਿਚ ਸਭ ਤੋਂ ਘੱਟ ਉਮਰ ਵਿਚ ਮੌਤ ਦਾ ਇਹ ਪਹਿਲਾ ਮਾਮਲਾ ਹੈ। ਇਸ ਮਹਿਲਾ ਨੂੰ ਕੋਰੋਨਾਵਾਇਰਸ ਆਪਣੀ ਮਾਂ ਦੇ ਕਾਰਨ ਹੋਇਆ ਸੀ, ਜੋ ਹਾਲ ਹੀ ਵਿਚ ਇਟਲੀ ਤੋਂ ਪਰਤੀ ਸੀ। ਤੁਹਾਨੂੰ ਦੱਸ ਦਈਏ ਕਿ ਇਟਲੀ ਇਸ ਗਲੋਬਲ ਮਹਾਮਾਰੀ ਦਾ ਕੇਂਦਰ ਬਣ ਗਿਆ ਹੈ।

ਪੋਲੈਂਡ ਮੀਡੀਆ ਮੁਤਾਬਕ ਮਹਿਲਾ ਨੇ ਕੁਝ ਦਿਨ ਪਹਿਲਾਂ ਹੀ ਬੱਚੇ ਨੂੰ ਜਨਮ ਦਿੱਤਾ ਸੀ ਤੇ ਉਸ ਨੂੰ ਕਿਸੇ ਵੀ ਤਰ੍ਹਾਂ ਦੀ ਬੀਮਾਰੀ ਨਹੀਂ ਸੀ। ਇਸ ਤੋਂ ਬਾਅਦ ਪੋਲੈਂਡ ਸਿਹਤ ਸਕੱਤਰ ਮੈਟ ਹੈਨਕਾਕ ਨੇ ਲੋਕਾਂ ਨੂੰ 12 ਹਫਤਿਆਂ ਤੱਕ ਸੋਸ਼ਲ ਡਿਸਟੈਂਸ ਬਣਾਉਣ ਲਈ ਕਿਹਾ ਹੈ। ਸਰਕਾਰ ਇਥੇ ਹੋਰ ਵੀ ਕਈ ਨੀਤੀਆਂ ਦਾ ਐਲਾਨ ਕਰਨ ਵਾਲੀ ਹੈ।

ਇਸ ਤੋਂ ਇਲਾਵਾ ਪੋਲੈਂਡ ਸਰਕਾਰ ਤਕਰੀਬਨ 14 ਲੱਖ ਲੋਕਾਂ ਨੂੰ ਮੋਬਾਈਲ 'ਤੇ ਸੰਦੇਸ਼ ਤੇ ਪੱਤਰ ਰਾਹੀਂ ਸੰਦੇਸ਼ ਭੇਜ ਕੇ ਵੱਖਰਾ ਰਹਿਣ ਦੀ ਸਲਾਹ ਦੇਵੇਗੀ। ਇਹਨਾਂ ਵਿਚ ਵਧੇਰੇ ਲੋਕ ਉਹ ਹਨ, ਜਿਹਨਾਂ ਨੂੰ ਪਹਿਲਾਂ ਹੀ ਕੈਂਸਰ, ਦਿਲ ਜਾਂ ਕਿਡਨੀ ਨਾਲ ਜੁੜੀਆਂ ਬੀਮਾਰੀਆਂ ਹਨ।