ਚੀਨ ਦੇ ਕਰਜ਼ੇ ਹੇਠ ਦਬਿਆ ਲਾਓਸ, ਰੇਲਵੇ ਪ੍ਰੋਜੈਕਟ ਨੇ ਬਦਲੀ ਦੇਸ਼ ਦੀ ਨੁਹਾਰ

ਇੰਟਰਨੈਸ਼ਨਲ ਡੈਸਕ: ਚੀਨ ਦੀ 'ਬੈਲਟ ਐਂਡ ਰੋਡ' ਮੁਹਿੰਮ ਤਹਿਤ ਬਣੇ ਚੀਨ-ਲਾਓਸ ਰੇਲਵੇ ਕਾਰੀਡੋਰ ਨੇ ਲਾਓਸ ਦੀ ਭੂਗੋਲਿਕ ਅਤੇ ਆਰਥਿਕ ਤਸਵੀਰ ਨੂੰ ਵੱਡੇ ਪੱਧਰ 'ਤੇ ਪ੍ਰਭਾਵਿਤ ਕੀਤਾ ਹੈ। ਲੁਆਂਗ ਪ੍ਰਾਬਾਂਗ ਵਰਗੇ ਇਤਿਹਾਸਕ ਸ਼ਹਿਰਾਂ ਵਿੱਚ ਹੁਣ ਸਥਾਨਕ ਸੱਭਿਆਚਾਰ ਦੀ ਬਜਾਏ ਚੀਨੀ ਪ੍ਰਭਾਵ ਸਾਫ਼ ਨਜ਼ਰ ਆ ਰਿਹਾ ਹੈ। ਰੇਲਵੇ ਸਟੇਸ਼ਨਾਂ 'ਤੇ ਚੀਨੀ ਭਾਸ਼ਾ ਵਿੱਚ ਲਿਖੇ ਸਾਈਨ ਬੋਰਡ, ਚੀਨੀ ਸਟਾਫ਼ ਅਤੇ ਚੀਨੀ ਭਾਸ਼ਾ ਵਿੱਚ ਹੋ ਰਹੀਆਂ ਘੋਸ਼ਣਾਵਾਂ ਕਾਰਨ ਇਹ ਇਲਾਕੇ ਕਿਸੇ ਚੀਨੀ ਸਰਹੱਦੀ ਕਸਬੇ ਵਰਗੇ ਪ੍ਰਤੀਤ ਹੋਣ ਲੱਗੇ ਹਨ।

422 ਕਿਲੋਮੀਟਰ ਲੰਬਾ  ਇਹ ਆਧੁਨਿਕ ਰੇਲਵੇ ਪ੍ਰੋਜੈਕਟ, ਜੋ ਰਾਜਧਾਨੀ ਵਿਏਨਟਿਏਨ ਨੂੰ ਚੀਨ ਦੇ ਕੁਨਮਿੰਗ ਸ਼ਹਿਰ ਨਾਲ ਜੋੜਦਾ ਹੈ, ਲਗਭਗ 6 ਬਿਲੀਅਨ ਡਾਲਰ ਦੀ ਲਾਗਤ ਨਾਲ ਤਿਆਰ ਹੋਇਆ ਹੈ। ਇਸ ਪ੍ਰੋਜੈਕਟ ਦਾ 70% ਖਰਚਾ ਚੀਨ ਨੇ ਚੁੱਕਿਆ ਹੈ, ਜਦਕਿ ਲਾਓਸ ਦੇ ਹਿੱਸੇ ਦਾ ਵੱਡਾ ਹਿੱਸਾ ਵੀ ਚੀਨ ਤੋਂ ਲਏ ਗਏ ਕਰਜ਼ੇ ਰਾਹੀਂ ਹੀ ਪੂਰਾ ਕੀਤਾ ਗਿਆ ਹੈ। ਅੰਕੜਿਆਂ ਅਨੁਸਾਰ ਲਾਓਸ ਦੇ ਕੁੱਲ 13.8 ਬਿਲੀਅਨ ਡਾਲਰ ਦੇ ਵਿਦੇਸ਼ੀ ਕਰਜ਼ੇ ਵਿੱਚੋਂ 76% ਹਿੱਸਾ ਇਕੱਲੇ ਚੀਨ ਦਾ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ-   ਸਾਬਕਾ ਐਨਡੀਪੀ ਨੇਤਾ ਜਗਮੀਤ ਸਿੰਘ ਨੂੰ ਮਿਲ ਸਕਦੈ ਅਹਿਮ ਅਹੁਦਾ!  ਵਿਰੋਧ 'ਚ ਉੱਠੀ ਆਵਾਜ਼ 

ਅੰਤਰਰਾਸ਼ਟਰੀ ਮੁਦਰਾ ਕੋਸ਼ (IMF) ਨੇ 2026 ਦੀ ਸ਼ੁਰੂਆਤ ਵਿੱਚ ਲਾਓਸ ਨੂੰ "ਕਰਜ਼ੇ ਦੀ ਗੰਭੀਰ ਮਾਰ"ਹੇਠ ਆਏ ਦੇਸ਼ਾਂ ਦੀ ਸ਼੍ਰੇਣੀ ਵਿੱਚ ਰੱਖਿਆ ਹੈ। ਮਾਹਿਰਾਂ ਵੱਲੋਂ ਚਿੰਤਾ ਜਤਾਈ ਜਾ ਰਹੀ ਹੈ ਕਿ ਲਾਓਸ ਦੀ ਹਾਲਤ ਵੀ ਪਾਕਿਸਤਾਨ ਅਤੇ ਸ਼੍ਰੀਲੰਕਾ ਵਰਗੀ ਹੋ ਸਕਦੀ ਹੈ, ਜੋ ਚੀਨੀ ਕਰਜ਼ੇ ਦੇ ਜਾਲ ਵਿੱਚ ਫਸ ਕੇ ਭਾਰੀ ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਚੁੱਕੇ ਹਨ। ਰੇਲਵੇ ਪ੍ਰੋਜੈਕਟ ਦੀ ਕੁੱਲ ਲਾਗਤ ਲਾਓਸ ਦੀ ਜੀ.ਡੀ.ਪੀ. (GDP) ਦੇ 35% ਦੇ ਬਰਾਬਰ ਹੈ। ਜਿੱਥੇ ਇਸ ਰੇਲਵੇ ਨੇ ਰਾਜਧਾਨੀ ਤੋਂ ਸੈਰ-ਸਪਾਟਾ ਕੇਂਦਰਾਂ ਤੱਕ ਦੀ ਯਾਤਰਾ ਦੇ ਸਮੇਂ ਨੂੰ 8 ਘੰਟਿਆਂ ਤੋਂ ਘਟਾ ਕੇ ਸਿਰਫ 2 ਘੰਟੇ ਕਰ ਦਿੱਤਾ ਹੈ, ਉੱਥੇ ਹੀ ਸਥਾਨਕ ਲੋਕ ਚੀਨ ਦੇ ਵਧਦੇ ਕਬਜ਼ੇ ਤੋਂ ਚਿੰਤਤ ਹਨ। ਵਿਏਨਟਿਏਨ ਵਿੱਚ ਰਹਿਣ ਵਾਲੇ ਨੌਜਵਾਨਾਂ ਦਾ ਕਹਿਣਾ ਹੈ ਕਿ ਦੇਸ਼ ਵਿੱਚ ਰੁਜ਼ਗਾਰ ਦੇ ਮੌਕੇ ਖ਼ਤਮ ਹੋ ਰਹੇ ਹਨ, ਜਿਸ ਕਾਰਨ ਉਹ ਕੰਮ ਦੀ ਭਾਲ ਵਿੱਚ ਥਾਈਲੈਂਡ ਜਾਣ ਲਈ ਮਜਬੂਰ ਹਨ। 

ਇੱਕ ਸਥਾਨਕ ਨਾਗਰਿਕ ਨੇ ਕਿਹਾ ਕਿ ਭਾਵੇਂ ਚੀਨ ਨੇ ਬੁਨਿਆਦੀ ਢਾਂਚਾ ਦਿੱਤਾ ਹੈ, ਪਰ ਅਜਿਹਾ ਲੱਗਦਾ ਹੈ ਕਿ ਉਹ ਹੌਲੀ-ਹੌਲੀ ਹਰ ਚੀਜ਼ 'ਤੇ ਕਬਜ਼ਾ ਕਰ ਰਹੇ ਹਨ। ਚੀਨ ਦਾ ਮੁੱਖ ਰਣਨੀਤਕ ਮਕਸਦ ਇਸ ਰੇਲਵੇ ਰਾਹੀਂ ਹਿੰਦ ਮਹਾਸਾਗਰ ਅਤੇ ਮਲੱਕਾ ਸਟ੍ਰੇਟ ਤੱਕ ਸਿੱਧਾ ਰਸਤਾ ਬਣਾਉਣਾ ਹੈ, ਪਰ ਇਸ ਪ੍ਰਕਿਰਿਆ ਵਿੱਚ ਲਾਓਸ ਵਰਗੇ ਛੋਟੇ ਦੇਸ਼ ਦੀ ਆਰਥਿਕ ਆਜ਼ਾਦੀ ਖ਼ਤਰੇ ਵਿੱਚ ਪੈ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ