ਕੈਮਰੂਨ ''ਚ ਸਰਕਾਰੀ ਬਲਾਂ ਤੇ ਵੱਖਵਾਦੀਆਂ ਵਿਚਕਾਰ ਝੜਪ ''ਚ ਇੱਕ ਵਿਅਕਤੀ ਦੀ ਮੌਤ

ਯਾਉਂਡੇ (ਏਜੰਸੀ)- ਕੈਮਰੂਨ ਦੇ ਯੁੱਧ ਪ੍ਰਭਾਵਿਤ ਅੰਗਰੇਜ਼ੀ ਭਾਸ਼ੀ ਉੱਤਰ-ਪੱਛਮੀ ਖੇਤਰ ਵਿੱਚ ਸਰਕਾਰੀ ਬਲਾਂ ਅਤੇ ਵੱਖਵਾਦੀਆਂ ਵਿਚਕਾਰ ਹੋਈਆਂ ਝੜਪਾਂ ਵਿੱਚ ਵੀਰਵਾਰ ਨੂੰ 1 ਵਿਅਕਤੀ ਦੀ ਮੌਤ ਹੋ ਗਈ ਅਤੇ 6 ਹੋਰ ਜ਼ਖਮੀ ਹੋ ਗਏ। ਇੱਕ ਫੌਜੀ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿੱਤੀ ਹੈ।

ਅਧਿਕਾਰੀ ਅਨੁਸਾਰ, ਗੋਲੀਬਾਰੀ ਖੇਤਰ ਦੇ ਮੁੱਖ ਸ਼ਹਿਰ ਬਾਮੇਂਡਾ ਦੇ ਗੁਆਂਢ ਵਿੱਚ ਹੋਈ। ਇੱਥੇ ਸਰਕਾਰੀ ਬਲਾਂ ਨੇ ਵੱਖਵਾਦੀਆਂ ਦੀ ਘੁਸਪੈਠ ਦੀ ਕੋਸ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ ਸੀ। ਉਨ੍ਹਾਂ ਕਿਹਾ, 'ਵੱਖਵਾਦੀਆਂ ਨੇ ਨਾਤਾਬੇਸੀ ਵਿੱਚ ਇੱਕ ਫੌਜੀ ਚੌਕੀ 'ਤੇ ਹਮਲਾ ਕੀਤਾ। ਸਾਡੀਆਂ ਬਹਾਦਰ ਫੌਜਾਂ ਨੇ ਜਵਾਬੀ ਕਾਰਵਾਈ ਕਰਦਿਆਂ ਗੋਲੀਬਾਰੀ ਕੀਤੀ। ਇਸ ਦੌਰਾਨ ਇੱਕ ਨਾਗਰਿਕ ਦੀ ਗੋਲੀ ਲੱਗਣ ਕਾਰਨ ਮੌਤ ਹੋ ਗਈ ਅਤੇ 6 ਹੋਰ ਜ਼ਖਮੀ ਹੋ ਗਏ। ਸਾਡੀ ਫੌਜ ਉਨ੍ਹਾਂ ਦੇ ਛੁਪਣਗਾਹਾਂ ਤੱਕ ਉਨ੍ਹਾਂ ਦਾ ਪਿੱਛਾ ਕਰ ਰਹੀ ਹੈ।'

ਧਿਆਨ ਦੇਣ ਯੋਗ ਹੈ ਕਿ 2017 ਤੋਂ ਕੈਮਰੂਨ ਦੇ 2 ਅੰਗਰੇਜ਼ੀ ਭਾਸ਼ੀ ਖੇਤਰਾਂ ਉੱਤਰ-ਪੱਛਮ ਅਤੇ ਦੱਖਣ-ਪੱਛਮ ਵਿੱਚ ਵੱਖਵਾਦੀ ਬਗਾਵਤ ਚੱਲ ਰਹੀ ਹੈ। ਹਥਿਆਰਬੰਦ ਵੱਖਵਾਦੀ ਜ਼ਿਆਦਾਤਰ ਫ੍ਰੈਂਚ ਬੋਲਣ ਵਾਲੇ ਕੈਮਰੂਨ ਤੋਂ ਵੱਖ ਹੋਣ ਅਤੇ ਖੇਤਰਾਂ ਵਿੱਚ ਇੱਕ ਸੁਤੰਤਰ ਰਾਸ਼ਟਰ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ।