ਚੀਨ ''ਚ ਕੈਥੋਲਿਕ ਚਰਚ ''ਤੇ ਬੀਜਿੰਗ ਦਾ ''ਸਖ਼ਤ ਕੰਟਰੋਲ''

ਬੀਜਿੰਗ/ਮਿਲਾਨ: ਚੀਨ 'ਚ ਕੈਥੋਲਿਕ ਚਰਚ ਉੱਤੇ ਬੀਜਿੰਗ ਦਾ ਕੰਟਰੋਲ ਲਗਾਤਾਰ ਸਖ਼ਤ ਹੁੰਦਾ ਜਾ ਰਿਹਾ ਹੈ। ਇੱਕ ਤਾਜ਼ਾ ਰਿਪੋਰਟ ਅਨੁਸਾਰ ਨਵੇਂ ਪੋਪ ਲਿਓ XIV ਦੀ ਚੋਣ ਤੇ ਪੋਪ ਫਰਾਂਸਿਸ ਦੀ ਮੌਤ ਤੋਂ ਇੱਕ ਸਾਲ ਬਾਅਦ ਵੀ ਚੀਨ ਵਿੱਚ ਚਰਚ ਦੀਆਂ ਗਤੀਵਿਧੀਆਂ ਨੂੰ ਸਖ਼ਤ ਨਿਯਮਾਂ ਅਤੇ ਸਿਆਸੀ ਦਬਾਅ ਹੇਠ ਦਬਾਇਆ ਜਾ ਰਿਹਾ ਹੈ। ਚੀਨ ਦੀਆਂ ਸਰਕਾਰੀ ਧਾਰਮਿਕ ਸੰਸਥਾਵਾਂ ਨੇ ਨਵੇਂ ਪੋਪ ਦੀ ਚੋਣ ਬਾਰੇ ਬਹੁਤ ਹੀ ਘੱਟ ਜਾਣਕਾਰੀ ਸਾਂਝੀ ਕੀਤੀ ਹੈ। ਇਸ ਚੁੱਪ ਦਾ ਮੁੱਖ ਕਾਰਨ ਇਹ ਦੱਸਿਆ ਜਾ ਰਿਹਾ ਹੈ ਕਿ ਚੀਨੀ ਅਧਿਕਾਰੀ ਅਜੇ ਵੀ ਨਵੇਂ ਪੋਪ ਦੇ ਰੁਖ਼ ਦਾ ਨਿਰੀਖਣ ਕਰ ਰਹੇ ਹਨ। ਵਿਦੇਸ਼ੀ ਮਾਮਲਿਆਂ ਵਿੱਚ ਸਖ਼ਤੀ ਕਾਰਨ ਸਥਾਨਕ ਭਾਈਚਾਰਿਆਂ ਨੇ "ਸਮੂਹਿਕ ਚੁੱਪ" ਧਾਰੀ ਹੋਈ ਹੈ।

ਚੀਨ ਵਿੱਚ ਧਰਮਾਂ ਦੇ "ਚੀਨੀਕਰਨ"  ਦੀ ਮੁਹਿੰਮ ਤਹਿਤ ਸਿਆਸੀ ਅਧਿਐਨ ਦੀਆਂ ਗਤੀਵਿਧੀਆਂ ਕਈ ਗੁਣਾ ਵਧ ਗਈਆਂ ਹਨ। ਪਾਦਰੀਆਂ ਤੇ ਬਿਸ਼ਪਾਂ ਨੂੰ ਦੇਸ਼ ਭਗਤੀ, ਕਮਿਊਨਿਸਟ ਪਾਰਟੀ ਪ੍ਰਤੀ ਪਿਆਰ ਤੇ ਸਮਾਜਵਾਦ ਦੇ ਸਿਧਾਂਤਾਂ ਨੂੰ ਪੜ੍ਹਨ ਅਤੇ ਉਨ੍ਹਾਂ 'ਤੇ ਰਿਪੋਰਟਾਂ ਲਿਖਣ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਕਈ ਕਲਰਜੀ ਮੈਂਬਰਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਮੀਟਿੰਗਾਂ ਤੇ ਰਿਪੋਰਟਾਂ ਕਾਰਨ ਉਨ੍ਹਾਂ ਦਾ ਅਸਲ ਮਿਸ਼ਨਰੀ ਤੇ ਸੇਵਾ ਦਾ ਕੰਮ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਿਹਾ ਹੈ। ਸ਼ੰਘਾਈ ਵਰਗੇ ਪ੍ਰਮੁੱਖ ਖੇਤਰਾਂ ਵਿੱਚ ਨਵੇਂ ਨਿਯਮਾਂ ਤਹਿਤ ਨਾਬਾਲਗਾਂ ਦੇ ਚਰਚ ਵਿੱਚ ਦਾਖਲ ਹੋਣ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਇੱਥੋਂ ਤੱਕ ਕਿ ਇਤਿਹਾਸਕ ਸਥਾਨਾਂ ਅਤੇ ਸੈਲਾਨੀ ਕੇਂਦਰਾਂ 'ਤੇ ਵੀ ਬੱਚਿਆਂ ਨੂੰ ਅੰਦਰ ਨਹੀਂ ਜਾਣ ਦਿੱਤਾ ਜਾ ਰਿਹਾ, ਜਿਸ ਕਾਰਨ ਸ਼ਰਧਾਲੂਆਂ ਵਿੱਚ ਭਾਰੀ ਰੋਸ ਹੈ। ਇਸ ਤੋਂ ਇਲਾਵਾ ਇੰਟਰਨੈੱਟ 'ਤੇ ਕੈਥੋਲਿਕ ਸਮੱਗਰੀ ਨੂੰ ਹਟਾਇਆ ਜਾ ਰਿਹਾ ਹੈ ਤੇ ਧਾਰਮਿਕ ਵੈੱਬਸਾਈਟਾਂ ਦੀ ਵਰਤੋਂ ਲਈ ਅਸਲੀ ਨਾਮ ਨਾਲ ਰਜਿਸਟ੍ਰੇਸ਼ਨ ਲਾਜ਼ਮੀ ਕਰ ਦਿੱਤੀ ਗਈ ਹੈ।

ਰਿਪੋਰਟ ਦੱਸਦੀ ਹੈ ਕਿ 'ਅੰਡਰਗਰਾਊਂਡ' ਪਾਦਰੀਆਂ ਨੂੰ ਪਾਰਟੀ ਦੀ ਅਗਵਾਈ ਸਵੀਕਾਰ ਕਰਨ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। ਦੂਜੇ ਪਾਸੇ ਹੁਨਾਨ ਸੂਬੇ ਵਿੱਚ ਭ੍ਰਿਸ਼ਟਾਚਾਰ ਦੇ ਗੰਭੀਰ ਮਾਮਲੇ ਸਾਹਮਣੇ ਆਏ ਹਨ, ਜਿੱਥੇ ਇੱਕ ਬਿਸ਼ਪ ਅਤੇ ਚਰਚ ਦੇ ਹੋਰ ਅਧਿਕਾਰੀਆਂ ਨੂੰ ਫੰਡਾਂ ਦੀ ਹੇਰਾਫੇਰੀ ਅਤੇ ਚਰਚ ਦੀ ਜਾਇਦਾਦ ਵੇਚਣ ਦੇ ਦੋਸ਼ ਵਿੱਚ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਮਾਹਰਾਂ ਦਾ ਮੰਨਣਾ ਹੈ ਕਿ ਅੱਜ ਚੀਨ ਵਿੱਚ ਚਰਚ ਵਿਸ਼ਵਵਿਆਪੀ ਕੈਥੋਲਿਕ ਭਾਈਚਾਰੇ ਤੋਂ ਵੱਖ-ਥਲੱਗ ਮਹਿਸੂਸ ਕਰ ਰਹੀ ਹੈ। ਹਾਲਾਂਕਿ ਵੈਟੀਕਨ ਅਤੇ ਚੀਨ ਵਿਚਕਾਰ ਬਿਸ਼ਪਾਂ ਦੀ ਨਿਯੁਕਤੀ ਨੂੰ ਲੈ ਕੇ ਸਮਝੌਤਾ ਹੋਇਆ ਹੈ, ਪਰ ਜ਼ਮੀਨੀ ਪੱਧਰ 'ਤੇ ਧਾਰਮਿਕ ਆਜ਼ਾਦੀ ਅਜੇ ਵੀ ਇੱਕ ਵੱਡੀ ਚੁਣੌਤੀ ਬਣੀ ਹੋਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e