ਬੰਗਲਾਦੇਸ਼: ਪੁਲਸ ਛਾਪੇਮਾਰੀ ਦੌਰਾਨ ਬੰਬ ਬਣਾਉਣ ਦਾ ਸਾਮਾਨ ਤੇ 9,000 ਕਾਗਜ਼ੀ ਮਾਸਕ ਬਰਾਮਦ, ਇੱਕ ਗ੍ਰਿਫ਼ਤਾਰ

ਇੰਟਰਨੈਸ਼ਨਲ ਡੈਸਕ: ਬੰਗਲਾਦੇਸ਼ ਪੁਲਸ ਨੇ ਸਾਊਥ ਕੇਰਾਨੀਗੰਜ ਇਲਾਕੇ ਵਿੱਚ ਕੀਤੀ ਇੱਕ ਛਾਪੇਮਾਰੀ ਦੌਰਾਨ ਧਮਾਕਾਖੇਜ਼ ਸਮੱਗਰੀ, ਦੇਸੀ ਬੰਬ ਬਣਾਉਣ ਦਾ ਸਾਮਾਨ ਤੇ 9,000 ਕਾਗਜ਼ੀ ਮਾਸਕ ਬਰਾਮਦ ਕੀਤੇ ਹਨ। ਇਸ ਮਾਮਲੇ ਦੇ ਸਬੰਧ ਵਿੱਚ 30 ਸਾਲਾ ਜ਼ਾਹਿਦ ਹਸਨ ਏਮੋਨ ਨਾਮ ਦੇ ਇੱਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
19 ਸਤੰਬਰ ਨੂੰ ਜਾਤਰਾਬਾਰੀ ਪੁਲਿਸ ਸਟੇਸ਼ਨ ਦੇ ਸਾਹਮਣੇ ਇੱਕ ਦੇਸੀ ਬੰਬ ਧਮਾਕਾ ਹੋਇਆ ਸੀ। ਸ਼ਿਆਮਪੁਰ ਮਾਡਲ ਪੁਲਿਸ ਸਟੇਸ਼ਨ ਦੇ ਹਵਾਲੇ ਨਾਲ ਸਾਹਮਣੇ ਆਈ ਜਾਣਕਾਰੀ ਅਨੁਸਾਰ, ਇਸ ਘਟਨਾ ਦੀ ਜਾਂਚ ਦੌਰਾਨ ਪੁਲਸ ਨੂੰ ਏਮੋਨ ਦੀ ਸ਼ਮੂਲੀਅਤ ਬਾਰੇ ਸੂਚਨਾ ਮਿਲੀ ਸੀ। ਇਸ ਤੋਂ ਬਾਅਦ ਪੁਲਸ ਨੇ ਉਸ ਨੂੰ ਸ਼ੁੱਕਰਵਾਰ ਨੂੰ ਬਾਘਾਪੁਰ ਇਲਾਕੇ ਤੋਂ ਕਾਬੂ ਕਰ ਲਿਆ।
ਦੋਸ਼ੀ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਮਿਲੀ ਜਾਣਕਾਰੀ ਦੇ ਆਧਾਰ 'ਤੇ ਕੀਤੀ ਗਈ ਕਾਰਵਾਈ ਦੌਰਾਨ ਪੁਲਿਸ ਨੇ 1.5 ਕਿਲੋ ਕਾਸਟਿਕ ਸੋਡਾ ਅਤੇ 1.6 ਕਿਲੋ ਸਲਫ਼ਰ ਬਰਾਮਦ ਕੀਤਾ, ਜਿਸ ਦੀ ਵਰਤੋਂ ਦੇਸੀ ਬੰਬ ਤਿਆਰ ਕਰਨ ਲਈ ਕੀਤੀ ਜਾਂਦੀ ਸੀ। ਇਸ ਤੋਂ ਇਲਾਵਾ 5 ਕਿਲੋ ਮਾਰਬਲ, 2 ਕਿਲੋ 1-ਇੰਚ ਦੀਆਂ ਕੰਡਿਆਲੀਆਂ ਕਿੱਲਾਂ, ਅਤੇ ਬੰਬਾਂ ਨੂੰ ਲਪੇਟਣ ਲਈ ਵਰਤੀਆਂ ਜਾਂਦੀਆਂ 20 ਲਾਲ ਅਤੇ 11 ਕਾਲੀਆਂ ਸੈਲੋਫੇਨ ਟੇਪਾਂ ਵੀ ਜ਼ਬਤ ਕੀਤੀਆਂ ਗਈਆਂ ਹਨ।
ਛਾਪੇਮਾਰੀ ਦੌਰਾਨ ਪੁਲਿਸ ਨੇ ਤਿੰਨ ਕਾਰਟਨਾਂ ਵਿੱਚ ਪੈਕ ਕੀਤੇ 9,000 ਕਾਗਜ਼ੀ ਮਾਸਕ, ਮਾਸਕ ਪਾਉਣ ਲਈ ਇਲਾਸਟਿਕ ਦੇ 30 ਪੈਕੇਟ, ਅਤੇ ਸਮੱਗਰੀ ਪੀਸਣ ਲਈ ਵਰਤਿਆ ਜਾਂਦਾ ਜੈਪਾਨ ਬ੍ਰਾਂਡ ਦਾ ਬਲੈਂਡਰ ਅਤੇ ਜਾਰ ਵੀ ਬਰਾਮਦ ਕੀਤਾ ਹੈ। ਫਿਲਹਾਲ 19 ਸਤੰਬਰ ਦੇ ਧਮਾਕੇ ਅਤੇ ਫੜੇ ਗਏ ਵਿਅਕਤੀ ਦੀ ਭੂਮਿਕਾ ਸਬੰਧੀ ਅੱਗੇ ਦੀ ਜਾਂਚ ਜਾਰੀ ਹੈ।