ਆਸਟ੍ਰੇਲੀਆ : ਰਹਾਫ ਦੇ ਸਮਰਥਨ ''ਚ ਔਰਤਾਂ ਨੇ ਟੌਪਲੈਸ ਹੋ ਕੇ ਕੀਤਾ ਪ੍ਰਦਰਸ਼ਨ
01/10/2019 11:18:25 AM
ਸਿਡਨੀ (ਬਿਊਰੋ)— ਆਸਟ੍ਰੇਲੀਆ ਦੇ ਸ਼ਹਿਰ ਸਿਡਨੀ ਵਿਚ ਚਾਰ ਔਰਤਾਂ ਨੇ ਭਗੌੜੀ ਸਾਊਦੀ ਮਹਿਲਾ ਰਹਾਫ ਮੁਹੰਮਦ ਅਲਕੂਨੂਨ ਦਾ ਸਮਰਥਨ ਕਰਨ ਲਈ ਟੌਪਲੈਸ ਹੋ ਕੇ ਵਿਰੋਧ ਪ੍ਰਦਰਸ਼ਨ ਕੀਤਾ। ਕਿਉਂਕਿ ਆਸਟ੍ਰੇਲੀਆ ਨੇ ਸਿਰਫ ਸ਼ਰਨਾਰਥੀ ਦੇ ਰੂਪ ਵਿਚ ਰਹਾਫ ਨੂੰ ਸ਼ਰਣ ਦੇਣ ਦੀ ਗੱਲ ਕੀਤੀ ਹੈ। ਬੈਂਕਾਕ ਵਿਚ ਆਸਟ੍ਰੇਲੀਆ ਜਾਣ ਵਾਲੇ ਰਸਤੇ ਵਿਚ ਹਿਰਾਸਤ ਵਿਚ ਲਏ ਜਾਣ ਦੇ ਬਾਅਦ ਸੰਯੁਕਤ ਰਾਸ਼ਟਰ ਦੇ ਸ਼ਰਨਾਰਥੀਆਂ ਦੇ ਹਾਈ ਕਮਿਸ਼ਨਰ ਨੇ ਰਹਾਫ ਨੂੰ ਸ਼ਰਨਾਰਥੀ ਮੰਨਿਆ ਸੀ।
18 ਸਾਲਾ ਰਹਾਫ ਨੇ ਦੇਸ਼ ਨਿਕਾਲੇ ਦੇ ਡਰ ਨਾਲ ਖੁਦ ਨੂੰ ਬੈਂਕਾਕ ਹਵਾਈ ਅੱਡੇ ਦੇ ਹੋਟਲ ਦੇ ਇਕ ਕਮਰੇ ਵਿਚ ਬੰਦ ਕਰ ਲਿਆ ਸੀ ਅਤੇ ਸੋਸ਼ਲ ਮੀਡੀਆ ਜ਼ਰੀਏ ਮਦਦ ਦੀ ਅਪੀਲ ਕੀਤੀ ਸੀ। ਇਸਲਾਮ ਛੱਡ ਚੁੱਕੀ ਰਹਾਫ ਨੂੰ ਡਰ ਹੈ ਕਿ ਵਾਪਸ ਜਾਣ 'ਤੇ ਸਾਊਦੀ ਅਰਬ ਵਿਚ ਰਹਿੰਦਾ ਉਸ ਦਾ ਪਰਿਵਾਰ ਉਸ ਦੀ ਹੱਤਿਆ ਕਰ ਦੇਵੇਗਾ।
ਅੱਜ ਸਵੇਰੇ ਸਿਡਨੀ ਸ਼ਹਿਰ ਵਿਚ ਚਾਰ ਔਰਤਾਂ ਨੇ ਟੌਪਲੈਸ ਹੋ ਕੇ ਖੁਦ ਨੂੰ ਸੀਕਰੇਟ ਸਿਸਟਰਹੁੱਡ ਦੱਸਦਿਆਂ, ਸਾਊਦੀ ਕੌਂਸਲੇਟ ਦੇ ਭਵਨ ਦੇ ਬਾਹਰ ਪ੍ਰਦਰਸ਼ਨ ਕੀਤਾ। ਉਨ੍ਹਾਂ ਨੇ ਰਹਾਫ ਨੂੰ ਆਸਟ੍ਰੇਲੀਆ ਵਿਚ ਰਿਹਾਇਸ਼ ਦੇਣ ਦੀ ਗੱਲ ਕਹੀ ਹੈ। ਪ੍ਰਦਰਸ਼ਨ ਦੌਰਾਨ ਇਨ੍ਹਾਂ ਔਰਤਾਂ ਨੇ ਬੈਨਰ ਵੀ ਫੜੇ ਹੋਏ ਸਨ।
ਸੀਕਰੇਟ ਸਿਸਟਰਹੁੱਡ ਦੇ ਬਾਨੀ ਜੈਕੀ ਲਵ ਨੇ ਕਿਹਾ ਕਿ ਰਹਾਫ ਦੀ ਦੁਰਦਸ਼ਾ ਅਤੇ ਹਰ ਜਗ੍ਹਾ ਪੀੜਤ ਔਰਤਾਂ ਦੀ ਪਛਾਣ ਲਈ ਆਸਟ੍ਰੇਲੀਆਈ ਸਰਕਾਰ ਨੂੰ ਅਪੀਲ ਕਰਨ ਲਈ ਪ੍ਰਦਰਸ਼ਨ ਕੀਤਾ ਗਿਆ ਸੀ।
