ਅਮਰੀਕਾ 'ਚ ਹਾਦਸਾਗ੍ਰਸਤ ਹੋਇਆ ਜਹਾਜ਼, ਭਾਰਤੀ ਮੂਲ ਦੇ ਡਾਕਟਰ ਸਮੇਤ 2 ਲੋਕਾਂ ਦੀ ਮੌਤ

ਕੈਲੀਫੋਰਨੀਆ (ਏਪੀ): ਅਮਰੀਕਾ ਦੇ ਉਪਨਗਰ ਦੱਖਣੀ ਕੈਲੀਫੋਰਨੀਆ ਵਿੱਚ ਸੋਮਵਾਰ ਨੂੰ ਇੱਕ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ। ਇਸ ਹਾਦਸੇ ਵਿਚ ਭਾਰਤੀ ਮੂਲ ਦੇ ਦਿਲ ਰੋਗ ਮਾਹਰ ਸਮੇਤ ਦੋ ਲੋਕਾਂ ਦੀ ਮੌਤ ਹੋ ਗਈ ਅਤੇ ਦੋ ਹੋਰ ਜ਼ਖਮੀ ਹੋ ਗਏ। ਹਾਦਸੇ ਕਾਰਨ ਦੋ ਘਰਾਂ ਨੂੰ ਅੱਗ ਲੱਗ ਗਈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ।

ਅਰੀਜ਼ੋਨਾ ਦੇ ਯੁਮਾ ਰੀਜ਼ਨਲ ਮੈਡੀਕਲ ਸੈਂਟਰ (YRMC) ਮੁਤਾਬਕ ਹਾਦਸਾਗ੍ਰਸਤ ਹੋਇਆ ਦੋ ਇੰਜਣ ਵਾਲਾ ਇਹ ਜਹਾਜ਼ ਸੰਸਥਾ ਵਿਚ ਕੰਮ ਕਰ ਰਹੇ ਡਾਕਟਰ ਸੁਗਾਤਾ ਦਾਸ ਦਾ ਹੀ ਸੀ। ਸੋਮਵਾਰ ਨੂੰ ਹੋਏ ਹਾਦਸੇ ਵਿਚ ਦਾਸ ਦੀ ਵੀ ਮੌਤ ਹੋ ਗਈ।ਸੀਬੀਐਸ-ਐਨਬੀਸੀ ਨਾਲ ਜੁੜੇ ਇੱਕ ਟੀਵੀ ਸਟੇਸ਼ਨ ਨੇ ਕਿਹਾ ਕਿ ਅਜੇ ਇਸ ਗੱਲ ਦੀ ਪੁਸ਼ਟੀ ਨਹੀਂ ਹੋਈ ਕਿ ਦਾਸ ਹਾਦਸੇ ਦੇ ਸਮੇਂ ਜਹਾਜ਼ ਚਲਾ ਰਹੇ ਸਨ ਜਾਂ ਨਹੀਂ। ਵਾਈ.ਆਰ.ਐਮ.ਸੀ. ਦੇ ਮੁੱਖ ਮੈਡੀਕਲ ਅਧਿਕਾਰੀ ਭਰਤ ਮਾਗੂ ਨੇ ਇੱਕ ਬਿਆਨ ਵਿੱਚ ਕਿਹਾ,“ਸਥਾਨਕ ਕਾਰਡੀਓਲੋਜਿਸਟ ਸੁਗਾਤਾ ਦਾਸ ਦੇ ਜਹਾਜ਼ ਦੇ ਹਾਦਸਾਗ੍ਰਸਤ ਹੋਣ ਬਾਰੇ ਸੁਣ ਕੇ ਸਾਨੂੰ ਬਹੁਤ ਦੁੱਖ ਹੋਇਆ ਹੈ। ਜਹਾਜ਼ ਸੈਂਟੀ (ਕੈਲੀਫੋਰਨੀਆ) ਨੇੜੇ ਹਾਦਸਾਗ੍ਰਸਤ ਹੋ ਗਿਆ।”

ਮਾਗੂ ਨੇ ਕਿਹਾ,“ਉਹ ਇੱਕ ਸ਼ਾਨਦਾਰ ਕਾਰਡੀਓਲੋਜਿਸਟ ਅਤੇ ਪਰਿਵਾਰ ਪ੍ਰਤੀ ਸਮਰਪਿਤ ਵਿਅਕਤੀ ਸਨ। ਅਸੀਂ ਇਸ ਮੁਸ਼ਕਲ ਸਮੇਂ ਵਿੱਚ ਉਹਨਾਂ ਦੇ ਪਰਿਵਾਰ, ਦੋਸਤਾਂ ਅਤੇ ਸਹਿਕਰਮੀਆਂ ਦੇ ਪ੍ਰਤੀ ਹਮਦਰਦੀ ਪ੍ਰਗਟ ਕਰਦੇ ਹਾਂ।” ਸੈਂਟੀ ਵਿਚ ਸੈਂਟਾਨਾ ਹਾਈ ਸਕੂਲ ਦੇ ਕੋਲ ਹੋਏ ਹਾਦਸੇ ਤੋਂ ਬਾਅਦ, ਅੱਗ ਨੇ ਦੋ ਘਰਾਂ ਨੂੰ ਤਬਾਹ ਕਰ ਦਿੱਤਾ ਅਤੇ ਪੰਜ ਹੋਰ ਘਰਾਂ ਅਤੇ ਕਈ ਵਾਹਨਾਂ ਨੂੰ ਨੁਕਸਾਨ ਪਹੁੰਚਾਇਆ। ਹਾਲਾਂਕਿ, ਇਸ ਤੋਂ ਪਹਿਲਾਂ ਕਿ ਅੱਗ ਹੋਰ ਘਰਾਂ ਵਿੱਚ ਫੈਲਦੀ, ਫਾਇਰਫਾਈਟਰਜ਼ ਨੇ ਅੱਗ 'ਤੇ ਕਾਬੂ ਪਾ ਲਿਆ। ਹਾਦਸੇ ਵਿੱਚ ਮਾਰੇ ਗਏ ਦੂਜੇ ਵਿਅਕਤੀ ਇੱਕ ਯੂਪੀਐਸ ਕਰਮਚਾਰੀ ਸੀ ਜੋ ਘਟਨਾ ਦੇ ਸਮੇਂ ਜ਼ਮੀਨ ਤੇ ਕੰਮ ਕਰ ਰਿਹਾ ਸੀ। ਯੂਪੀਐਸ ਨੇ ਪੁਸ਼ਟੀ ਕੀਤੀ ਹੈ ਕਿ ਜਹਾਜ਼ ਹਾਦਸੇ ਵਿੱਚ ਉਸਦੇ ਇੱਕ ਕਰਮਚਾਰੀ ਦੀ ਮੌਤ ਹੋ ਗਈ ਸੀ। 

ਏਬੀਸੀ ਨਾਲ ਜੁੜੇ ਕੇਐਕਸਟੀਵੀ ਨੂੰ ਯੂਪੀਐਸ ਨੇ ਕਿਹਾ,“ਅਸੀਂ ਆਪਣੇ ਇੱਕ ਕਰਮਚਾਰੀ ਦੀ ਮੌਤ ਦੀ ਖ਼ਬਰ ਤੋਂ ਦੁਖੀ ਹਾਂ ਅਤੇ ਉਸਦੇ ਪਰਿਵਾਰ ਅਤੇ ਦੋਸਤਾਂ ਪ੍ਰਤੀ ਹਮਦਰਦੀ ਪ੍ਰਗਟ ਕਰਦੇ ਹਾਂ। ਅਸੀਂ ਦੁਰਘਟਨਾ ਦੇ ਹੋਰ ਪੀੜਤਾਂ ਦੇ ਪਰਿਵਾਰ ਅਤੇ ਦੋਸਤਾਂ ਨਾਲ ਵੀ ਹਮਦਰਦੀ ਪ੍ਰਗਟ ਕਰਦੇ ਹਾਂ। ਫੈਡਰਲ ਏਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (ਐਫਏਏ) ਮੁਤਾਬਕ, ਜਹਾਜ਼ ਦੋਹਰੇ ਇੰਜਣ ਵਾਲਾ ਸੇਸਨਾ ਸੀ 340 ਸੀ ਜੋ ਦੁਪਹਿਰ 12:15 ਵਜੇ ਦੇ ਕਰੀਬ ਕ੍ਰੈਸ਼ ਹੋਇਆ। ਐਫਏਏ ਮੁਤਾਬਕ,"ਜਹਾਜ਼ ਵਿੱਚ ਸਵਾਰ ਲੋਕਾਂ ਦੀ ਗਿਣਤੀ ਦਾ ਅਜੇ ਪਤਾ ਨਹੀਂ ਹੈ।" ਸੇਸਨਾ ਸੀ 340 ਜਹਾਜ਼ਾਂ ਨੂੰ ਆਮ ਤੌਰ 'ਤੇ ਕਾਰੋਬਾਰ ਲਈ ਵਰਤਿਆ ਜਾਂਦਾ ਹੈ। ਜਹਾਜ਼ ਵਿੱਚ ਛੇ ਯਾਤਰੀਆਂ ਦੇ ਬੈਠਣ ਦੀ ਸਮਰੱਥਾ ਹੈ, ਜਿਸ ਦੀਆਂ ਦੋ ਸੀਟਾਂ ਅੱਗੇ ਅਤੇ ਦੋ ਪਿੱਛੇ ਹਨ।

ਪੜ੍ਹੋ ਇਹ ਅਹਿਮ ਖਬਰ - ਮੈਕਸੀਕੋ 'ਚ ਸ਼ੱਕੀ ਨਸ਼ੀਲੇ ਪਦਾਰਥ ਤਸਕਰਾਂ ਨੇ ਕੀਤੀ ਗੋਲੀਬਾਰੀ, 3 ਸਾਲਾ ਮਾਸੂਮ ਦੀ ਮੌਤ
 

ਸੰਸਥਾ ਦੀ ਵੈਬਸਾਈਟ ਮੁਤਾਬਕ, ਇੱਕ ਬੰਗਾਲੀ ਪਰਿਵਾਰ ਵਿੱਚ ਜਨਮੇ, ਦਾਸ ਪੁਣੇ ਵਿੱਚ ਵੱਡੇ ਹੋਏ। ਉਹ "ਪਾਵਰ ਆਫ਼ ਲਵ ਫਾਊਂਡੇਸ਼ਨ" ਦੇ ਨਿਰਦੇਸ਼ਕ ਵੀ ਸਨ। ਇਹ ਇੱਕ ਅਮਰੀਕੀ ਗੈਰ-ਲਾਭਕਾਰੀ ਸੰਸਥਾ ਹੈ ਜੋ ਵਿਦੇਸ਼ਾਂ ਵਿੱਚ ਏਡਜ਼ ਅਤੇ ਐੱਚਆਈਵੀ ਨਾਲ ਪ੍ਰਭਾਵਿਤ ਜਾਂ ਪ੍ਰਭਾਵਿਤ ਔਰਤਾਂ ਅਤੇ ਬੱਚਿਆਂ ਦੀ ਮਦਦ ਕਰਦੀ ਹੈ। ਵੈਬਸਾਈਟ ਦੱਸਦੀ ਹੈ ਕਿ ਦਾਸ ਦੇ ਦੋ ਪੁੱਤਰ ਹਨ ਅਤੇ ਉਹ ਸੈਨ ਡਿਏਗੋ ਵਿੱਚ ਰਹਿੰਦੇ ਸਨ। ਉਹਨਾਂ ਕੋਲ ਦੋ ਇੰਜਣਾਂ ਵਾਲੀ ਸੇਸਨਾ 340 ਸੀ ਅਤੇ ਉਹ ਇੱਕ ਸਿਖਲਾਈ ਪ੍ਰਾਪਤ ਪਾਇਲਟ ਸਨ, ਜਿਹਨਾਂ ਨੇ ਆਪਣੇ ਘਰ ਅਤੇ ਯੁਮਾ ਦੇ ਵਿਚਕਾਰ ਉਡਾਣ ਭਰੀ ਸੀ।