ਅਫ਼ਗਾਨਿਸਤਾਨ ’ਚ ਗਲੀ-ਗਲੀ ਸਾਮਾਨ ਵੇਚਣ ਨੂੰ ਮਜਬੂਰ ਹੋਈ ਮਹਿਲਾ ਪੱਤਰਕਾਰ

ਕਾਬੁਲ– ਅਗਸਤ ਦੇ ਅੱਧ ’ਚ ਜਦੋਂ ਤੋਂ ਤਾਲਿਬਾਨ ਨੇ ਅਫ਼ਗਾਨਿਸਤਾਨ ’ਤੇ ਕਬਜ਼ਾ ਕੀਤਾ ਹੈ, ਦੇਸ਼ ਆਰਥਿਕ ਸੰਕਟ ’ਚ ਡੁੱਬ ਗਿਆ ਹੈ। ਜਿਸ ਨਾਲ ਲੋਕਾਂ ਨੂੰ ਆਪਣੇ ਪਰਿਵਾਰਾਂ ਦਾ ਸਮਰਥਨ ਕਰਨ ਲਈ ਅਜੀਬੋ-ਗਰੀਬ ਨੌਕਰੀਆਂ ਕਰਨ ਲਈ ਮਜਬੂਰ ਹੋਣਾ ਪਿਆ ਹੈ। ਅਫ਼ਗਾਨਿਸਤਾਨ ’ਚ ਤੇਜ਼ੀ ਨਾਲ ਰਾਜਨੀਤਿਕ ਤਬਦੀਲੀ ਤੋਂ ਬਾਅਦ ਕਈ ਮੀਡੀਆ ਹਾਊਸ ਬੰਦ ਹੋਣ ਕਾਰਨ ਪੱਤਰਕਾਰਾਂ ਸਮੇਤ ਕਈ ਲੋਕਾਂ ਦੀ ਨੌਕਰੀ ਚਲੀ ਗਈ। ਇਕ ਮਹਿਲਾ ਪੱਤਰਕਾਰ ਫਰਜ਼ਾਨਾ ਅਯੂਬੀ (27) ਵਿੱਤੀ ਸਮੱਸਿਆਵਾਂ ਕਾਰਨ ਆਪਣੇ ਤਿੰਨ ਮੈਂਬਰੀ ਪਰਿਵਾਰ ਦੇ ਪਾਲਣ-ਪੋਸ਼ਣ ਲਈ ਇਕ ਸਟਰੀਟ ਵੈਂਡਰ ਬਣ ਗਈ ਹੈ। 

ਟੋਲੋ ਨਿਊਜ਼ ਨੇ ਅਯੂਬੀ ਦੇ ਹਵਾਲੇ ਤੋਂ ਕਿਹਾ ਕਿ ਕੁਝ ਮੀਡੀਆ ਸੰਗਠਨਾਂ ਦੇ ਬੰਦ ਹੋਣ ਨਾਲ ਪੱਤਰਕਾਰ ਬੇਰੋਜ਼ਗਾਰ ਹੋ ਗਏ ਅਤੇ ਮੈਨੂੰ ਇਕ ਵਿਕਰੇਤਾ ਦੇ ਰੂਪ ’ਚ ਕੰਮ ਕਰਨ ਲਈ ਮਜਬੂਰ ਹੋਣਾ ਪਿਆ ਕਿਉਂਕਿ ਤਾਲਿਬਾਨ ਮਹਿਲਾਵਾਂ ਨੂੰ ਕੰਮ ਨਹੀਂ ਕਰਨ ਦਿੰਦੇ। ਉਨ੍ਹਾਂ ਕੌਮਾਂਤਰੀ ਭਾਈਚਾਰੇ ਅਤੇ ਮੀਡੀਆ ਵਾਚਡੌਗ ਨੂੰ ਅਫ਼ਗਾਨਿਸਤਾਨ ’ਚ ਮੀਡੀਆ ਪਰਿਵਾਰ ਦੀਆਂ ਸਮੱਸਿਆਵਾਂ ’ਤੇ ਧਿਆਨ ਦੇਣ ਦੀ ਅਪੀਲ ਕੀਤੀ। ਟੋਲੋ ਨਿਊਜ਼ ਨੇ ਅਯੂਬੀ ਦੇ ਹਵਾਲੇ ਤੋਂ ਕਿਹਾ ਕਿ ਕੌਮਾਂਤਰੀ ਭਾਈਚਾਰੇ ਅਤੇ ਮੀਡੀਆ ਦੇ ਵਾਚਡੌਗ ਨੂੰ ਸਾਡੇ ਹਾਲਾਤ ’ਤੇ ਵਿਚਾਰ ਕਰਨਾ ਚਾਹੀਦਾ ਹੈ। ਅਯੂਬੀ ਨੇ ਅਫ਼ਗਾਨਿਸਤਾਨ ’ਚ ਕਈ ਮੀਡੀਆ ਸੰਗਠਨਾਂ ’ਚ ਕੰਮ ਕੀਤਾ ਹੈ।

ਇਸ ਦਰਮਿਆਨ ਮੀਡੀਆ ਵਾਚਡੌਗ ਸੰਗਠਨਾਂ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਉਹ ਅਫ਼ਗਾਨ ਪੱਤਰਕਾਰਾਂ ਦੀਆਂ ਸਮੱਸਿਆਵਾਂ ਨੂੰ ਸੁਲਝਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਅਫ਼ਗਾਨ ਪੱਤਰਕਾਰ ਸੰਘ ਦੇ ਇਕ ਮੈਂਬਰ ਹੁਜਾਤੁੱਲ੍ਹਾ ਮੁਜਾਦੀਦ ਨੇ ਕਿਹਾ ਕਿ ਮੈਂ ਕੌਮਾਂਤਰੀ ਸੰਗਠਨਾਂ ਅਤੇ ਮੀਡੀਆ ਦਾ ਸਮਰਥਨ ਕਰਨ ਵਾਲੇ ਦੇਸ਼ਾਂ ਨੂੰ ਅਫ਼ਗਾਨਿਸਤਾਨ ’ਚ ਮੀਡੀਆ ’ਤੇ ਗੰਭੀਰਤਾ ਨਾਲ ਧਿਆਨ ਦੇਣ ਦੀ ਅਪੀਲ ਕਰਦਾ ਹੈ। ਅਫ਼ਗਾਨਿਸਤਾਨ ਦੇ ਰਾਸ਼ਟਰੀ ਪੱਤਰਕਾਰ ਸੰਘ ਦੇ ਮੁਖੀ ਮਸਰੋਰ ਲੁੱਤਫੀ ਨੇ ਕਿਹਾ ਕਿ ਜਦੋਂ ਅਫ਼ਗਾਨਿਸਤਾਨ ’ਚ ਰਾਜਨੀਤਿਕ ਤਬਦੀਲੀ ਆਈ ਤਾਂ ਮੀਡੀਆ ਪਰਿਵਾਰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਗਏ। ਪੱਤਰਕਾਰ ਬਦਕਿਸਮਤੀ ਨਾਲ ਖਤਰਨਾਕ ਕੰਮ ਕਰਨ ਲੱਗੇ ਹੋਏ ਸਨ ਅਤੇ ਹੁਣ ਸੜਕਾਂ ’ਤੇ ਵਿਕਰੇਤਾਵਾਂ ਦੇ ਰੂਪ ’ਚ ਕੰਮ ਕਰ ਰਹੇ ਹਨ। ਇਸ ਤੋਂ ਪਹਿਲਾਂ ਸੰਯੁਕਤ ਰਾਸ਼ਟਰ ਅਤੇ ਹੋਰ ਮਨੁੱਖੀ ਸੰਗਠਨਾਂ ਨੇ ਅਫ਼ਗਾਨਿਸਤਾਨ ’ਚ ਕੜਾਕੇ ਦੀ ਠੰਡ ਤੋਂ ਪਹਿਲਾਂ ਗੰਭੀਰ ਆਰਥਿਕ ਸੰਕਟ ’ਤੇ ਚਿੰਤਾ ਜ਼ਾਹਰ ਕੀਤੀ।