ਹਾਏ ਓ ਰੱਬਾ ! ਬਿਨਾਂ ਕਸੂਰ 38 ਸਾਲ ਕੱਟੀ ਕੈਦ , ਆਖ਼ਿਰ ਅਮਰੀਕੀ ਜੇਲ੍ਹ 'ਚ ਦਮ ਤੋੜ ਗਿਆ ਭਾਰਤੀ

ਨਿਊਯਾਰਕ (ਰਾਜ ਗੋਗਨਾ) - ਭਾਰਤੀ ਮੂਲ ਦੇ ਵਿਅਕਤੀ  ਕ੍ਰਿਸ ਮਹਾਰਾਜ  ਜੋ 38 ਸਾਲ ਤੱਕ ਜੇਲ੍ਹ ਵਿਚ ਉਸ ਜੁਰਮ ਦੀ ਸਜ਼ਾ ਭੁਗਤ ਰਹੇ ਸਨ ਜੋ ਉਸਨੇ ਨਹੀਂ ਕੀਤਾ ਸੀ। ਆਖਰਕਾਰ ਜੇਲ੍ਹ ਦੇ ਹਸਪਤਾਲ ਵਿੱਚ ਹੀ ਉਸ ਦੀ ਮੌਤ ਹੋ ਗਈ। ਹਰ ਸਾਲ ਹਜ਼ਾਰਾਂ ਭਾਰਤੀ ਉੱਚ ਪੜ੍ਹਾਈ, ਨੌਕਰੀ ਅਤੇ ਰੁਜ਼ਗਾਰ ਲਈ ਵਿਦੇਸ਼ ਜਾਂਦੇ ਹਨ। ਉਨ੍ਹਾਂ ਵਿੱਚੋਂ ਬਹੁਤਿਆਂ ਨੂੰ ਉੱਥੋਂ ਦੇ ਕਾਨੂੰਨਾਂ ਦੀ ਜਾਣਕਾਰੀ ਨਹੀਂ ਹੁੰਦੀ, ਭਾਰਤ ਵਿੱਚ ਕਾਨੂੰਨ ਅਨੁਸਾਰ ਜੋ ਸਹੀ ਹੈ ਉਹ ਅਮਰੀਕਾ ਵਿਚ ਗਲਤ ਹੈ। ਸਾਡੇ ਦੇਸ਼ ਵਿੱਚ ਜੋ ਅਪਰਾਧ ਮੰਨਿਆ ਜਾਂਦਾ ਹੈ ਉਹ ਵਿਦੇਸ਼ਾਂ ਵਿੱਚ ਕਾਨੂੰਨੀ ਹੈ। ਪਰ ਵਿਦੇਸ਼ ਜਾਣ ਵਾਲੇ ਬਹੁਤ ਸਾਰੇ ਵਿਦਿਆਰਥੀ ਅਤੇ ਕਰਮਚਾਰੀ ਉੱਥੋਂ ਦੇ ਕਾਨੂੰਨਾਂ ਤੋਂ ਜਾਣੂ ਨਹੀਂ ਹਨ।

ਇਸ ਕਾਰਨ ਬਹੁਤ ਸਾਰੇ ਲੋਕ ਜਾਣੇ-ਅਣਜਾਣੇ ਵਿੱਚ ਜੁਰਮ ਕਰ ਲੈਂਦੇ ਹਨ। ਨਤੀਜੇ ਵਜੋਂ, ਉਹ ਉਥੋਂ ਦੀ ਪੁਲਸ ਨੇ ਫੜ੍ਹ ਲਿਆ ਅਤੇ ਜੇਲ੍ਹ ਦੀ ਸਜ਼ਾ ਦੇ ਰਹੇ ਹਨ। ਅਜਿਹੇ ਕਈ ਲੋਕਾਂ ਨੂੰ ਵਕੀਲਾਂ ਦੀ ਘਾਟ ਅਤੇ ਵਿੱਤੀ ਸਾਧਨਾਂ ਦੀ ਘਾਟ ਕਾਰਨ ਉਨ੍ਹਾਂ ਨੂੰ ਸਜ਼ਾ ਭੁਗਤਣੀ ਪੈ ਰਹੀ ਹੈ। ਉਹ ਸਾਲਾਂ ਬੱਧੀ ਜੇਲ੍ਹਾਂ ਵਿੱਚ ਬੰਦ ਹਨ। ਖਾਸ ਤੌਰ 'ਤੇ ਜਿਹੜੇ ਲੋਕ ਖਾੜੀ ਦੇਸ਼ਾਂ 'ਚ ਜਾਂਦੇ ਹਨ, ਉਨ੍ਹਾਂ ਨੂੰ ਜ਼ਿਆਦਾਤਰ ਉੱਥੇ ਹੀ ਜੇਲ੍ਹ ਜਾਣਾ ਪੈਂਦਾ ਹੈ। ਕਈ ਅਜੇ ਵੀ ਜੇਲ੍ਹਾਂ ਵਿੱਚ ਹਨ। ਇਸੇ ਤਰ੍ਹਾਂ ਭਾਰਤੀ ਮੂਲ ਦਾ ਇਹ ਬ੍ਰਿਟਿਸ਼ ਨਾਗਰਿਕ ਕ੍ਰਿਸ ਮਹਾਰਾਜ (85) ਉਸ ਅਪਰਾਧ ਲਈ ਜੇਲ੍ਹ ਗਿਆ ਸੀ ਜੋ ਉਸ ਨੇ ਨਹੀਂ ਕੀਤਾ ਸੀ। ਉਸ ਨੇ ਲਗਭਗ 38 ਸਾਲ ਜੇਲ੍ਹ ਦੇ ਵਿੱਚ ਬਿਤਾਏ। ਅਖੀਰ ਜੇਲ੍ਹ ਦੇ ਹਸਪਤਾਲ ਵਿੱਚ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। 1986 ਵਿੱਚ, ਉਸ ਨੂੰ ਅਮਰੀਕਾ ਵਿੱਚ ਫਲੋਰੀਡਾ ਸਟੇਟ ਕੋਰਟ ਨੇ ਇੱਕ ਕਤਲ ਕੇਸ ਵਿੱਚ ਦੋਸ਼ੀ ਪਾਇਆ ਸੀ। ਉਸ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ। ਪਰ 2002 ਵਿੱਚ ਇਸ ਨੂੰ ਉਮਰ ਕੈਦ ਵਿੱਚ ਤਬਦੀਲ ਕਰ ਦਿੱਤਾ ਗਿਆ। 2019 ਵਿੱਚ ਬਰੀ ਹੋਣ ਦੇ ਬਾਵਜੂਦ, ਮਹਾਰਾਜ ਅਦਾਲਤ ਦੇ ਫੈਸਲੇ ਕਾਰਨ ਜੇਲ੍ਹ ਵਿੱਚ ਸਨ। ਅਪਰਾਧ ਲਈ 38 ਸਾਲ ਦੀ ਸਜ਼ਾ ਕੱਟਣ ਤੋਂ ਬਾਅਦ ਫਲੋਰੀਡਾ ਰਾਜ ਵਿਚ ਜੇਲ੍ਹ ਦੇ ਹਸਪਤਾਲ ਵਿੱਚ ਉਸਦੀ ਮੌਤ ਹੋ ਗਈ।

ਜਾਣੋ ਕੀ ਹੈ ਮਾਮਲਾ

ਡੇਰਿਕ ਅਤੇ ਡੁਆਨ ਮੂ ਯੰਗ ਨੂੰ 1986 ਵਿੱਚ ਕਤਲ ਕਰ ਦਿੱਤਾ ਗਿਆ ਸੀ। ਮਹਾਰਾਜ ਦਾ ਇਸ ਮਾਮਲੇ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ। ਪਰ ਅਚਾਨਕ ਉਹ ਕਤਲ ਕੇਸ ਵਿੱਚ ਫਸ ਗਿਆ। ਮਹਾਰਾਜ ਗ੍ਰਿਫਤਾਰੀ ਤੋਂ ਪਹਿਲਾਂ ਇੰਗਲੈਂਡ ਵਿੱਚ ਇੱਕ ਅਮੀਰ ਵਪਾਰੀ ਦੇ ਤੌਰ ’ਤੇ ਮੰਨੇ ਜਾਦੇ ਸਨ। ਉਹ ਰੇਸ ਦੇ ਘੋੜੇ ਅਤੇ ਗੋਲਫ ਰਾਇਸ ਦੇ  ਮਾਲਕ ਸਨ। ਤ੍ਰਿਨੀਦਾਦ ਦੇ ਰਹਿਣ ਵਾਲੇ ਮਹਾਰਾਜ 1960 ਤੋਂ ਇੰਗਲੈਂਡ ਵਿੱਚ ਰਹਿ ਰਹੇ ਸਨ। ਉਹ ਆਪਣੀ ਪਤਨੀ ਨਾਲ ਰਿਟਾਇਰਮੈਂਟ ਹੋਮ ਖਰੀਦਣ ਲਈ ਛੁੱਟੀਆਂ ਮਨਾਉਣ ਗਿਆ ਸੀ। ਇਸ ਕ੍ਰਮ ਵਿੱਚ ਉਸ ਨੂੰ ਫਲੋਰੀਡਾ ਵਿੱਚ ਇੱਕ ਕਤਲ ਕੇਸ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਉਸ ਨੂੰ ਅਦਾਲਤੀ ਮੁਕੱਦਮੇ ਵਿੱਚ ਦੋਸ਼ੀ ਪਾਇਆ ਗਿਆ ਸੀ।

ਇਸ ਸਮੇਂ ਦੌਰਾਨ ਉਸ ਦੀ ਜ਼ਿੰਦਗੀ ਵਿਚ ਨਾਟਕੀ ਤਬਦੀਲੀ ਆਈ। ਉਸ ਦੀ ਪਤਨੀ ਦੀ ਗਵਾਹੀ ਦੇ ਦਾਅਵਿਆਂ ਦੇ ਬਾਵਜੂਦ ਕਿ ਉਹ ਬੇਕਸੂਰ ਸੀ, ਉਸ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ। ਉਸ ਨੇ ਆਪਣੀ ਸਜ਼ਾ ਨੂੰ ਬਦਲਣ ਤੋਂ ਪਹਿਲਾਂ ਮੌਤ ਦੀ ਸਜ਼ਾ 'ਤੇ 17 ਸਾਲ ਜੇਲ੍ਹ ਵਿੱਚ ਬਿਤਾਏ। ਸੰਨ  2002 ਵਿੱਚ ਉਸਦੀ ਮੌਤ ਦੀ ਸਜ਼ਾ ਨੂੰ ਉਮਰ ਕੈਦ ਵਿੱਚ ਬਦਲ ਦਿੱਤਾ ਗਿਆ ਸੀ। ਸਾਲ  2019 ਵਿੱਚ ਮਹਾਰਾਜ ਬੇਕਸੂਰ ਸਾਬਤ ਹੋਏ। ਪਰ ਉਹ ਜੇਲ੍ਹ ਵਿੱਚ ਹੀ ਰਿਹਾ।ਮਹਾਰਾਜ ਦੀ ਪਤਨੀ ਮਰੀਤਾ  ਨੇ ਅਮਰੀਕੀ ਜੇਲ੍ਹ ਦੇ ਹਸਪਤਾਲ ਵਿੱਚ ਆਪਣੇ ਪਤੀ ਦੀ ਮੌਤ ਦੀ ਖ਼ਬਰ ਸੁਣ ਕੇ ਡੂੰਘਾ ਦੁੱਖ ਪ੍ਰਗਟ ਕੀਤਾ, 'ਅਤੇ ਕਿਹਾ ਕਿ ਮੈਂ 1976 ਵਿੱਚ ਕ੍ਰਿਸ ਨਾਲ ਵਾਅਦਾ ਕੀਤਾ ਸੀ। ਅਸੀਂ ਮਰਦੇ ਦਮ ਤੱਕ ਇਕੱਠੇ ਰਹਾਂਗੇ, ਮੈਂ ਦੁਖੀ ਹਾਂ ਕਿ ਇੰਨੀ ਭਿਆਨਕ ਜਗ੍ਹਾ 'ਤੇ ਉਹ ਇਕੱਲਾ ਮਰ ਗਿਆ,' ਉਸਨੇ ਕਿਹਾ ਕਿ ਕ੍ਰਿਸ ਮਹਾਰਾਜ ਦੀ ਦੇਹ ਨੂੰ ਅੰਤਿਮ ਸੰਸਕਾਰ ਲਈ ਯੂਕੇ ਭੇਜਣ ਦੀ ਬੇਨਤੀ ਕੀਤੀ ਗਈ ਹੈ।