ਅਫਰੀਕੀ ਦੇਸ਼ਾਂ ਤੋਂ 17 ਅਫਗਾਨ ਕੈਦੀ ਰਿਹਾਅ

ਕਾਬੁਲ (ਏਜੰਸੀ)- ਅਫਰੀਕੀ ਦੇਸ਼ਾਂ ਵਿੱਚ ਕੈਦ ਕੁੱਲ 17 ਅਫਗਾਨ ਕੈਦੀਆਂ ਨੂੰ ਰਿਹਾਅ ਕਰ ਦਿੱਤਾ ਗਿਆ ਹੈ ਅਤੇ ਉਹ ਆਪਣੀ ਮਾਤ ਭੂਮੀ ਅਫਗਾਨਿਸਤਾਨ ਵਾਪਸ ਪਰਤ ਗਏ ਹਨ। ਵਿਦੇਸ਼ ਮੰਤਰਾਲਾ ਨੇ ਸ਼ਨੀਵਾਰ ਦੇਰ ਰਾਤ ਇਹ ਜਾਣਕਾਰੀ ਦਿੱਤੀ। ਮੰਤਰਾਲਾ ਦੇ ਉਪ ਬੁਲਾਰੇ ਹਾਫਿਜ਼ ਜ਼ਿਆ ਅਹਿਮਦ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ 'ਤੇ ਇੱਕ ਪੋਸਟ ਵਿੱਚ ਕਿਹਾ, "ਕਾਹਿਰਾ ਵਿੱਚ ਅਫਗਾਨ ਦੂਤਘਰ ਨੇ ਮਿਸਰ, ਮੋਰੱਕੋ, ਲੀਬੀਆ, ਸੂਡਾਨ ਅਤੇ ਮੌਰੀਤਾਨੀਆ ਸਮੇਤ ਕਈ ਅਫਰੀਕੀ ਦੇਸ਼ਾਂ ਦੀਆਂ ਜੇਲ੍ਹਾਂ ਤੋਂ 17 ਅਫਗਾਨ ਨਾਗਰਿਕਾਂ ਨੂੰ ਸਫਲਤਾਪੂਰਵਕ ਰਿਹਾਅ ਕਰਨ ਵਿੱਚ ਸਹਾਇਤਾ ਕੀਤੀ ਹੈ।"

ਅਹਿਮਦ ਨੇ ਐਲਾਨ ਕੀਤਾ ਕਿ ਅਫਗਾਨ ਨਾਗਰਿਕਾਂ ਨੂੰ ਉਕਤ ਦੇਸ਼ਾਂ ਵਿੱਚ ਵੱਖ-ਵੱਖ ਕਾਰਨਾਂ ਕਰਕੇ ਕੈਦ ਕੀਤਾ ਗਿਆ ਸੀ। ਪਿਛਲੇ ਸਾਲ ਸਤੰਬਰ ਦੇ ਸ਼ੁਰੂ ਵਿੱਚ, ਜੇਲ੍ਹ ਪ੍ਰਸ਼ਾਸਨ ਦੇ ਕਾਰਜਕਾਰੀ ਮੁਖੀ ਮੁਹੰਮਦ ਯੂਸਫ਼ ਮੁਸਤਾਰੀ ਨੇ ਸੰਕੇਤ ਦਿੱਤਾ ਸੀ ਕਿ ਇਸ ਸਮੇਂ 8,000 ਤੋਂ 9,000 ਅਫਗਾਨ ਨਾਗਰਿਕ ਦੇਸ਼ ਤੋਂ ਬਾਹਰ ਕੈਦ ਹਨ।